អាជ្ញាធរសង្កាត់ចោមចៅទី៣ កាយសំអាតសំរាមតាមប្រឡាយអមផ្លូវជាតិលេខ៤ ដើម្បីសម្រួលប្រព័ន្ធទឹកហូរនៅរដូវវស្សា

កម្លាំងអាជ្ញាធរសង្កាត់ចោមចៅទី៣ បានធ្វើការកាយស្តារសំអាតសំរាម ដែលពលរដ្ឋមួយចំនួនបានបោះចោលគ្មានសណ្តាប់ធ្នាប់ ធ្លាក់ចូលក្នុងប្រឡាយបង្ហូរទឹកនៅអមផ្លូវជាតិលេខ៤ នៅមុខវិទ្យាល័យចំណេះដឹងទូទៅ បច្ចេកទេស ហ៊ុន សែន ជម្ពូវ័ន ស្ថិតក្នុងភូមិ ព្រៃព្រឹងខាងជើង១ សង្កាត់ចោមចៅទី៣ ខណ្ឌពោធិ៍សែនជ័យ កាលពីរសៀលថ្ងៃទី៤ ខែមិថុនា ឆ្នាំ២០២៦។

លោក វ៉ា សាវឿន ចៅសង្កាត់ចោមចៅទី3 បានឲ្យដឹងថា កន្លងទៅរដ្ឋបាលសង្កាត់ក៏បានដាក់ស្លាក ហាមមិនឲ្យពលរដ្ឋបោះសំរាមចោលដោយគ្មានសណ្តាប់ធ្នាប់ បង្កផលប៉ះពាល់ដល់បរិស្ថាន អនាម័យ ជាពិសេសនាំឲ្យស្ទះចរន្តទឹកហូរនារដូវវស្សា ។ តែនៅមានពលរដ្ឋមួយចំនួនតូច ហាក់មិនចេះជួយថែរក្សាបរិស្ថាន ដោយបន្តបោះសំរាមចោលធ្វើឲ្យសំរាមទាំងនោះធ្លាក់ចូលប្រឡាយទឹក បង្កផលប៉ះពាល់ដល់ចរន្តទឹកហូរ ទើបនៅរសៀលថ្ងៃទី៤ ខែមិថុនា ឆ្នាំ២០២៦នេះ លោកបាន ដឹកនាំក្រុមការងារសង្កាត់ និង ប្រជាការពារសង្កាត់ សហការជាមួយ និងលោកមេភូមិ ព្រៃព្រឹងខាងជើង ២ ចុះកាយសំអាតយកសំរាមចេញពីក្នុងប្រឡាយ ដើម្បីសម្រួលចរន្តទឹកហូរបានលឿនបញ្ចៀសការជន់លិច ដោយទឹកភ្លៀងនារដូវវស្សា។

ចំពោះសំរាមដែលកាយចេញពីប្រឡាយលូ អាជ្ញាធរនឹងទាក់ទងទៅរថយន្តប្រមូលសំរាម មកយកទៅចាក់ចោល។ ជាមួយគ្នានោះ អាជ្ញាធរសំណូមពរដល់ពលរដ្ឋទាំងអស់មេត្តាជួយទុកដាក់សំរាមឲ្យបានត្រឹមត្រូវ ដើម្បីអនាម័យ សណ្តាប់ធ្នាប់ សោភ័ណភាពទីក្រុងទាំងអស់គ្នា៕ អត្ថបទ៖សុខា