អាជ្ញាធរសង្កាត់ស្ទឹងមានជ័យ ១ ដឹកនាំក្រុមការងារបច្ចេកទេសពិនិត្យ​គុណភាពផ្លូវបេតុង និងប្រព័ន្ធលូរំដោះទឹក ទើបស្ថាបនារួច

ដើម្បីធានាគុណភាព សុវត្ថិភាព ផ្លូវដែលទើបតែស្ថាបនារួចនៅក្នុងមូលដ្ឋានសង្កាត់ស្ទឹងមានជ័យ ១ អាជ្ញាធរ បានសហការជាមួយនឹងក្រុមការងារបច្ចេកទេសសាលារាជធានី ចុះធ្វើការត្រួតពិនិត្យកម្រាស់ និង គុណភាព ដែលខាងក្រុមហ៊ុនម៉ៅការធ្វើការស្ថាបនារួចរាល់។

ជាក់ស្ដែងនៅថ្ងៃទី ១២ ខែវិច្ឆិកា ឆ្នាំ ២០២៥ នេះ អាជ្ញាធរស្ទឹងមានជ័យ ១ បានដឹកនាំក្រុមការងារបច្ចេកទេសសាលារាជធានីភ្នំពេញ សហការជាមួយ ការិយាល័យខណ្ឌមានជ័យ ចុះពិនិត្យគុណភាពផ្លូវបេតុង និង ប្រព័ន្ធលូរំដោះទឹក ស្ថិតនៅភូមិមានជ័យ ១ មានជ័យ ២ ថ្មី និង ភូមិទ្រា ១ ខណ្ឌមានជ័យ រាជធានីភ្នំពេញ។

លោក ជា សារ៉េត ចៅសង្កាត់ស្ទឹងមានជ័យ ១ បានបញ្ជាក់ថា ទីតាំងការដ្ឋានស្ថាបនាចាក់ផ្លូវបេតុងនេះ អាជ្ញាធរសង្កាត់បានប្រើប្រាស់ថវិកាអភិវឌ្ឍន៍ឆ្នាំ ២០២៥ ដើម្បីជួយសម្រួលដល់ការធើ្វដំណើររបស់ប្រជាពលរដ្ឋប្រើប្រាស់ប្រចាំថ្ងៃ។ ក្នុងនោះ អាជ្ញាធរ បានប្រើប្រាស់ថវិកាអភិវឌ្ឍន៍ឆ្នាំ ២០២៥ លើគម្រោងស្ថាបនាផ្លូវបេតុងមានប្រវែង ២៥៧ ម៉ែត្រ និង ទទឹង ៥ ម៉ែត្រ ក្នុងមូលដ្ឋានសង្កាត់។

ជាមួយគ្នាផងដែរ អាជ្ញាធរ និងមន្រី្តជំនាញ ត្រួតពិនិត្យរួចឃើញថា ទីតាំងផ្លូវដែលស្ថាបនានេះត្រឹមត្រូវតាមស្តង់ដារបច្ចេកទេសអាចឲ្យប្រជាពលរដ្ឋប្រើប្រាស់បានយូរអង្វែង៕

អត្ថបទ ៖ ម៉េង