កីឡា

World Cup ឆ្នាំ ២០២៦ នឹងចំណាយអស់ជាង ១៣ប៊ីលានដុល្លារអាមេរិក

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

សហព័ន្ធកីឡាបាល់ទាត់អន្តរជាតិ (FIFA) គ្រោងចំណាយថវិកាអស់ប្រមាណ ១៣.៩ ប៊ីលានដុល្លារអាមេរិកសម្រាប់រៀបចំការប្រកួតកីឡាបាល់ទាត់ជើងឯកពិភពលោក FIFA World Cup នៅសហរដ្ឋអាមេរិក កាណាដា និង ម៉ិកស៊ិក ចាប់ពីថ្ងៃទី១១ ខែមិថុនា ដល់ ថ្ងៃទី១៩ ខែកក្កដា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទឹកប្រាក់ជិត ១៤ ប៊ីលានដុល្លារអាមេរិក ចំណាយលើការរៀបចំព្រឹត្តិការណ៍បាល់ទាត់ពិភពលោក ឆ្នាំ ២០២៦ ទាំងមូល ដែលនឹងក្លាយជាការចំណាយច្រើនបំផុតមួយនៅក្នុងប្រវត្តិសាស្ត្ររបស់ខ្លួន។ ទី១. ចំនួន ៧.៥ ប៊ីលានដុល្លារអាមេរិក ចំណាយាលើវិស័យទេសចរណ៍ មានដូចជា សណ្ឋាគារ អាហារ ការដឹកជញ្ជូន និងការកម្សាន្តដែលនឹងមានភ្ញៀវអន្តរជាតិជាច្រើន។

ទី២. ថវិកា ៣.៨ ប៊ីលានដុល្លារអាមេរិក ចំណាយលើការរៀបចំក្នុងនោះ តម្លៃប្រតិបត្តិការ ៣០%, ប្រាក់រង្វាន់ ២៧ %, សេវាកម្មក្រុមចូលរួមប្រកួត ២២% និងចំណាយលើទីផ្សារ និងរដ្ឋបាល។

ជាក់ស្តែង ក្រុមទាំង ៤៨ ទទួលបានប្រាក់ឧបត្ថម្ភចំនួន ១២.៥ លានដុល្លារ គឺ ១០ លានដុល្លារសម្រាប់ការទទួលបានកៅអីទៅជុំចុងក្រោយ និង ២.៥ លានដុល្លារសម្រាប់ការត្រៀមខ្លួន។

ជាមួយគ្នានេះ ក្រុមជើងឯកទទួលបានប្រាក់រង្វាន់ ៥០ លានដុល្លារ ក្រុមលេខ២ ទទួលបាន ៣៣ លានដុល្លារ ក្រុមលេខ ៣ ទទួលបាន ២៩ លានដុល្លារ ក្រុមលេខ ៤ ទទួលបាន ២៧ លានដុល្លារ ក្រុមពីលេខ ៥ ដល់ លេខ ៨ ទទួលបាន ១៩លានដុល្លារ ក្រុមពីលេខ ៩ ដល់ លេខ ១៦ ទទួលបាន ១៥ លានដុល្លារ ក្រុមពីលេខ ១៧ ដល់លេខ ៣២ ទទួលបាន ១១ លានដុល្លារ និងក្រុមពីលេខ ៣២ ដល់ ៤៨ ទទួលបាន ៩លានដុល្លារ។

ប្រការនេះបើនិយាយតែ ក្រុមជើងឯកគឺ ទទួលបានប្រាក់សរុបចំនួន ៦២.៥លានដុល្លារ ក្នុងនោះ ប្រាក់រង្វាន់ជើងឯក ៥០លានដុល្លារ និងប្រាក់ឧបត្ថម្ភដែលទទួលបានកៅអីជុំចុងក្រោយ ១២.៥លានដុល្លារ។

ទី៣. ថវិកា ១.៨ ប៊ីលានដុល្លារចំណាយលើទីក្រុងដែលទទួលរៀបចំធ្វើម្ចាស់ផ្ទះសម្រាប់ការប្រកួតមានដូចជា សេវាកម្មទីក្រុង ចំណាយលើបុគ្គលិកបម្រើការងារ និងប្រតិបត្តិការដឹកជញ្ជូននៅទីក្រុងទាំង ១៦ ដែលទទួលធ្វើម្ចាស់ផ្ទះ។

ទី៤. ចំណាយលើគម្រោងអភិវឌ្ឍហេដ្ឋារចនាសម្ព័ន្ធចំនួន ៩០០ លានដុល្លារអាមេរិក មានដូចជា កែលំកីឡដ្ឋាន ទីលានប្រកួត ទីលានហ្វឹកហាត់ និងការកែលំអសេវាដឹកជញ្ជូនសាធានរណៈ។

បើទោះបីជាចំណាយច្រើន ប៉ុន្តែចំណូលក៏ច្រើនដែរ។ FIFA រំពឹងរកបានចំណូលចន្លោះពី ១១ ទៅ ១៣ ប៊ីលានដុល្លារអាមេរិក ដែលនឹងបំបែកកំណត់ត្រាប្រាក់ចំណូលច្រើនបំផុតរបស់ខ្លួន។ ប្រាក់ចំណូលចន្លោះពី ៣.៨ ទៅ ៣.៩ ប៊ីលានដុល្លារទទួលបានពីការលក់សិទ្ធិផ្សព្វផ្សាយទូទាំងពិភពលោក។ ការលក់សំបុត្រចូលទស្សនាប្រមាណ ៣ ប៊ីលានដុល្លារ និងចំនួន ២.៤ ទៅ ៣ ប៊ីលានដុល្លារ ទៀត ទទួលបានដៃគូឧបត្ថម្ភ។

សរុបទៅត្រឹមតែមួយឆ្នាំ ២០២៦ គឺ ទទួលបានប្រាក់ចំណូលប្រមាណ ៨.៩ ប៊ីលានដុល្លារ ប៉ុន្តែគិតចំណូលចាប់ពីឆ្នាំ ២០២៣ ដល់ ២០២៦ គឺទទួលបានប្រមាណ ១៣.១ ប៊ីលានដុល្លារអាមេរិក ដែលកើនឡើងរហូតដល់ ៧៣ % បើប្រៀបធៀបនឹង World Cup ឆ្នាំ ២០២២ ដែលគិតចំណូលរកបានពីឆ្នាំ ២០១៩ ដល់ ២០២២៕