ព័ត៌មានជាតិ

ឃុំថ្មដាក្នុងខេត្តពោធិ៍សាត់ រងការឈ្លានពានពីយោធាថៃ មានភូមិសរុប ៥ ភូមិ មានគ្រួសារពលរដ្ឋរស់នៅជាង ៩០០ គ្រួសារ

បានផុស

៣ ខែ មុន

នៅ

ថ្ងៃចន្ទ ១៦ កុម្ភៈ ២០២៦

ដោយ

ឃុំថ្មដា ស្រុកវាលវែង ខេត្តពោធិ៍សាត់ បានរងការឈ្លានពានពីយោធាថៃដែលបានព័ទ្ធយកផ្ទះ និងដីលំនៅដ្ឋានរបស់ពលរដ្ឋខ្មែរទាំងបំពាន។ ឃុំថ្មដា មានភូមិសរុបចំនួន ៥ ភូមិ និងមានពលរដ្ឋរស់នៅសរុបជាង ៩០០ គ្រួសារ។ នេះបើតាមលោក គង់ សំអុល ស្មៀនឃុំថ្មដា ស្រុកវាលវែង ខេត្តពោធិ៍សាត់។

ផ្តល់បទសម្ភាសន៍ដល់កម្ពុជាថ្មី ក្នុងដំណើរបេសកកម្មចុះទៅឃុំថ្មដា ស្រុកវាលវែង កាលពីពេលថ្មីៗនេះក្រោមការដឹកនាំនិងសម្របសម្រួលពីក្រសួងព័ត៌មាន លោក គង់ សំអុល ស្មៀនឃុំថ្មដា ស្រុកវាលវែង បានប្រាប់ពីភូមិសាស្រ្តទឹកដីព្រៃភ្នំនៃឃុំថ្មដា ដែលកន្លងទៅពលរដ្ឋធ្លាប់រស់នៅយ៉ាងសុខសាន្ត ប៉ុន្តែក្រោយពេលយោធាថៃបើកការឈ្លានពានទន្រ្ទានចូលកាន់កាប់ទឹកដីប្រទេសកម្ពុជា បានបង្កការខូចខាតផ្ទះសម្បែង ហេដ្ឋារចនាសម្ព័ន្ធផ្សេងៗ និងថែមទាំងបង្ខំឲ្យគ្រួសារពលរដ្ឋខ្មែរមួយចំនួនត្រូវជម្លៀសចេញពីលំនៅដ្ឋានចោលការងារ និងមុខរបរប្រចាំថ្ងៃ។

១. ភូមិសាស្ត្រ និងប្រជាសាស្ត្រ៖

• ឃុំថ្មដាមានភូមិផ្លូវការចំនួន ៣ គឺ ភូមិសង្គមថ្មី ភូមិកណ្ដាល និងភូមិឯកភាព។ ក្រៅពីភូមិផ្លូវការ ក៏មានភូមិឧបសម្ព័ន្ធចំនួន ២ ទៀត គឺភូមិស្ទឹងមេទឹក និងភូមិអូរសួស្តី។
• ប្រជាពលរដ្ឋសរុបនៅក្នុងឃុំមានចំនួនជាង ៣ ០០០ នាក់ ស្មើនឹង ៩០៩ គ្រួសារ។

២. ជីវភាព និងសេដ្ឋកិច្ច៖

• របរចម្បងរបស់ប្រជាពលរដ្ឋគឺការដាំដុះដំណាំកៅស៊ូ និងទុរេន រួមទាំងដំណាំផ្សេងៗមួយចំនួនទៀត។
• កន្លងមក វត្តមានក្រុមហ៊ុនវិនិយោគចិនបានជួយឱ្យជីវភាពពលរដ្ឋធូរស្រាលមួយកម្រិត និងបង្កើតការងារបានច្រើន។ ប៉ុន្តែបច្ចុប្បន្ន ក្រុមហ៊ុនចិនបានដកចេញមួយចំនួនធំ ដែលធ្វើឱ្យឱកាសការងារសម្រាប់ពលរដ្ឋធ្លាក់ចុះយ៉ាងខ្លាំង។

៣. ស្ថានភាពហេដ្ឋារចនាសម្ព័ន្ធ និងការធ្វើដំណើរ៖

• ហេដ្ឋារចនាសម្ព័ន្ធផ្លូវថ្នល់មានការរីកចម្រើន ដែលកាលពីមុនពលរដ្ឋត្រូវចំណាយពេលដេកផ្លូវដើម្បីធ្វើដំណើរទៅមកទីរួមខេត្តឬទីប្រជុំជនស្រុក។ ប៉ុន្តែក្រោយផ្លូវជាតិលេខ ៥៥ រួមទាំងផ្លូវជាតិលេខ ១០ បានស្ថាបនាតភ្ជាប់ បានសម្រួលការធ្វើដំណើររបស់ពលរដ្ឋពីតំបន់មួយទៅតំបន់មួយកាន់តែងាយស្រួល នាំឲ្យមានលំហូរទេសចរមកកម្សាន្តកាន់តែច្រើនដែលបានជួយលើកស្ទួយជីវភាពពលរដ្ឋកាន់តែល្អប្រសើរ។

៤. បញ្ហាប្រឈម និងជម្លោះព្រំដែន៖

• ជម្លោះពីការឈ្លានពានរបស់យោធាថៃ បានធ្វើឱ្យប៉ះពាល់ដល់ការធ្វើកសិកម្ម និងការរស់នៅរបស់ពលរដ្ឋដោយសារមានការភ័យខ្លាច និងមួយចំនួនត្រូវជម្លៀសចោលលំនៅដ្ឋាននិងមុខរបរប្រចាំថ្ងៃ។
• មានផ្ទះប្រជាពលរដ្ឋប្រហែល ១៥ ខ្នង រងផលប៉ះពាល់ដោយសារការរំលោភយកពីភាគីថៃ៕