រដ្ឋមន្ត្រីការពារជាតិជជែកជាមួយតំណាងព្រឹទ្ធសភា ពាក់ព័ន្ធនឹងសេចក្ដីព្រាងច្បាប់កាតព្វកិច្ចយោធា

នារសៀលថ្ងៃទី១៨ ខែឧសភា ឆ្នាំ២០២៦នេះ លោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាតំណាងរាជរដ្ឋាភិបាល បានជួបប្រជុំជាមួយតំណាងគណៈកម្មការជំនាញនានារបស់ព្រឹទ្ធសភា ដើម្បីពិនិត្យសិក្សាលើសេចក្ដីព្រាងច្បាប់ស្ដីពីកាតព្វកិច្ចយោធា។

គណៈកម្មការព្រឹទ្ធសភាដែលជួបរដ្ឋមន្ត្រីក្រសួងការពារជាតិ ត្រូវបានដឹកនាំដោយលោក នាង ផាត ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែននៃព្រឹទ្ធសភា (គណៈកម្មការទី៤)។ កិច្ចប្រជុំនេះបានធ្វើឡើងតាមស្មារតីសម្រេចរបស់គណៈកម្មាធិការអចិន្ត្រៃយ៍ព្រឹទ្ធសភា ដែលបានប្រគល់សេចក្តីព្រាងច្បាប់ស្តីពីកាតព្វកិច្ចយោធានេះ ទៅគណៈកម្មការទី៤ព្រឹទ្ធសភា ក្នុងការពិនិត្យសិក្សា​ មុននឹងដាក់ឱ្យសម័យប្រជុំពេញអង្គព្រឹទ្ធសភា ពិនិត្យហើយឱ្យយោបល់។

បន្ទាប់ពីការពិនិត្យសិក្សាជាមួយនឹងតំណាងរាជរដ្ឋាភិបាលរួចរាល់ គណៈកម្មការជំនាញព្រឹទ្ធសភា នឹងធ្វើរបាយការណ៍ដាក់ជូនគណៈកម្មាធិការអចិន្ត្រៃយ៍ ក្នុងការសម្រេចដាក់សេចក្ដីព្រាងច្បាប់នេះ ទៅក្នុងរបៀបវារៈសម័យប្រជុំពេញអង្គព្រឹទ្ធសភា នាពេលខាងមុខនេះ។

សេចក្តីព្រាងច្បាប់កាតព្វកិច្ចយោធា មាន៨ជំពូក និង២០មាត្រា ត្រូវ​បានរៀបចំឡើងដោយអនុលោមតាមមាត្រា៤៩ថ្មីនៃរដ្ឋធម្មនុញ្ញ និងគោលនយោបាយរបស់រាជរដ្ឋាភិបាល ក្នុងបំណងពង្រឹងលើវិស័យការពារជាតិ និងការបណ្តុះបណ្តាលយុវជន។ សេចក្តីព្រាងច្បាប់នេះទទួលបានការអនុម័តជាឯកច្ឆន្ទដោយអង្គរដ្ឋសភាដោយសំឡេង១១៤លើ១១៤ កាលពីថ្ងៃ១២ ខែឧសភា។

សេចក្ដីព្រាងច្បាប់ស្ដីពីកាតព្វកិច្ចយោធា នឹងត្រូវបានប្រកាសទុកជាការប្រញាប់ បន្ទាប់ពីការអនុម័តដោយសភា ដោយនៅពេលច្បាប់នេះចូលជាធរមាន កម្ពុជានឹងអនុវត្តកាតព្វកិច្ចយោធា ដោយប្រជាពលរដ្ឋខ្មែរភេទប្រុសអាយុចាប់ពី១៨ឆ្នាំ ដល់២៥ឆ្នាំ ត្រូវទៅហ្វឹកហាត់ជំនាញយោធា រយៈពេល២៤ខែ ខណៈដែលស្ត្រីត្រូវបានអនុវត្តតាមគោលការណ៍ស្ម័គ្រចិត្ត៕