ប្រាក់រង្វាន់ក្រុមជើងឯក World Cup 2026 កើនឡើងលើសឆ្នាំ ២០២២ ជិត ១០ លានដុល្លារ

សហព័ន្ធបាល់ទាត់អន្តរជាតិ (FIFA) បានប្រកាសជាផ្លូវការអំពីហិរញ្ញវត្ថុត្រៀមចំណាយនៅព្រឹត្តិការណ៍កីឡាបាល់ទាត់ជើងឯកពិភពលោក (World Cup 2026) ខណៈប្រាក់រង្វាន់សម្រាប់ក្រុមម្ចាស់ជើងឯក ត្រូវបានបង្កើនលើសឆ្នាំ ២០២២ ដល់ជិត ១០ លានដុល្លារអាមេរិក។

នៅព្រឹត្តិការណ៍បាល់ទាត់ជើងឯកពិភពលោក ២០២៦ ក្រុមជើងឯកនឹងទទួលបានប្រាក់រង្វាន់ក្នុងកំណត់ត្រាមិនធ្លាប់មាន រហូតដល់ទៅ ៥០ លានដុល្លារអាមេរិក។ FIFA គ្រោងប្រើប្រាស់កញ្ចប់ថវិការសរុបចំនួន ៧២៧ លានដុល្លារអាមេរិក ដើម្បីចំណាយនៅក្នុងព្រឹ្តត្តិការណ៍ទាំងមូល។

ក្នុងនោះទឹកប្រាក់ចំនួន ៦៥៥ លានដុល្លារ នឹងត្រូវប្រើប្រាស់សម្រាប់ចែកចាយទៅកាន់ក្រុមនានា ដែលបានឡើងមកកាន់ជុំចុងក្រោយ។ ទឹកប្រាក់ ដែលជម្រើសជាតិនីមួយៗទទួលបាន គឺអាស្រ័យលើលទ្ធផលជាក់ស្តែង ដោយក្រុមដែលធ្លាក់នៅវគ្គក្នុងពូល នឹងទទួលបាន ៩ លានដុល្លារអាមេរិក ខណៈក្រុមចាញ់នៅវគ្គផ្តាច់ព្រ័ត្រ មានន័យ ថាក្រុមជើងឯករង នឹងទទួលបាន ៣៣ លានដុល្លារអាមេរិក ហើយក្រុមជើងឯក នឹងទទួលបានប្រាក់រង្វាន់ ៥០ លានដុល្លារអាមេរិក។

រម្លឹកទៅកាន់ឆ្នាំ ២០១៨ នៅពេល បារាំង ឈ្នះជើងឯកបាល់ទាត់ពិភពលោក គឺពួកគេទទួលបានប្រាក់រង្វាន់ចំនួន ៣៨ លានដុល្លារអាមេរិក។ ចំណែក អាហ្សង់ទីន វិញ ទទួលបានប្រាក់រង្វាន់ចំនួន ៤២ លានដុល្លារអាមេរិក នៅពេលពួកគេឈ្នះជើងឯកបាល់ទាត់ជើងឯកពិភពលោក ២០២២។ ដូច្នេះ ប្រាក់រង្វាន់នៅឆ្នាំ ២០២៦ នឹងក្លាយកំណត់ត្រាថ្មីមួយ ដែលជាចំនួនប្រាក់រង្វាន់សម្រាប់ក្រុមជើងឯកច្រើនបំផុតក្នុងប្រវត្តិសាស្ត្របាល់ទាត់ជើងឯកពិភពលោក៕

ប្រែសម្រួល៖ សេម កុសល
ប្រភព៖ ESPN