តើចិននិងរុស្ស៊ី មានទំហំពាណិជ្ជកម្មជាមួយអ៊ីរ៉ង់ខ្លាំងកម្រិតណា?

នៅថ្ងៃចន្ទទី១២ខែមករាឆ្នាំ២០២៦ (ពេលវេលានៅអាមេរិក) ប្រមុខរដ្ឋាភិបាលទីក្រុងវ៉ាស៊ីនតោនលោក ដូណាល់ ត្រាំ បានប្រកាសយកពន្ធ២៥% លើទំនិញនាំចូលរបស់ប្រទេសទាំងឡាយណាដែលរកស៊ីជាមួយអ៊ីរ៉ង់ ខណៈប្រទេសនេះកំពុងញាំញីដោយបាតុកម្ម និងលេចចេញសញ្ញានៃអន្តរាគមន៍របស់អាមេរិកទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចរបស់ប្រធានាធិបតីអាមេរិក ត្រូវគេដឹងយ៉ាងច្បាស់ថា មានគោលដៅដាក់សម្ពាធលើប្រទេសចិននិងរុស្ស៊ី ដែលជាដៃគូពាណិជ្ជកម្មយ៉ាងស្អិតរមួតជាមួយអ៊ីរ៉ង់។

ដូច្នេះតើចិននិងរុស្ស៊ី មានទំហំពាណិជ្ជកម្មជាមួយអ៊ីរ៉ង់ខ្លាំងកម្រិតណា?

១. ចិននិងអ៊ីរ៉ង់ គឺដៃគូយុទ្ធសាស្ត្រធំបំផុត

យោងតាមគេហទំព័រ Worlometer, ចិនគឺជា «ខ្សែជីវិត» សេដ្ឋកិច្ចដ៏សំខាន់បំផុតរបស់អ៊ីរ៉ង់។ ផ្អែកលើទិន្នន័យផ្លូវការ ក្នុងមួយឆ្នាំៗ ទំហំពាណិជ្ជកម្មរវាងប្រទេសទាំងពីរ មានតម្លៃប្រហែល ១៥ទៅ២០ពាន់លានដុល្លារ។ យ៉ាងណា តួលេខពិតប្រាកដអាចខ្ពស់ជាងនេះ ដោយសារមានការជួញដូរប្រេងក្រៅផ្លូវការ។

ចិនបាននាំចូលប្រេងពីអ៊ីរ៉ង់ប្រហែល ១ លានបារ៉ែលក្នុងមួយថ្ងៃ ទោះបីជាមានទណ្ឌកម្មពីអាមេរិកក៏ដោយ។ លើសពីនេះចិននិងអ៊ីរ៉ង់មានកិច្ចព្រមព្រៀងវិនិយោគរយៈពេលវែងតម្លៃ ៤០០ ពាន់លានដុល្លារ លើវិស័យថាមពល ហេដ្ឋារចនាសម្ព័ន្ធ និងសន្តិសុខ។

២. រុស្ស៊ីនិងអ៊ីរ៉ង់ មានទំនាក់ទំនងស្អិតរមួតលើវិស័យយោធានិងថាមពល

ទំនាក់ទំនងរវាងប្រទេសទាំងពីរ បានប្រែក្លាយពីមិត្តភាពធម្មតា ទៅជាសម្ព័ន្ធភាពយុទ្ធសាស្ត្រស៊ីជម្រៅបន្ទាប់ពីសង្គ្រាមអ៊ុយក្រែនផ្ទុះឡើង។

ទំហំពាណិជ្ជកម្មរុស្ស៊ី-អ៊ីរ៉ង់ មានតម្លៃប្រហែល៤ទៅ៥ពាន់លានដុល្លារអាមេរិកក្នុងមួយឆ្នាំ ប៉ុន្តែមានសន្ទុះកើនឡើងយ៉ាងលឿន។

ចំពោះវិស័យយោធា អ៊ីរ៉ង់ផ្គត់ផ្គង់ដ្រូន Shahed ឲ្យរុស្ស៊ី ចំណែករុស្ស៊ីផ្គត់ផ្គង់យន្តហោះចម្បាំង Su-35 និងបច្ចេកវិទ្យាកម្រិតខ្ពស់ឲ្យអ៊ីរ៉ង់វិញ។

មិនត្រឹមប៉ុណ្ណឹង ប្រទេសទាំងពីរកំពុងសហការគ្នាបង្កើតផ្លូវដឹកជញ្ជូនបញ្ចៀសទណ្ឌកម្ម ដែលតភ្ជាប់ពីកំពង់ផែរុស្ស៊ី កាត់តាមសមុទ្រ Caspian ទៅកាន់មហាសមុទ្រឥណ្ឌា៕

អត្ថបទ៖ សុខ សុវណ្ណ