ព័ត៌មានអន្ដរជាតិ

កូរ៉េខាងត្បូង ជំរុញឲ្យកម្ពុជា-ថៃបន្តកិច្ចសន្ទនា ខណៈតួលេខអ្នកស្លាប់នៅព្រំដែនបន្តកើនឡើង

បានផុស

៦ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

Chheang

នៅថ្ងៃព្រហស្បតិ៍ទី១១ខែធ្នូឆ្នាំ២០២៥នេះ ក្រសួងការបរទេសកូរ៉េខាងត្បូង បានអំពាវនាវឲ្យប្រទេសកម្ពុជា និងថៃ ស្វែងរកដំណោះស្រាយដោយសន្តិវិធី និងកិច្ចចរចា ចំពោះជម្លោះព្រំដែនដែលកំពុងកើនឡើង ដោយជំរុញឲ្យភាគីទាំងពីរជៀសវាងការបង្ហូរឈាមបន្ថែមទៀត ខណៈបច្ចុប្បន្នតួលេខអ្នកស្លាប់មិនក្រោមពី២០នាក់នោះឡើយ។

*ជនភៀសសឹកកម្ពុជានៅខេត្តឧត្ដរមានជ័យ (រូបថត៖ AP)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Korea Times សេចក្ដីថ្លែងការណ៍របស់ក្រសួងការបរទេស បានលើកឡើងថា «រដ្ឋាភិបាលរបស់យើងជំរុញឲ្យកម្ពុជា និងថៃដោះស្រាយវិបត្តិដោយសន្តិវិធី តាមរយៈកិច្ចសន្ទនាជាបន្ទាន់» ដោយលើកឡើងពីកាតព្វកិច្ចក្រោមច្បាប់អន្តរជាតិ និងសេចក្ដីប្រកាសរួមដែលប្រទេសជិតខាងទាំងពីរបានចុះហត្ថលេខាពីខែតុលា ក្រោមសក្ខីកម្មរបស់ប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម។

ក្រសួងបានបន្ថែមថា ខ្លួន«មានការព្រួយបារម្ភយ៉ាងខ្លាំង» ចំពោះការកើនឡើងនៃអំពើហិង្សានេះ ហើយបានសម្តែងការចូលរួមរំលែកទុក្ខចំពោះជនរងគ្រោះ និងក្រុមគ្រួសាររបស់ពួកគេ។

សូមជម្រាបថា យោងតាមរបាយការណ៍របស់ AFP ប្រជាជនមិនតិចជាងកន្លះលាននាក់នោះទេទាំងនៅកម្ពុជា និងថៃ បានបន្តភៀសខ្លួនទៅកាន់វត្តអារាម សាលារៀន និងជម្រកបណ្តោះអាសន្ន ព្រោះតែជម្លោះព្រំដែនប្រវែងជាង៨០០គីឡូម៉ែត្រ ដែលដោះស្រាយមិនចេះដាច់ស្រេចអស់រយៈពេលជាច្រើនទសវត្សរ៍មកនេះ។

អាមេរិក និងម៉ាឡេស៊ីដែលជាប្រធានអាស៊ាន បានជួយសម្រុះសម្រួលបទឈប់បាញ់កាលពីខែកក្កដា បន្ទាប់មកមានសេចក្តីថ្លែងការណ៍រួមមួយកាលពីខែតុលា ក្រោមវត្តមានរបស់លោកត្រាំ។ យ៉ាងណាមិញ ប្រទេសថៃបានផ្អាកកិច្ចព្រមព្រៀងនេះជាឯកតោភាគីនៅខែបន្ទាប់៕

ប្រែសម្រួល៖ ឈាង