អ្នកធ្វើដំណើរប្រតិកម្មអ្នករត់តាក់សុី ចតដឹកម៉ូយក្រោមស្ពានអាកាសក្បាលថ្នល់ ព្រោះងាយគ្រោះថ្នាក់បំផុត

ភ្នំពេញ ៖ ជារឿយៗអ្នកធ្វើដំណើរឆ្លងកាត់ក្រោមស្ពានអាកាសក្បាលថ្នល់បានប្រតិកម្មទៅនិងរថយន្តតាក់សុីដែលឈប់សំចតដឹកម៉ូយក្រោមស្ពានបង្កជាភាពរញ៉េរញ៉ៃហើយអ្វីដែលគួរឲ្យបារម្មណ៍គឺគ្រោះថ្នាក់ចរាចរណ៍តែម្តង។

ប្រភពពីបងប្រុស សន វិធាន ដែលធ្វើដំណើរឆ្លងកាត់ក្រោមស្ពានអាកាសក្បាលថ្នល់នេះជារៀងរាល់ថ្ងៃបានដឹងថាបងប្រុសមានក្តីព្រួយបារម្មណ៍ភ័យខ្លាចជួបគ្រោះថ្នាក់ចរាចរណ៍នៅពេលដែលរថយន្តតាក់សុីមកឈប់សំចតចាំដឹកម៉ូយពិសេសគឺក្រុមចាប់ម៉ូយរត់ប្រសេចប្រសាចពេញទ្រូងផ្លូវខណៈដែលអ្នកធ្វើដំណើបង្ខំចិត្តបង្កើនល្បើនដើម្បីឆ្លងស្ពានព្រះមុនីវង្សនោះ។

បងប្រុសបន្តថា ពីមុនមកគេសង្កេតឃើញកម្លាំងប្រជាការសង្កាត់ចាក់អង្រែលើ ក៏ដូចជានគរបាលប៉ុស្តិ៍ឈរប្រចាំការដើម្បីដេញរថយន្តតាក់សុីមិនឲ្យឈប់ចាប់ម៉ូយក្រោមស្ពាន។ ប៉ុន្តែបានតែមួយរយៈពេលខ្លីប៉ុណ្ណោះ គឺស្រាប់តែបាត់ឈឹង។

ទាក់ទិនទៅនិងបញ្ហាខាងលើនេះ កម្ពុជាថ្មីបានសុំការបញ្ជាក់ពីលោក កែវ សាវឿន ចៅសង្កាត់ចាក់អង្រែលើប៉ុន្តែទូរស័ព្ទចូលតែលោកឆ្លើយថាជាប់ប្រជុំ៕

ដោយ ៖ នរា