ព័ត៌មានជាតិ

រក្សាប្រពៃណីបុរាណ ៖ ចាប់ត្រីបឹងបង្កោង ទាក់ទាញទេសចរអន្តរជាតិ

បានផុស

៤ ខែ មុន

នៅ

ថ្ងៃអាទិត្យ ៨ កុម្ភៈ ២០២៦

ដោយ

កាលពីព្រឹកថ្ងៃទី ៨ ខែកុម្ភៈ ឆ្នាំ ២០២៦ បរិយាកាសនៅជុំវិញ បឹងបង្កោង ស្ថិតក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប បានក្លាយជាទីប្រជុំដ៏អ៊ូអរ ខណៈប្រជាពលរដ្ឋរាប់ពាន់នាក់ មកពីគ្រប់ទិសទី បានសម្រុកចូលរួមព្រឹត្តិការណ៍ ចុះចាប់ត្រីតាមបែបបុរាណ ដែលជាទំនៀមទម្លាប់បន្សល់ទុកតាំងពីបុរាណកាលមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រឹត្តិការណ៍ចាប់ត្រីនៅបឹងបង្កោង មានលក្ខណៈពិសេសខុសពីការនេសាទធម្មតា ដោយសារតែមាន ច្បាប់សហគមន៍តឹងរ៉ឹង។ ជារៀងរាល់ឆ្នាំ អាជ្ញាធរភូមិ និងគណៈកម្មការវត្ត តែងហាមឃាត់ការនេសាទក្នុងបឹងនេះពេញមួយឆ្នាំ ដើម្បីរក្សាពូជត្រី ហើយអនុញ្ញាតឱ្យចាប់ត្រីបានតែម្តងគត់ក្នុងមួយឆ្នាំ គឺក្នុងខែមាឃ បន្ទាប់ពីប្រមូលផលស្រូវរួច។

សម្រាប់ឧបករណ៍នេសាទ អនុញ្ញាតឱ្យប្រើតែឧបករណ៍បុរាណប៉ុណ្ណោះ ដូចជា អង្គ្រុត ឈ្នាង សំណាញ់ និងត្រក ខណៈឧបករណ៍ឆក់ ឬមធ្យោបាយទំនើបផ្សេងៗ ដែលអាចបំផ្លាញប្រព័ន្ធអេកូឡូស៊ី ត្រូវបានហាមឃាត់យ៉ាងតឹងរ៉ឹង។

ទិដ្ឋភាពនាព្រឹកមិញនេះ មិនត្រឹមតែជាការចុះចាប់ត្រីប៉ុណ្ណោះទេ ប៉ុន្តែថែមទាំងជាពេលវេលា នៃការជួបជុំគ្រួសារ និងការរួមសប្បាយរបស់សហគមន៍។ ជាពិសេស កូនចៅដែលធ្វើការនៅឆ្ងាយ ក៏តែងឆ្លៀតត្រឡប់មកលេងស្រុកកំណើត ដើម្បីចូលរួមក្នុងព្រឹត្តិការណ៍នេះផងដែរ។

គួរឱ្យកត់សម្គាល់ថា ក្នុងឆ្នាំ ២០២៦ នេះ មានវត្តមាន ភ្ញៀវទេសចរអន្តរជាតិ មកទស្សនា និងថតរូបភាពកាន់តែច្រើនឡើង ដែលបង្ហាញថា ពិធីចាប់ត្រីបឹងបង្កោង បានក្លាយជាផលិតផលទេសចរណ៍បែបវប្បធម៌ដ៏សំខាន់មួយរបស់ខេត្តសៀមរាប បន្ថែមពីលើប្រាសាទបុរាណ។

ការរក្សាបាននូវប្រពៃណីចាប់ត្រីនេះ មិនត្រឹមតែជាសក្ខីភាព នៃការអភិរក្សអត្តសញ្ញាណមូលដ្ឋានប៉ុណ្ណោះទេ ប៉ុន្តែថែមទាំងជាការលើកទឹកចិត្តឱ្យយុវជនជំនាន់ក្រោយ ស្គាល់តម្លៃ និងចេះថែរក្សាធនធានធម្មជាតិដែលមាននៅក្នុងសហគមន៍ផងដែរ៕

Related Topics:ខេត្តសៀមរាប ពិធីចាប់ត្រី

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា