អាជ្ញាធរខេត្តកោះកុង បណ្តុះបណ្តាល​អាជ្ញាធរ​មន្រ្តី​កម្លាំង​ប្រដាប់​អាវុធ​អំពី​ការ​ទប់ស្កាត់​ព័ត៌មាន​ក្លែងក្លាយ

កោះកុង ៖ អាជ្ញាធរខេត្តកោះកុង បាន​បើក​វគ្គ​បណ្តុះបណ្តាល​មួយ​ពី​ការ​ទប់ស្កាត់ព័ត៌មានក្លែងក្លាយ ដល់អាជ្ញាធរ មន្រ្តីរាជការ និងកងកម្លាំងប្រដាប់អាវុធ គ្រា​ព័ត៌មានមិនពិតតែងកើតមានក្នុងមូលដ្ឋានគួរឱ្យកត់សម្គាល់។

បញ្ហា​ដំណឹង ឬព័ត៌មានក្លែងក្លាយ ត្រូវបានរដ្ឋបាលខេត្ត និងមន្ទីរព័ត៌មានខេត្តកោះកុង លើកយកមកបង្ហាញជាប្រធានបទសំខាន់ចែករំលែកជូនដល់អាជ្ញាធរ មន្រ្តីរាជការ និងកងកម្លាំងប្រដាប់អាវុធទូទាំងខេត្ត បានយល់ដឹង និង​រួម​គ្នា​ទប់​ស្កាត់​បន្សា​ឱ្យ​បាន​ទាន់​ពេល​វេលាបំផុត។

លោកស្រី ឈី វ៉ា អភិបាល​ខេត្តកោះកុង នៅថ្ងៃទី១២ ខែធ្នូ ឆ្នាំ២០២៥ បានស្នើដល់អាជ្ញាធរ មន្រ្តីរាជការ និងកងកម្លាំងប្រដាប់អាវុធគ្រប់ជាន់ថ្នាក់ក្នុងខេត្ត ត្រូវប្រុងប្រយ័ត្ន​អំពីព័ត៌មានក្លែងក្លាយដែលកំពុងកើតមាននានាពេលបច្ចុប្បន្ន ជាពិសេស​ខណៈ​មានបញ្ហាព្រំដែនជាមួយនឹងថៃ។

លោកស្រីអភិបាលខេត្ត រំលេចទៀតដែរថា ព័ត៌មានក្លែងក្លាយ បានកំពុងធ្វើឱ្យ​ប៉ះពាល់​សន្តិសុខ​សណ្តាប់​ធ្នាប់ និងការចលាចលក្នុងសង្គម ព្រោះតែការ​ទទួលបាននូវព័ត៌មានមិនពិតប្រាកដតាមរយៈការបង្ហោះរបស់បុគ្គលមួយចំនួនលើបណ្តាញសង្គមនានាដែលកំពុងពេញនិយម។

ដូច្នេះលោកស្រី ប្រាប់ដល់អាជ្ញាធរ មន្រ្តីមន្ទីរអង្គភាព និងសមត្ថកិច្ច រួមគ្នាតាមដានទប់ស្កាត់ និងតបបំភ្លឺបានទាន់ពេលវេលាតាមបែបផែននីមួយៗ ដើម្បីបន្សានូវព័ត៌មានទាំងនោះជំនួសមកវិញព័ត៌មានពិតប្រាកដប្រកបដោយទំនុកចិត្តខ្ពស់ជូនសាធារណជន។

ដោយឡែកលោក ឈិត រតនៈ អភិបាលរអ្នកនាំពាក្យសាលាខេត្តកោះកុង ចាត់ទុកបណ្តាញព័ត៌មានសង្គមបច្ចុប្បន្នថា ពិតជាបានរួមចំណែកយ៉ាងខ្លាំងក្លាបំផុត ក្នុងការផ្សព្វផ្សាយ និងចែករំលែកនូវព័ត៌មានទៅកាន់ពិភពលោក។ ប៉ុន្តែទោះយ៉ាងណា លោកចាត់ឱ្យមានវិធានការទប់ស្កាត់លំហូព័ត៌មានក្លែងកា្លយអោយបានឆាប់រហ័សរ និងពង្រឹងសមត្ថភាពមន្រ្តីបច្ចេកវិទ្យាកាន់តែទូលំទូលាយបន្ថែមលើការឆ្លើយតបបកស្រាយព័ត៌មានគ្រប់ទម្រង់ទាំងឡាយ។

លោក ឈិត រតនៈ អ្នកនាំពាក្យសាលាខេត្តកោះកុង បានហៅព័ត៌មានក្លែងក្លាយថា ងាយបង្កគ្រោះថ្នាក់ខ្លាំង ដោយសារប្រជាពលរដ្ឋមានទំនោរចាប់អារម្មណ៍លើតែព័ត៌មានណាដែលគ្មានប្រភពច្បាស់លាស់គ្រប់ជ្រុងជ្រោយ និងបែបអវិជ្ជមាន។

ទន្ទឹមនោះ​ការ​ប្រើប្រាស់ប្រព័ន្ធAIដែលជាចាំបាច់យកចិត្តទុកដាក់ខ្ពស់លើវិធានការផ្សេងៗ ករណីរកឃើញថាមានការក្លែងបន្លំជាសម្លេង សំណេ ឬរូបភាពបុគ្គលណាម្នាក់។

សម្រាប់លោក មុំ ម៉ាលិកា ប្រធានមន្ទីរព័ត៌មានខេត្តកោះកុង វិញ បានឱ្យដឹងថា មហាជនបានទទួលព័ត៌មានលឿនបំផុត តាមរយៈការប្រើប្រាស់smart phone ដែលបានផ្តល់ផលប្រយោជន៍នានាជូនមនុស្សទូទៅគ្រប់ស្រទាប់វណ្ណៈ។ចំណុចនេះ មន្ទីរបានសហការជាមួយរដ្ឋបាលខេត្ត រដ្ឋបាលក្រុងស្រុក និងមន្ទីរពាក់ព័ន្ធនានាលើការបំភ្លឺបកស្រាយ ករណីមានការលេចធ្លាយព័ត៌មានក្លែងក្លាយកើតមាន។

លោក មុំ ម៉ាលិកា ក៏បានរំលេចពីក្រមសិលធម៌វិជ្ជាជីវៈរបស់អ្នកសារព័ត៌មាន និងអ្នកផលិតមាតិកាបណ្តាញសង្គម ដោយផ្អែកទៅលើច្បាប់ពាក់ព័ន្ធលើវិស័យព័ត៌មាន៕

អត្ថបទ ៖ សិរីវឌ្ឍនៈ