សេដ្ឋកិច្ច

កសិដ្ឋាន គិរីសួគ៌ កំពុងពង្រីកផលិតកម្មទឹកដោះគោ ផ្គត់ផ្គង់តម្រូវការក្នុងស្រុក

បានផុស

៣ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

កសិដ្ឋានគិរីសួគ៌ កំពុងសាងសង់រោងដាក់គោ ២២០ ក្បាល បន្ថែមទៀត ដើម្បីពង្រីកផលិតកម្មទឹកដោះគោ ផ្គត់ផ្គង់ទីផ្សារក្នុងស្រុកដែលកំពុងកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាង ឆែម ភីណា បុគ្គលិកកសិដ្ឋាន គិរីសួគ៌ បានប្រាប់ឱ្យដឹងថា បច្ចុប្បន្ន គិរីសួគ៌ មានគោប្រមាណ ៥០០-៦០០ ក្បាល ដែលអាចបូមទឹកដោះហើយកំពុងសាងសង់រោងដាក់គោបន្ថែមជាង ២០០ ក្បាល បន្ថែមទៀត ដែលនឹងមានផលិតរហូតដល់ ៣ ម៉ឺនលីត្រ ទៅ ៤ ម៉ឺនលីត្រ ក្នុងមួយថ្ងៃ ចាប់ពីឆ្នាំក្រោយទៅ។

អ្នកនាង ឆែម ភីណា បញ្ជាក់ថា៖ «យើងកំពុងតែសាងសង់រោងថ្មី នឹងបន្ថែមគោ ២២០ ក្បាល ដែលនឹងមានសមត្ថភាពផលិតទឹកដោះបាន ៣ ម៉ឺនលីត្រ ទៅ ៤ ម៉ឺនលីត្រ ក្នុងមួយថ្ងៃ»។

លោក ជី សិលា សហស្ថាបនិកកសិដ្ឋានគិរីសួគ៌របស់ក្រុមហ៊ុន Khmer Fresh Milk Co., Ltd ដែលផលិតទឹកដោះគិរីសួគ៌បានឱ្យ «កម្ពុជាថ្មី» ដឹងថា ការផលិតនៅក្នុងកសិដ្ឋានមិនមានអ្វីដែលប្រែប្រួលខ្លាំងនោះទេ ដោយសារតែចំនួនគោដែលមាននៅក្នុងកសិដ្ឋានមានចំនួនកម្រិត ប៉ុន្តែការផលិត គឺអាចមានការកើនឡើងតិចតួចចន្លោះពីប្រមាណ ៥% ទៅ ១០%។

លោក ជី សិលា បន្ថែមថា តម្រូវការទឹកដោះគោស្រស់នៅលើទីផ្សារ គឺនៅតែមានតម្រូវការខ្ពស់ដដែល ដោយសារតែប្រជាពលរដ្ឋមួយចំនួន មានការពហិការមិនប្រើប្រាស់ផលិតផលនាំចូលពីក្នុងប្រទេសថៃ។

ដោយឡែក សម្រាប់ផលិតផលនាំចូលពីប្រទេសដទៃ ក៏នៅមានការនាំចូល ប៉ុន្តែមិនមានការគាំទ្រច្រើនឡើយ ដូច្នេះហើយ ធ្វើឱ្យតម្រូវការទឹកដោះគោស្រស់នៅក្នុងស្រុកមានតម្រូវការច្រើន។

យោងតាមទិន្នន័យឆ្នាំ២០២៥ កម្ពុជា មានកសិដ្ឋានចិញ្ចឹមគោទឹកដោះចំនួន ៤ ដែលអាចផលិតទឹកដោះគោស្រស់បានប្រមាណ ២ម៉ឺនលីត្រ ក្នុងមួយថ្ងៃ ខណៈតម្រូវការក្នុងស្រុកមានរហូតដល់ ១០ម៉ឺនលីត្រ ក្នុងមួយថ្ងៃ៕