ក្រុមគ្រូពេទ្យភ្នែកនៃប្រទេសបារាំង នឹងចុះពិនិត្យព្យាបាល និងវះកាត់ជំងឺភ្នែកដោយឥតគិតថ្លៃ ជូនប្រជាពលរដ្ឋ ក្នុងខេត្តក្រចេះ

ក្រុមគ្រូពេទ្យភ្នែក នៃអង្គការ Pour Pes Yeux Du Monde ប្រទេសបារាំង នឹងចុះមកពិនិត្យព្យាបាល និងវះកាត់ជំងឺភ្នែកដោយឥតគិតថ្លៃ ជូនប្រជាពលរដ្ឋក្នុងខេត្តក្រចេះ ចំនួន ២លើក​ ចាប់ពីដើមខែវិច្ឆិកា ឆ្នាំ២០២៥ នេះតទៅ។នេះបើយោងតាមសេចក្តីជូនដំណឹងរបស់មន្ទីរសុខាភិបាលនៃរដ្ឋបាលខេត្តក្រចេះ ស្ដីអំពី ការចុះពិនិត្យព្យាបាល និងវះកាត់ជំងឺភ្នែក ដោយឥតគិតថ្លៃ។

ដោយមាន​កិច្ចសហការរវាងក្រុមគ្រូពេទ្យភ្នែក នៃអង្គការ Pour Pes Yeux Du Monde ប្រទេសបារាំង ជាមួយកម្មវិធីសុខភាពភ្នែក ក្រសួងសុខាភិបាល នឹងធ្វើការពិនិត្យព្យាបាល និងវះកាត់ជំងឺភ្នែក ដោយឥតគិតថ្លៃ ជូនបងប្អូនប្រជាពលរដ្ឋ នៅខេត្តក្រចេះ ដែលស្ថិតនៅលើកប៉ាលតែម្តង ខុសពីការព្យាបាលជំងឺ នាកន្លងមក ដែលធ្វើឡើងនៅតាមមន្ទីរពេទ្យ សាលារៀន និងទីវត្តអារាម ជាដើម។

កម្មវិធីចុះពិនិត្យ និងវះកាត់ភ្នែកដោយឥតគិតថ្លៃនេះ នឹងធ្វើឡើងលើកទី១ ចាប់ពីថ្ងៃទី២ ដល់ថ្ងៃទី៨ ខែវិច្ឆិកា ឆ្នាំ២០២៥ មានទីតាំងស្ថិតនៅលើកប៉ាល ដែលចតនៅមាត់ទន្លេកំពង់ផែក្រុងក្រចេះ ខេត្តក្រចេះ។ លើកទី២៖ ចាប់ពីថ្ងៃទី១៤ ដល់ថ្ងៃទី២៤ ខែវិច្ឆិកា ឆ្នាំ២០២៥ មានទីតាំងស្ថិតនៅលើកប៉ាល ដែលចតនៅមាត់ទន្លេមុខវត្តខ្សាច់អណ្តែត ឃុំខ្សាច់អណ្តែត ស្រុកឆ្លូង ខេត្តក្រចេះ៕

អត្ថបទ៖ ប្រុញ វិធិន