ព័ត៌មានអន្ដរជាតិ

ទារកនៅអាមេរិកម្នាក់ស្លាប់ អំឡុងពេលសម្រាលដោយសារឆ្លងរោគពីម្តាយដែលផឹកទឹកដោះឆៅ ពេលពពោះ

បានផុស

៥ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

មន្ត្រីសុខាភិបាលសហរដ្ឋអាមេរិកបានឱ្យដឹងថា ទារកទើបនឹងកើតម្នាក់បានស្លាប់ដោយសារការឆ្លងមេរោគ Listeria ដែលម្តាយរបស់កុមារ ទំនងជាទទួលទានទឹកដោះគោឆៅ អំឡុងពេលមានផ្ទៃពោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយរបស់ ABC News, នៅថ្ងៃទី៥ខែកុម្ភៈ មន្រ្តីនៅរដ្ឋម៉ិកស៊ិក បានព្រមានប្រជាជនជៀសវាងការទទួលទានផលិតផលទឹកដោះគោណា ដែលមិនបានរក្សាទុកដាក់នៅកន្លែងត្រឹមត្រូវ និងការត្រួតពិនិត្យរបស់អាជ្ញាធរ អាចបណ្តាលឱ្យស្លាប់ជាយថាហេតុ។

គួរឱ្យដឹងថា ការលក់ទឹកដោះគោឆៅទទួលបានការចាប់អារម្មណ៍ និងបានកើនឡើងក្នុងប៉ុន្មានឆ្នាំថ្មីៗនេះ នៅសហរដ្ឋអាមេរិក ពិសេសកើនឡើងដោយប្រព័ន្ធផ្សព្វផ្សាយសង្គម និងការគាំទ្រដោយចលនា Make America Healthy Again របស់រដ្ឋមន្ត្រីក្រសួងសុខាភិបាល លោក Robert F. Kennedy Jr ។

មន្ត្រីសុខាភិបាលបានផ្តល់ព័ត៌មានលម្អិតមួយចំនួនពីទារកទើបនឹងកើត ដោយលើកឡើងពីការរឹតបន្តឹងការទទួលទានរបបអាហារ ឯកជនភាពរបស់ពួកគេ។

ខណៈដែលក្រុមអ្នកស៊ើបអង្កេតបាននិយាយថាពួកគេមិនអាចកំណត់ពីមូលហេតុពិតប្រាកដនៃការស្លាប់របស់ទារកនោះបាននៅឡើយ។ ចំណែកលទ្ធភាពដែលអាចកើតឡើង គឺការឆ្លងពីទឹកដោះគោដែលមិនបានពិនិត្យត្រឹមត្រូវ។

មន្ត្រីសុខាភិបាលបន្ថែមទៀតបាននិយាយថា ការសន្និដ្ឋាននោះគឺផ្អែកលើព័ត៌មានដែលប្រមូលបាន ពេលស៊ើបអង្កេត រួមទាំងពេលវេលានៃការឆ្លង និងរបាយការណ៍ គឺម្តាយបានផឹកទឹកដោះគោឆៅអំឡុងពេលមានផ្ទៃពោះ។

គួរបញ្ជាក់ថា ទឹកដោះគោឆៅអាចផ្ទុកមេរោគដែលអាចបង្កជំងឺជាច្រើន រួមទាំងមេរោគ Listeria ផងដែរ។ វាជាប្រភេទបាក់តេរី ដែលអាចបង្កឱ្យរលូតកូន ការសម្រាលកូនមិនគ្រប់ខែ ឬឆ្លងមេរោគដល់ទារកទើបនឹងកើត ទោះបីជាម្តាយមានជំងឺស្រាលក៏ដោយ។

ចំណែកការផលិតទឹកដោះគោតាមរយៈ Pasteurization ជាដំណើរការ កម្តៅទឹកដោះគោទៅឱ្យទៅសីតុណ្ហភាពខ្ពស់ ដើម្បីសម្លាប់មេរោគ វាអាចការពារការឆ្លងមេរោគពី Listeria ក៏ដូចជាប្រភេទបាក់តេរី និងមេរោគផ្សេងទៀតផងដែរ។

រីឯ ទឹកដោះគោឆៅអាចផ្ទុកមេរោគដែលនាំឱ្យមានឆ្លងជំងឺគ្រុនផ្តាសាយបក្សី បាក់តេរី brucella របេង ជាដើម។ អ្នកដែលប្រឈមហ្នឹងការឆ្លងមេរោគទាំងនោះ គឺកុមារតូចៗ មនុស្សចាស់អាយុ ៦៥ ឆ្នាំឡើង និងអ្នកដែលមានប្រព័ន្ធភាពស៊ាំខ្សោយ៕

ប្រែសម្រួល៖ ណឺ មិនា