ព័ត៌មានអន្ដរជាតិ

UN ព្រមានថា ភាពអត់ឃ្លានកើតលើមនុស្សប្រមាណ៤៥លាននាក់ ដោយឥទ្ធិពលនៃសង្រ្គាមអាមេរិក-អ៊ីរ៉ង់

បានផុស

១ ថ្ងៃ មុន

នៅ

ថ្ងៃសៅរ៍ ៦ មិថុនា ២០២៦

ដោយ

កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ(UN) បានចេញការព្រមានថា ជម្លោះដែលកំពុងបន្តអូសបន្លាយរវាងសហរដ្ឋអាមេរិកនិងអ៊ីរ៉ង់នឹងជះឥទ្ធិពលធ្វើឱ្យមនុស្សរាប់លាននាក់ប្រឈមនឹងហានិភ័យនៃភាពអត់ឃ្លាន។

នៅក្នុងការវិភាគមួយចេញផ្សាយនៅថ្ងៃសុក្រ WFP បានឲ្យដឹងថា ការបន្តនៃផលប៉ះពាល់នៃជម្លោះទៅលើតម្លៃប្រេងមានផលវិបាកយ៉ាងអាក្រក់សម្រាប់សន្តិសុខស្បៀងអាហារពិភពលោក។ នេះបើយោងតាមការចុះផ្សាយរបស់សារព័ត៌មាន Al Jazeera នៅថ្ងៃទី៥ ខែមិថុនា ឆ្នាំ២០២៦ ។

ប្រធានអង្គការសហប្រជាជាតិ លោក António Guterres ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារនេះ បានអះអាងថា ការប៉ាន់ស្មានបានធ្វើឡើងក្នុងខែមីនា ដោយព្រមានថា មនុស្ស ៤៥លាននាក់នឹងធ្លាក់ចូលទៅភាពខ្វះខាតស្បៀងអាហារធ្ងន់ធ្ងរ ប្រសិនបើតម្លៃប្រេងនៅតែមានតម្លៃ ១០០ដុល្លារក្នុងមួយបារ៉ែល ដល់ចុងខែមិថុនា។

អង្គការស្បៀងអាហារពិភពលោក (WFP) រកឃើញថា៖ « ខណៈតម្លៃស្បៀងអាហារទូទាំងពិភពលោក ដូចដែលវាស់វែងដោយសន្ទស្សន៍តម្លៃរបស់អង្គការស្បៀងអាហារនិងកសិកម្ម (FAO) ទើបតែមានការកើនឡើងបន្តិចបន្តួចប៉ុណ្ណោះរហូតមកដល់ពេលនេះ តែការកើនឡើងនៃតម្លៃស្បៀងអាហារគួរឱ្យកត់សម្គាល់ គឺនៅក្នុងប្រទេសងាយរងគ្រោះ»។

អង្គការបន្ថែមថា៖ « ការរកឃើញបង្ហាញថា វិបត្តិដែលកើតចេញ ពីការបិទ (ច្រកហ័រមូស) កំពុងបង្កើតផលប៉ះពាល់យ៉ាងខ្លាំង ជាពិសេសតាមរយៈប្រេងឥន្ធនៈ តម្លៃស្បៀងអាហារ វិបត្តិប្រាក់ចំណូល និងការរំខានពាណិជ្ជកម្ម។ ពេលកត្តាទាំងនេះមានអន្តរកម្មជាមួយនឹងភាពងាយរងគ្រោះដែលមានស្រាប់ ពួកវានឹងក្លាយជាផលប៉ះពាល់ដែលអាចមើលឃើញលើសន្តិសុខស្បៀងអាហារ និងជីវភាពរស់នៅរបស់ពលរដ្ឋ»។

សង្គ្រាមអ៊ីរ៉ង់ បានផ្ទុះឡើងនៅថ្ងៃទី២៨ ខែកុម្ភៈ ធ្វើឱ្យទីផ្សារប្រេងរង្គោះរង្គើ ខណៈការបិទច្រកសមុទ្រហ័រមូសជាបន្តបន្ទាប់ បានបញ្ឈប់ដំណើរកប៉ាល់ដឹកប្រេងទៅកាន់សកលលោក។

ក្នុងចំណោមការចរចាដោយប្រយោលដែលកំពុងបន្តរវាងសហរដ្ឋអាមេរិកនិងអ៊ីរ៉ង់ ការធានាការបញ្ចប់ជម្លោះបានជាប់គាំង ដោយគ្មានទីបញ្ចប់ច្បាស់លាស់។

របាយការណ៍នេះរកឃើញថា គ្រួសារនៅក្នុងប្រទេសអាហ្វហ្គានីស្ថាន សូម៉ាលី និងស្រីលង្កា ស្ថិតក្នុងចំណោមគ្រួសារដែលរងផលប៉ះពាល់យ៉ាងធ្ងន់ធ្ងរបំផុតនិងប្រឈមនឹងសម្ពាធ ដោយសារតែថ្លៃប្រេងឥន្ធនៈខ្ពស់ ការកើនឡើងនៃតម្លៃអាហារ ការខាតបង់ប្រាក់ចំណូល និងការរំខានដល់ពាណិជ្ជកម្ម៕

សម្រួល៖ ណឺ មិនា