អនុប្រធានព្រឹទ្ធសភាជំរុញអាជ្ញាធរមូលដ្ឋានបន្តពង្រឹងសណ្តាប់ធ្នាប់សាធារណៈ

លោក ធន់ វឌ្ឍនា អនុប្រធានទី២ព្រឹទ្ធសភា បានលើកទឹកចិត្តដល់អាជ្ញាធរមានសមត្ថកិច្ច ក្នុងភូមិសាស្រ្តខណ្ឌចំការមន ឱ្យបន្តបង្កើនការយកចិត្តទុកដាក់ និងការពង្រឹងទៅលើសណ្ដាប់ធ្នាប់សាធារណនៅតាមមូលដ្ឋានរបស់ខ្លួន ធ្វើយ៉ាងណាធានាឱ្យបាននូវសន្តិសុខ របៀបរៀបរយ និងសុវត្ថិភាពសង្គម។

ការលើកឡើងនេះ បានធ្វើឡើងក្នុងពេលដែលលោក ធន់ វឌ្ឍនា ជួបជាមួយសមាជិកក្រុមប្រឹក្សាសង្កាត់ អាជ្ញាធរមូលដ្ឋាន មកពីសង្កាត់ទាំង៥ ក្នុងខណ្ឌចំការមន កាលពីរសៀលថ្ងៃទី២៩ ខែមករា ឆ្នាំ២០២៦។ ក្នុងពិធីសំណេះសំណាលនោះ លោក ធន់ វឌ្ឍនា បានផ្ដល់យោបល់ឱ្យអាជ្ញាធរខណ្ឌ និងសង្កាត់ បន្តពង្រឹងសណ្តាប់ធ្នាប់សាធារណៈ ថែរក្សាសោភ័ណភាពតាមដងផ្លូវ ក៏ដូចជាការចូលរួមលុបបំបាត់បទល្មើសឆបោកតាមប្រព័ន្ធបច្ចេកវិទ្យា (Online Scams) ជាដើម។

លោក ធន់ វឌ្ឍនា បានផ្តាំផ្ញើដល់សមាជិកក្រុមប្រឹក្សាសង្កាត់ និងមន្ត្រីមូលដ្ឋានទាំងអស់ បន្តយកចិត្តទុកដាក់ តាមដាន និងអនុវត្តនូវការសន្យា ដែលសមាជិកក្រុមប្រឹក្សាសង្កាត់បានសន្យា នាអំឡុងពេលបោះឆ្នោតកន្លងមក ក្នុងការបំពេញការងារជូនប្រជាពលរដ្ឋក្នុងមូលដ្ឋាន។

ដោយភូមិសាស្ត្រខណ្ឌចំការមន គឺជាតំបន់ទេសចរណ៍ដ៏ពេញនិយមរបស់ជនបរទេសមកកម្សាន្ត និងចូលចិត្តរស់នៅច្រើននោះ លោកអនុប្រធានទី២ព្រឹទ្ធសភា ក៏បានជំរុញឱ្យអាជ្ញាធរត្រូវខិតខំប្រឹងប្រែងបង្កភាពងាយស្រួលដល់វិស័យទេសចរណ៍ ជាពិសេសអាជីវកម្មខ្នាតតូចនៅក្នុងមូលដ្ឋានរបស់ខ្លួនផងដែរ៕