សន្តិសុខសង្គម

ខ្ចីម៉ូតូអ្នកធ្វើការជាមួយគ្នាយកទៅបញ្ចាំលេងល្បែងអស់ រួចកុហកសមត្ថកិច្ចថា ចោរប្លន់

បានផុស

៥ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

បុរសម្នាក់ ងប់ងុលនឹងល្បែងអនឡាញ ពេលចាញ់អស់លុយពីខ្លួន យកម៉ូតូអ្នកធ្វើការជាមួយគ្នាទៅបញ្ចាំបានលុយលេងល្បែងអស់ទៀត ក៏មកអង្គុយយំស្រែកឲ្យគេឯងជួយ ដោយកុហកថា ចោរប្លន់ម៉ូតូខ្លួនយកទៅបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីយប់ថ្ងៃទី ១២ ខែកុម្ភៈ ឆ្នាំ ២០២៦ ស្ថិតនៅភូមិទួលពង្រ សង្កាត់ចោមចៅទី ១ ខណ្ឌពោធិ៍សែនជ័យ។

តាមសម្ដីបុរសខាងលើ បានឲ្យដឹងថា ដោយសារតែងប់ងុលនឹងល្បែងស៊ីសងតាមអនឡាញរហូតអស់លុយពីខ្លួន ទើបទៅខ្ចីម៉ូតូហុងដាឌ្រីម ១ គ្រឿង ពីអ្នកធ្វើការសំណង់ជាមួយគ្នា ដោយប្រាប់ថា ទៅរកទិញអីហូបបន្តិច។ ក្នុងនោះ ដោយការស្រលាញ់រាប់អានទុកចិត្ត ម្ចាស់ម៉ូតូ ក៏ឲ្យម៉ូតូយកទៅ។

ប្រភពដដែលបានបន្តថា ក្រោយពីបានម៉ូតូហើយ ខ្លួនក៏យកម៉ូតូនោះទៅបញ្ចាំបានលុយ ៦៥០ ដុល្លារ មកចាក់ល្បែងស៊ីសងទៀត រហូតចាញ់អស់លុយពីខ្លួន មិនដឹងដោះស្រាយជាមួយម្ចាស់ម៉ូតូយ៉ាងម៉េចក៏កុហកថា ម៉ូតូត្រូវចោរវាយប្លន់យកទៅបាត់ ហើយអង្គុយស្រែកយំទាំងកណ្ដាលយប់ផ្អើលដល់សមត្ថកិច្ចចុះអន្តរាគមន៍ និងនាំយកទៅសាកសួរ។

រហូតដល់ព្រឹកថ្ងៃទី ១៣ ខែកុម្ភៈ ឆ្នាំ ២០២៦ សមត្ថកិច្ចក៏អញ្ជើញបុរសខាងលើមកសួរនាំបន្ថែម ទើបដឹងថា បុរសនោះបំប៉ោងសភាពការណ៍ ចាញ់ល្បែងយកម៉ូតូទៅបញ្ចាំលេងអស់លុយកុហកថាចោរប្លន់ម៉ូតូទៅវិញ។

តាមការសារភាពរបស់បុរសខាងលើ បានបញ្ជាក់ថា នេះជាលើកទី ២ ហើយ ដែលយកម៉ូតូទៅបញ្ចាំយកលុយលេងល្បែងតាមអនឡាញ។ បច្ចុប្បន្ន បុរសខាងលើ ត្រូវបានសមត្ថកិច្ចឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ៕

អត្ថបទ ៖ សុខា