ព័ត៌មានអន្ដរជាតិ

អាមេរិកផ្អាកដំណើរការអន្តោប្រវេសន៍ចំពោះ១៩ប្រទេស បន្ទាប់ពីមានការបាញ់ប្រហារនៅ D.C

បានផុស

៦ ខែ មុន

នៅ

ថ្ងៃពុធ ៣ ធ្នូ ២០២៥

ដោយ

Chheang

រដ្ឋបាលលោក ត្រាំ កាលពីថ្ងៃអង្គារទី២ខែធ្នូឆ្នាំ២០២៥ បានផ្អាកពាក្យស្នើសុំអន្តោប្រវេសន៍ទាំងអស់ រួមទាំងការផ្ដល់បណ្ណ Green Card និងសញ្ជាតិ សម្រាប់ប្រជាជនមកពី១៩ប្រទេស ដោយលើកឡើងពីកង្វល់សន្តិសុខជាតិ និងសុវត្ថិភាពសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម New York Times វិធានការនេះ ដែលត្រូវបានគូសបញ្ជាក់ក្នុងកំណត់ហេតុផ្ទៃក្នុងមួយ មានផលប៉ះពាល់ដល់អ្នកដាក់ពាក្យពីប្រទេសដែលស្ថិតក្រោមបម្រាមធ្វើដំណើរកាលពីខែមិថុនា និងដាក់កំហិតបន្ថែមទៀតលើអន្តោប្រវេសន៍ស្របច្បាប់ ដែលជាបង្គោលដ៏សំខាន់នៃរបៀបវារៈនយោបាយរបស់ប្រធានាធិបតី ដូណាល់ ត្រាំ។ ប្រទេសក្នុងបញ្ជីហាមឃាត់នេះរួមមាន អាហ្វហ្គានីស្ថាន, សូម៉ាលី, មីយ៉ាន់ម៉ា, ឆាដ, សាធារណរដ្ឋកុងហ្គោ, អេក្វាទ័រហ្គីណេ, អេរីទ្រា, ហៃទី, អ៊ីរ៉ង់, លីប៊ី, ស៊ូដង់, យេម៉ែន, ប៊ូរុនឌី, គុយបា, ឡាវ, សៀរ៉ាឡេអូន, តូហ្គោ, តួកមេនីស្ថាន និង វ៉េណេស៊ុយអេឡា។

មន្ត្រីអាមេរិកបាននិយាយថា ការផ្អាកនេះធ្វើឡើងបន្ទាប់ពីការវាយប្រហារកាលពីសប្តាហ៍មុននៅទីក្រុងវ៉ាស៊ីនតោនឌីស៊ី ជាកន្លែងដែលបុរសជនជាតិអាហ្វហ្គានីស្ថានម្នាក់ត្រូវបានចាប់ខ្លួនបន្ទាប់ពីបាញ់សមាជិកឆ្មាំជាតិពីរនាក់ ក្នុងនោះមានម្នាក់ស្លាប់ និងម្នាក់ទៀតរងរបួសធ្ងន់។ ហេតុការណ៍នេះ បានបង្កើនការត្រួតពិនិត្យលើជនអន្តោប្រវេសន៍មកពីប្រទេសជាច្រើន ហើយលោកត្រាំ ក្នុងប៉ុន្មានថ្ងៃថ្មីៗនេះបានវាយប្រហារជនអន្តោប្រវេសន៍សូម៉ាលីថាជា «សំរាម» និងបាននិយាយថា «យើងមិនចង់ឲ្យពួកគេនៅក្នុងប្រទេសរបស់យើងទៀតទេ»។

ចាប់តាំងពីត្រឡប់មកកាន់តំណែងវិញកាលពីខែមករា លោកត្រាំបានបង្កើនការអនុវត្តច្បាប់អន្តោប្រវេសន៍ ដោយដាក់ពង្រាយភ្នាក់ងារសហព័ន្ធទៅកាន់ទីក្រុងធំៗ និងរឹតត្បិតយ៉ាងខ្លាំងនូវសិទ្ធិជ្រកកោននៅព្រំដែនសហរដ្ឋអាមេរិក-ម៉ិកស៊ិក។

សេចក្ដីណែនាំថ្មីនេះបញ្ជាឲ្យមានការផ្អាកទាំងស្រុងលើករណីដែលកំពុងរង់ចាំ និងតម្រូវឲ្យអ្នកដាក់ពាក្យទាំងអស់មកពី១៩ប្រទេសនេះត្រូវឆ្លងកាត់ «ការត្រួតពិនិត្យឡើងវិញយ៉ាងហ្មត់ចត់» ដែលអាចរួមបញ្ចូលទាំងការសម្ភាសន៍បន្ថែម។ មេធាវីអន្តោប្រវេសន៍និយាយថា ពួកគេបានទទួលរបាយការណ៍រួចហើយអំពីការលុបចោលពិធីស្បថចូលសញ្ជាតិ ការសម្ភាសន៍សញ្ជាតិ និងការណាត់ជួបទទួលយកប័ណ្ណ Green Card៕

ប្រែសម្រួល៖ ឈាង

Related Topics:សហរដ្ឋអាមេរិក