អភិបាលខណ្ឌឬស្សីកែវ៖ ការដំឡើងបង្គោលភ្លើងបំភ្លឺផ្លូវសាធារណៈ នឹងជួយបង្កើនសុវត្ថិភាព ជាពិសេសជួយលើកកម្ពស់សោភ័ណភាពទីក្រុង

លោក ជិន ប៊ុនធឿន អភិបាលនៃគណៈអភិបាលខណ្ឌឫស្សីកែវ លើកឡើងថា ការដំឡើងបង្គោលភ្លើងបំភ្លឺផ្លូវនៅតាមផ្លូវសាធារណៈ នឹងជួយបង្កើនសុវត្ថិភាពចរាចរណ៍នៅពេលយប់ កាត់បន្ថយហានិភ័យគ្រោះថ្នាក់ផ្សេងៗ និងជាពិសេសជួយលើកកម្ពស់សោភ័ណភាពរបស់ទីក្រុងកាន់តែមានសម្រស់ស្រស់ស្អាត។ ការដាក់បង្គោលភ្លើងបំភ្លឺផ្លូវនេះ មិនត្រឹមតែផ្តល់អត្ថប្រយោជន៍សុវត្ថិភាពទេ ប៉ុន្តែថែមទាំងជួយបង្កើតបរិយាកាសសម្រាប់រស់នៅផងដែរ។

ការលើកឡើងរបស់អភិបាលខណ្ឌឬស្សីកែវនេះ ធ្វើឡើងនៅពេលលោកដឹកនាំក្រុមការងារចុះពិនិត្យដំណើរការវាស់វែង និងកំណត់ទីតាំងដាក់បង្គោលភ្លើងបំភ្លឺផ្លូវសាធារណៈ តាមបណ្តោយផ្លូវលេខ ១៣០០ ចាប់ពីកំណាត់ផ្លូវមុខបុរីអង្គរ ដល់មហាវិថីឈ្នះឈ្នះ ស្ថិតក្នុងសង្កាត់ស្វាយប៉ាក ខណ្ឌឬស្សីកែវ កាលពីល្ងាច ថ្ងៃទី១០ ខែវិច្ឆិកា ឆ្នាំ២០២៥។ ការចុះពិនិត្យនេះ មានគោលបំណងដើម្បីធានាថា ការដំឡើងបង្គោលភ្លើងបំភ្លឺផ្លូវសាធារណៈ នឹងអនុវត្តតាមបច្ចេកទេសត្រឹមត្រូវ ស្របតាមផែនការអភិវឌ្ឍន៍សាធារណៈ និងបំពេញតាមតម្រូវការរបស់ប្រជាពលរដ្ឋក្នុងមូលដ្ឋាន។

លោក សេង វុទ្ធី ជាប្រជាពលរដ្ឋរស់នៅតាមបណ្តោយផ្លូវលេខ១៣០០ សម្ដែងការរីករាយដែលរដ្ឋបាលខណ្ឌបានយកចិត្តទុកដាក់ដល់សុវត្ថិភាពរបស់ប្រជាពលរដ្ឋ ខណៈកន្លងទៅកំណាត់ផ្លូវមួយនេះគ្មានភ្លើងបំភ្លឺភ្លូវ ងងឹត ពេលយប់មិនសូវមានអ្នកហ៊ានដើរចេញក្រៅនោះទេ តែឥឡូវមានភ្លើងបំភ្លឺ នឹងងាយស្រួលសម្រាប់ពលរដ្ឋទាំងអស់គ្នា។ ពលរដ្ឋរូបនេះបាន បន្ថែមថា ការដាក់បង្គោលភ្លើងបំភ្លឺផ្លូវសាធារណៈតាមបណ្តោយផ្លូវលេខ១៣០០ គឺជាផ្នែកមួយនៃការអភិវឌ្ឍន៍សាធារណៈ និងការយកចិត្តទុកដាក់ពីអាជ្ញាធរដែនដែនដី​៕

អត្ថបទ៖ សំណាង