យុវជនមួយក្រុមបន្លំខ្លួនជាប៉ូលិស អស់លក្ខស្ទាក់ឃាត់ប៉ះចំអធិការរងខណ្ឌពោធិ៍សែនជ័យ

យុវជនមួយក្រុមបន្លំខ្លួនជាសមត្ថកិច្ច ដេញស្ទាក់ពលរដ្ឋពេលរាត្រី ត្រូវបានអស់លក្ខក្រោយស្ទាក់ឃាត់ប៉ះចំលោកអធិការងខណ្ឌត្រូវសមត្ថកិច្ចក្របួចបានទាំងអស់យកមកសួរនាំ។

ហេតុការណ៍នេះបង្កមានការភ្ញាក់ផ្អើលកាលពីវេលាម៉ោង​ ១១យប់ ថ្ងៃទី២១ ខែមករា ឆ្នាំ២០២៦ ស្ថិតនៅចំណុចផ្លូវបំបែកស្តុប២០០៤ កែងមហាវិថីសហព័ន្ធរុស្សី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។

បើតាមប្រភពព័ត៌មានពីលោកអធិការរងខណ្ឌពោធិ៍សែនជ័យ​ បានឲ្យដឹងថា មុនពេលកើតហេតុ គាត់បានជិះម៉ូតូល្បាតនៅក្នុងភូមិសាស្ត្ររបស់គាត់ ដោយស្លៀកពាក់ស៊ីវិល លុះជិះមកដល់ចំណុចកើតហេតុ ក៏មានក្រុមនគរបាលក្លែងក្លាយស្លៀកពាក់ស៊ីវិលចំនួន​ ៤នាក់ ជិះម៉ូតូ៣គ្រឿង ពាក់កាត CID មកឈប់ឃាត់គាត់នៅក្បែរស្តុប២០០៤ កែងមហាវិថីសហព័ន្ធរុស្សី។

លោកអធិការងបានបន្តទៀតថា នៅពេលនោះគាត់បានប្រាប់ទៅកាន់ក្រុមនគរបាលក្លែងក្លាយទាំងនោះថាគាត់ គឺជាអធិការងខណ្ឌពោធិ៍សែនជ័យ តែពួកគេមិនជឿរព្រមទាំងស្រែកសម្លុតគាត់ទៅវិញ ទើបភ្លាមៗនោះក៏មានកម្លាំងសមត្ថកិច្ចក្នុងមូលដ្ឋានបានចុះមកដល់ធ្វើការឃាត់ក្រុមក្លែងក្លាយនោះ យកទៅធ្វើការសាកសួរនាំនៅប៉ុស្តិ៍នគរបាលរដ្ឋបាលកាកាបទី១។

ក្នុងនោះផងដែរក៏មានយុវជនម្នាក់បានបញ្ជាក់ថា កន្លងមកខ្លួនក៏ធ្លាប់ត្រូវបានក្រុមនេះបន្លំធ្វើស៊ីលុយអស់ជាង​ ៣០០ដុល្លារ​។

បច្ចុប្បន្ន​ក្រុមនគរបាលក្លែងក្លាយដែលមានពាក់កាត ព្រហ្មទណ្ឌ (CID)​ ឬគេហៅថាកូនខ្លា ឬប៉ូលីសជ័រខាងលើ ត្រូវបានសមត្ថកិច្ចធ្វើការសាកសួរនាំ និង អនុវត្តបន្តតាមនីតិវិធីច្បាប់៕