អាជ្ញាធរខណ្ឌមានជ័យ បន្តស្តារប្រឡាយដើម្បីកាត់បន្ថយបញ្ហាជំនន់ទឹកភ្លៀងមុនរដូវវស្សាខិតជិតមកដល់

លោក សេង គន្ធ អភិបាលខណ្ឌមានជ័យ ចុះត្រួតពិនិត្យការងារស្តារប្រឡាយ ដើម្បីពន្លឿនដំណើរការឲ្យបានទាន់ពេលវេលា មុនរដូវវស្សាមកដល់។ ការចុះត្រួតពិនិត្យនេះ បានធ្វើឡើងនាព្រឹកថ្ងៃទី ០៥ ខែឧសភា ឆ្នាំ២០២៦ នៅភូមិព្រែក តាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដើម្បីធានាឲ្យការងារស្តារប្រឡាយប្រព្រឹត្តទៅដោយប្រសិទ្ធភាព និងអាចជួយបង្ការ និងកាត់បន្ថយបញ្ហាជំនន់ទឹកភ្លៀងក្នុងមូលដ្ឋាន។

លោក សេង គន្ធ អភិបាលខណ្ឌមានជ័យ បានអោយដឹងថា អាជ្ញាធរខណ្ឌបានដាក់គ្រឿងចក្រ ដើម្បីពន្លឿនដំណើរ ការកាយស្តារប្រឡាយឲ្យបានរហ័ស និងទាន់ពេលវេលា មុនពេលរដូវវស្សាចូលមកដល់ ដើម្បីធានាឲ្យមានការបង្ហូរទឹកបានល្អ និងកាត់បន្ថយហានិភ័យជំនន់ទឹកភ្លៀងនៅក្នុងតំបន់។

អភិបាលខណ្ឌមានជ័យ បានបញ្ជាក់ថា ការរៀបចំ និងថែទាំប្រព័ន្ធប្រឡាយជាប្រចាំ គឺមានសារៈសំខាន់ក្នុងការការពារសុវត្ថិភាព និងការរស់នៅប្រចាំថ្ងៃរបស់ប្រជាពលរដ្ឋ ជាពិសេសនៅក្នុងរដូវវស្សា។

ជាមួយគ្នានោះ លោកក័បានបានអំពាវនាវដល់ប្រជាពលរដ្ឋទាំងអស់ បន្ទាប់ពីការស្តារប្រឡាយរួចសូមបញ្ឈប់ការបោះសំរាមចូលក្នុងប្រឡាយ ព្រោះអាចបង្កការរាំងស្ទះដល់ចរន្តទឹក ធ្វើឲ្យទឹកហូរយឺតនៅពេលមានភ្លៀងធ្លាក់ និងអាចប៉ះពាល់ដល់សុខភាពសាធារណៈ និងបរិស្ថានរស់នៅផងដែរ៕ អត្ថបទ ៖ រដ្ឋា