អំណោយដែលលោក ​Modi ជូន ពូទីន សុទ្ធតែមានអត្ថន័យពិសេស ទាក់ទងនឹងប្រទេស ឥណ្ឌា

អំណោយដែលតំណាងឲ្យសិប្បកម្ម ភូមិសាស្ត្រ និងវប្បធម៌ចម្រុះតែមួយគត់របស់ឥណ្ឌា ត្រូវបានប្រគល់ជូនដោយ នាយករដ្ឋមន្ត្រី Narendra Modi ជូនប្រធានាធិបតីរុស្ស៊ី វ្ល៉ាឌីមៀរ ពូទីន កាលពីថ្ងៃទី ៥ ខែធ្នូ។ អំណោយទាំំងនោះ ​បានតំណាងឲ្យចំណងមិត្តភាពរវាងប្រទេសទាំងពីរ ដូចជាតែខ្មៅ សេះប្រាក់ និងការបកប្រែស្នាដៃបុរាណជាភាសារុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំណោយដំបូង គឺតែខ្មៅ Assam តែនេះត្រូវបានបញ្ជាក់ថា ជាភេសជ្ជៈពិសេសមួយក្នុងតំបន់ក្នុងឆ្នាំ ២០០៧។ វាតំណាងឲ្យដីធ្លី និងវប្បធម៌តាមបណ្តោយទន្លេព្រហ្មបុត្ត ដែលជាទន្លេធំជាងគេទី៩របស់ពិភពលោកតាមបរិមាណ មានប្រវែងប្រហែល ២,៩០០ គីឡូម៉ែត្រ ដែលមានប្រភពមកពីទីបេ ហូរកាត់ប្រទេសឥណ្ឌា បង់ក្លាដែស និងហូរចូលទៅក្នុងឈូងសមុទ្របេងហ្គាល់។ អំណោយនេះក៏បានរំលឹកពីការរីកចម្រើនអាជីពរបស់លោកម៉ូឌី ពីអ្នកលក់តែនៅឯស្ថានីយ៍រថភ្លើង រហូតដល់ការដឹកនាំប្រទេស។

បន្ទាប់មក គឺឈុតកំសៀវប្រាក់ Murshidabad ដែលឆ្លាក់យ៉ាងស្មុគស្មាញ ឆ្លុះបញ្ចាំងពីប្រពៃណីដ៏យូរអង្វែងនៃការធ្វើលោហៈនៅបេងហ្គាល់។ ឈុតតែក៏តំណាងឲ្យភាពដូចគ្នានៃវប្បធម៌តែរវាងឥណ្ឌា និងរុស្ស៊ី ដែលឆ្លុះបញ្ចាំងពីចំណងមិត្តភាពជិតស្និទ្ធរវាងប្រទេសទាំងពីរ។

សេះប្រាក់ ដែលផលិតដោយដៃនៅរដ្ឋ Maharashtra ដែលជារដ្ឋដែលមានប្រជាជនច្រើនជាងគេទីពីររបស់ប្រទេសឥណ្ឌា តំណាងឲ្យសេចក្តីថ្លៃថ្នូរ និងភាពក្លាហានដែលត្រូវបានប្រារព្ធនៅក្នុងប្រទេសទាំងពីរ។ យោងតាមការិយាល័យនាយករដ្ឋមន្ត្រីឥណ្ឌា សេះនេះក៏តំណាងឲ្យស្មារតីនៃចលនាទៅមុខ និង វឌ្ឍនភាពជាបន្តបន្ទាប់ រវាងប្រទេសទាំងពីរ។

អំណោយមួយទៀតគឺឈុតអុកថ្មម៉ាបដែលមានប្រភពមកពីទីក្រុង Agra ដែលតំណាងឲ្យសិល្បៈនៃការដាក់ថ្ម និងលំនាំតុបតែងដែលជារឿងធម្មតានៅទូទាំងខ្សែក្រវ៉ាត់និយាយភាសាហិណ្ឌូ។ បញ្ជីអំណោយក៏រួមបញ្ចូលទាំងតែ saffron ដែលជាផលិតផលត្រូវបានចាត់ទុកថាជា «មាសក្រហម» និងដាំដុះនៅក្នុងស្រុកនៅក្នុងខ្ពង់រាប Kashmir Valley។

ចំពោះអំណោយចុងក្រោយនោះគឺជាសៀវភៅ Bhagavad Gita ដែលបានបកប្រែជាភាសារុស្ស៊ី និងមានអត្ថបទសំស្ក្រឹតចំនួន ៧០០ ខគម្ពីរពីមហាភារត (មួយក្នុងចំណោមវីរភាពសំស្ក្រឹតដ៏អស្ចារ្យបំផុតពីររបស់ប្រទេសឥណ្ឌាបុរាណ)។ វាកត់ត្រាការបង្រៀនរបស់ព្រះអម្ចាស់ Krishna ដល់ Arjuna ក្នុងកាតព្វកិច្ច និងការរំដោះខាងវិញ្ញាណ។ យោងតាមការិយាល័យប្រធានាធិបតីឥណ្ឌា អត្ថបទនេះតំណាងឲ្យប្រាជ្ញាដ៏អស់កល្បជានិច្ចលើការរស់នៅប្រកបដោយសីលធម៌ ការគ្រប់គ្រងចិត្ត និងសន្តិភាពខាងក្នុង។

គួរររម្លឹកឡើងវិញថា ប្រធានាធិបតី វ្ល៉ាឌីមៀ ពូទីន នឹងបំពេញទស្សនកិច្ចផ្លូវរដ្ឋទៅកាន់ប្រទេសឥណ្ឌា នៅថ្ងៃទី៤-៥ ខែធ្នូ ដែលជាដំណើរទស្សនកិច្ចលើកដំបូងរបស់មេដឹកនាំរុស្ស៊ី មកកាន់ប្រទេសអាស៊ីខាងត្បូងនេះ ក្នុងរយៈពេល៤ឆ្នាំ។ ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការលើការងារ សុខភាព ការដឹកជញ្ជូនតាមសមុទ្រ និងសារធាតុគីមី។ មេដឹកនាំទាំងពីរបានព្រមព្រៀងគ្នារៀបចំរចនាសម្ព័ន្ធទំនាក់ទំនងការពារជាតិឡើងវិញ ស្របតាមគោលដៅរបស់ទីក្រុងញូវដេលី ក្នុងការពឹងផ្អែកលើខ្លួនឯង តាមរយៈការស្រាវជ្រាវ ការអភិវឌ្ឍ និងការផលិតអាវុធទំនើបៗរួមគ្នា៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មីន អ៊ុងឡាំង ថា យោធានឹងស្ថិតក្នុងឆាកនយោបាយ ដរាបណាក្រុមប្រដាប់អាវុធបាត់ខ្លួន