រដ្ឋ អនុញ្ញាតឱ្យវិស័យឯកជន វិនិយោគកសិដ្ឋានចិញ្ចឹម​គោយកទឹកដោះ លើទំហំដីជិត ៦០០ ហិកតា

រាជរដ្ឋាភិបាលកម្ពុជាបានអនុញ្ញាតឱ្យប្រើប្រាស់ដីទំហំ ៥៩២ ហិកតា ​នៅក្នុង​ខេត្ត​កំពង់ស្ពឺ​វិនិយោគលើការដាំស្មៅ ​ដាំពោត និងចិញ្ចឹមគោបង្កាត់ពូជយកទឹកដោះ។

​ការអនុញ្ញាតនេះបានធ្វើឡើងក្នុងកិច្ចប្រជុំអន្តរក្រសួង-ស្ថាប័នដឹកនាំដោយលោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង​ជាប្រធានក្រុមការងារអភិវឌ្ឍ​វិស័យឯកជននៅរសៀលថ្ងៃទី ២១ ខែ មករា ឆ្នាំ ២០២៦។

នៅក្នុងកិ្ចប្រជុំលោកបណ្ឌិតសភាចារ្យ បានគូសរំលេចអំពីសាវតារនៃការស្នើសុំប្រើប្រាស់ដី និងកិច្ចខិតខំប្រឹងប្រែងរបស់ស្ថាប័នពាក់ព័ន្ធ រហូតទទួលបានការឯកភាពពីរាជរដ្ឋាភិបាល ក្នុងការប្រើប្រាស់ដី សម្រាប់អនុវត្តគម្រោងកសិកម្មនេះ។

លោកបណ្ឌិតសភាចារ្យបានស្នើអង្គភាពពាក់ព័ន្ធ និងក្រសួងបរិស្ថាន ធ្វើការគិតគូរលម្អិតអំពីការបំពេញបែបបទ និងនីតិវិធីក្នុងការប្រើប្រាស់ដី ក្នុងទម្រង់កិច្ចសហការរវាង រដ្ឋ ឯកជន និងសហគមន៍ ឱ្យអនុលោមតាមការសម្រេចរបស់រាជរដ្ឋាភិបាល ជាមួយនឹងការធានាឱ្យបាននូវផលជះវិជ្ជមាន ដល់សេដ្ឋកិច្ចកម្ពុជា និងលើកកម្ពស់ជីវភាពរបស់ប្រជាជនក្នុង​សហគមន៍ និងម៉្យាងដើម្បីជំរុញការវិនិយោគ និងបង្កើនខ្សែច្រវាក់ផលិតកម្ម សំដៅផ្គត់ផ្គង់តម្រូវការក្នុងស្រុក ឱ្យបានគ្រប់គ្រាន់ និងមានភាពធន់នឹងកត្តាខាងក្រៅ៕

អត្ថបទ៖សំអឿន