នគរបាលស្រុកសាមគ្គីមុនីជ័យចាប់ខ្លួនជនសង្ស័យម្នាក់ពាក់ព័ន្ធករណីប្លន់ម៉ូតូ

កម្លាំងនគរបាលនៃអធិការដ្ឋាននគរបាលស្រុកសាមគ្គីមុនីជ័យ ស្នងការដ្ឋាននគរបាលខេត្តកំពង់ស្ពឺ បានសហការជាមួយបណ្ដាកម្លាំងប៉ុស្ដិ៍តាមស្រាវជ្រាវ និងឈានដល់ការឃាត់ខ្លួនជនសង្ស័យម្នាក់ ពាក់ព័ន្ធករណីប្លន់ម៉ូតូមួយគ្រឿងពីយុវជនម្នាក់បានសម្រេច។

ជនសង្ស័យត្រូវបានឃាត់ខ្លួននៅចំណុចផ្លូវលំភូមិ ត្រាចកោង ឃុំយុ​ទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ ខណៈដែលកំពុងព្យាយាមជិះម៉ូតូរបស់ជនរងគ្រោះគេចខ្លួន។ ជនសង្ស័យមានឈ្មោះ វឿន វ័ន្ត ភេទប្រុស អាយុ​២​៣​ឆ្នាំ រស់នៅភូមិគាមុនី ឃុំរុងរឿង ស្រុកថ្ពង ខេត្តកំពង់ស្ពឺ និងត្រូវបានបញ្ជូន​មកអធិការនគរបាលស្រុកសាមគ្គីមុនីជ័យ ដើម្បីកសាងសំណុំរឿងចាត់ការតាមនីតិវិធីបន្ត។

តាមរបាយការណ៍របស់អធិការនគរបាលស្រុក កាលពីវេលា២២និង​៣០​នាទី ជនសង្ស័យបានធ្វើសកម្មភាពស្ទាក់ប្លន់យកម៉ូតូមួយគ្រឿងម៉ាក ហុង​ដា​ C125 ពណ៍ខ្មៅ ឆ្នាំ​20​21 ពាក់ផ្លាកលេខកំពង់​ស្ពឺ 1T-7189 និងទូរសព្ទមួយគ្រឿងពីយុវជនម្នាក់ឈ្មោះ លឹម ណារីម ភេទប្រុស អាយុ​២១​ឆ្នាំ រស់នៅភូមិកោះ ឃុំក្រាំ​ងចេក ស្រុកសាមគ្គីមុនីជ័យ នៅចំ​ណុចផ្លូវកៅស៊ូលេខ​1kS2​ ស្ថិតនៅភូមិកណ្តក់​ ឃុំព្រៃក្រសាំង ស្រុកសាមគ្គីមុនីជ័យ ក្រោយពីធ្វើសកម្មភាពជនសង្ស័យបានយកម៉ូតូជនរងគ្រោះជិះគេចខ្លួន។

ក្រោយពីទទួលបានព័ត៌មាន កម្លាំងនគរបាលនៃអធិការដ្ឋាននគរបាលស្រុក និងកម្លាំងតាមបណ្ដាប៉ុស្ដិ៍បានចេញប្រតិបត្តិការតាមរកជនសង្ស័យរហូតឃើញ និងឈានដល់ការឃាត់ខ្លួនតែម្ដង៕