មេដោះគ្រាប់បែកនិងជាមេផ្នែកស៊ើបអង្កេតថៃ ត្រូវបាញ់សម្លាប់ក្នុងការប្រយុទ្ធនៅ ភាគខាងត្បូង

ស្ថានការណ៍នៅភាគខាងត្បូងប្រទេសថៃឡើងកម្តៅទៀតហើយ ដោយកងកម្លាំងថៃបានផ្ទុះអាវុធជាមួយក្រុមផ្តាច់ខ្លួន បណ្តាលឲ្យមេក្រុមស៊ើបអង្កេតនិងជាមេក្រុមដោះគ្រាប់បែកម្នាក់ផងនោះ ត្រូវបាញ់សម្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod កាលពីថ្ងៃពុធទី១៥ខែតុលាឆ្នាំ២០២៥, អ្នកស្លាប់មានឈ្មោះ Somsak Naksen គឺជាមេក្រុមដោះគ្រាប់បែកមកពីអង្គភាពល្បាតព្រំដែនលេខ៤៤៤។ មន្ត្រីម្នាក់នេះត្រូវខ្មាន់កាំភ្លើ​ងបាញ់ចំក្បាលស្លាប់ ពេលចុះធ្វើប្រតិបត្តិការក្នុងការប្រយុទ្ធគ្នាជាមួយក្រុមផ្តាច់ខ្លួន នៅក្បែរវិទ្យាស្ថាន​ Attarbiyatul Hadeesah Ponoh ក្នុងភូមិលេខ៤ ឃុំ Bang Kao ស្រុក Sai Buri ខេត្ត Pattani។

ក្រោយការវាយប្រហារនេះ មន្ត្រីថៃបានបើកការស៊ើបអង្កេតរកជនល្មើសជាបន្តទៀត និងថែមទាំងដាក់ពង្រាយកម្លាំងដើម្បីពង្រឹងសន្តិសុខ ហើយបង្កើនការប្រុងប្រយ័ត្នឈានដល់កម្រិតខ្ពស់។

ប៉ុន្មានខែចុងក្រោយនេះ ស្ថានការណ៍នៅភាគខាងត្បូងប្រទេសថៃ បានឈានដល់កម្រិតគ្រោះថ្នាក់ខ្លាំង ដោយសារតែមានការវាយប្រហារបណ្តាក់គ្នាមិនលស់ថ្ងៃ ដល់ថ្នាក់ថៃត្រូវបង្ខំចិត្តផ្លាស់ប្តូរសមាសភាពមេទ័ព ដើម្បីទប់ទល់នឹងភាពវឹកវរនេះ។

ហេតុការណ៍ធំបំផុតនាពេលចុងក្រោយ គឺកើតឡើងកាលពីល្ងាចថ្ងៃអាទិត្យទី៥ ដែលជាករណីក្រុមចោរចូលប្លន់ហាងមាស Yaowarat Krungthep ក្នុងផ្សារទំនើប Big C នៅស្រុក Su-ngai Kolok នៃខេត្ត Narathiwat ដោយប្លន់គ្រឿងអលង្ការអស់ជាង ១លានដុល្លារអាមេរិក។

សមត្ថកិច្ចបានបញ្ជាក់យ៉ាងច្បាស់ថា ពួកគេគឺជាក្រុមបះបោរ ហើយរត់ចូលប្រទេសម៉ាឡេស៊ី ខណៈពួកគេធ្វើសកម្មភាពនេះដើម្បីយកប្រាក់ទៅផ្គត់ផ្គង់បណ្តាញផ្តាច់ខ្លួនរបស់ពួកគេ។

ដោយសារស្ថានការណ៍រឹតតែធ្ងន់ធ្ងរឡើងៗនេះហើយ អគ្គមេបញ្ជាការកងទ័ពជើងគោកថៃ Pana Claewplodtook បានប្តូរយុទ្ធសាស្ត្រ ដើម្បីដោះស្រាយបញ្ហាពោលគឺលោកបានតែងតាំង Narathip Phoynok ឲ្យទៅដឹកនាំ ភូមិភាគ៤។ បន្ថែមពីលើការតែងតាំងមេទ័ពថ្មីនេះ លោក Pana ក៏ងាកទៅប្រើប្រាស់វិធីសាស្រ្តរបស់មេបញ្ជាការមុនៗផងដែរ តាមរយៈការចល័តកម្លាំងមកពីគ្រប់ភូមិភាគ ដើម្បីពង្រឹងនិងគាំទ្រប្រតិបត្តិការនៅក្នុងខេត្តព្រំដែនភាគខាងត្បូង៕

អត្ថបទ៖ សុខ សុវណ្ណ

ចុចអាន៖ សមាជិកព្រឹទ្ធសភាថៃ ទទួលស្គាល់ថា ថៃ វាយប្រហារកម្ពុជាមុន ប្រើទាំង F-16 ទៀត