ព័ត៌មានជាតិ

ក្រសួងការងារ ណែនាំវិធានការ ៦ ចំណុច ឲ្យម្ចាស់រោងចក្រ សហគ្រាស អនុវត្ត ដើម្បីការពារសុវត្ថិភាពកម្មករក្នុងរដូវប្រាំង

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា ក្រសួងការងារ បានណែនាំវិធានការ ៦ ចំណុច ឲ្យម្ចាស់ ឬនាយកសហគ្រាស គ្រឹះស្ថានទាំងអស់ អនុវត្តដោយយកចិត្តទុកដាក់ខ្ពស់ក្នុងការលើកកម្ពស់សុវត្ថិភាព និងសុខភាពការងាររបស់កម្មករ-និយោជិត ដើម្បីការពារកុំឲ្យមានបញ្ហាសុខភាពណាមួយកើតឡើងអំឡុងពេលបំពេញការងារក្នុងរដូវប្រាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន មេសា បានឲ្យដឹងកាលពីថ្ងៃទី ៥ ខែមីនា ថា វិធានការទាំង ៦ ចំណុច ដែលក្រសួងណែនាំរួមមាន ៖ ទី ១-ត្រួតពិនិត្យ និងថែទាំជាប្រចាំនូវប្រព័ន្ធបញ្ចេញបញ្ចូលខ្យល់នៅតាមអគារធ្វើការ និងបើកឲ្យដំណើរការ ឲ្យបានយ៉ាងហោចណាស់ ១ ម៉ោង មុនពេលអនុញ្ញាតឲ្យកម្មករ-និយោជិត ចូលធ្វើការ។ ទី ២-បើកបង្អួច ទ្វារទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញ នៅកន្លែងធ្វើការដែលមិនមានលំហូរខ្យល់គ្រប់គ្រាន់នៅពេលអាកាសធាតុកើនកម្ដៅ និងរៀបចំទុកដាក់សម្ភារៈ និងវត្ថុធាតុដើមឲ្យមានសណ្ដាប់ធ្នាប់ និងសុវត្ថិភាពកុំឲ្យបាំងប្រភពខ្យល់ចេញចូល។

លោកបន្តថា វិធានការទី ៣-ត្រូវផ្គត់ផ្គង់ទឹកស្អាតឲ្យបានគ្រប់គ្រាន់ស្របតាមការកើនកម្ដៅ នៃអាកាសធាតុ និងណែនាំដល់កម្មករ-និយោជិត ឲ្យបរិភោគទឹកស្អាតឲ្យបានញឹកញាប់ និងយ៉ាងតិច ២ លីត្រ ក្នុង ១ ថ្ងៃ ព្រមទាំងស្លៀកសម្លៀកបំពាក់សមស្របតាមស្ថានភាពអាកាសធាតុ។ ទី ៤-បាញ់ទឹកនៅលើដំបូលអគារធ្វើការឲ្យបានយ៉ាងតិច ២ ដង ក្នុង ១ ថ្ងៃ និងត្រូវចាត់វិធានការផ្សេងៗ ទៀត ដើម្បីកាត់បន្ថយកម្ដៅជាបន្ទាន់។

អ្នកនាំពាក្យរូបនេះ បានឲ្យដឹងទៀតថា វិធានការទី ៥-ក្រសួង ក៏បានណែនាំឲ្យមានការចាត់បុគ្គលិកទទួលបន្ទុកត្រួតពិនិត្យឧបករណ៍វាស់ស្ទង់កម្ដៅជាប្រចាំនៅកន្លែងធ្វើការ។ និងទី ៦-បង្កើនការអប់រំ និងផ្សព្វផ្សាយអំពីវិធានការការពារសុខភាពជាប្រចាំដល់កម្មករ-និយោជិត និងក្រើនរំឭក អំពីវិធានការទាំងនោះតាមរយៈប្រព័ន្ធជូនដំណឹងជាសំឡេងនៅក្នុងសហគ្រាស គ្រឹះស្ថាន។

បើតាម លោក ស៊ុន មេសា ការណែនាំវិធានការទាំង ៦ នេះ រំពឹងថា អាចជួយបង្ការហានិភ័យសុខភាពដែលអាចកើតឡើង និងលើកកម្ពស់សុវត្ថិភាពសុខភាពកម្មករ។ លោកបញ្ជាក់ថា សុខទុក្ខរបស់កម្មករ-និយោជិត ជាសុខទុក្ខរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ក៏ដូចជាសុខទុក្ខរបស់ លោក ហេង សួរ រដ្ឋមន្ត្រីក្រសួងការងារ។

ទន្ទឹមនេះ ក្នុងករណីចាំបាច់ ម្ចាស់ ឬនាយកសហគ្រាស គ្រឹះស្ថាន និងកម្មករ-និយោជិត អាចធ្វើការទំនាក់ទំនងមកក្រសួងការងារ និងបណ្ដុះបណ្ដាលវិជ្ជាជីវៈ តាមរយៈប្រព័ន្ធ Hotline លេខ “១២៨៦” ឬ “១២៩៧” ឬ ក្រុមតេឡេក្រាម “សម្រាប់និយោជក” (https://t.me/EmployerChat) ឬក្រុមតេឡេក្រាម “សម្រាប់កម្មករ-និយោជិត” (https://t.me/KhmerWorkerChat) ឬអាជ្ញាធរមានសមត្ថកិច្ចពាក់ព័ន្ធ ឬអាចដាក់ពាក្យបណ្តឹងតាមនីតិវិធីប្រអប់បណ្តឹងអនាមិករបស់ក្រសួង ដើម្បីចុះធ្វើការវាយតម្លៃកម្រិតហានិភ័យដែលអាចកើតមានឡើងចំពោះសុវត្ថិភាព និងសុខភាពកម្មករ-និយោជិត ក្នុងអំឡុងពេលសីតុណ្ហភាពនៅក្នុងសហគ្រាស គ្រឹះស្ថានឡើងកម្ដៅខ្លាំង។

យ៉ាងណាក៏ដោយ លោក ស៊ុន មេសា ជឿជាក់ថា ម្ចាស់ ឬនាយកសហគ្រាស គ្រឹះស្ថាន នឹងចូលរួមអនុវត្តតាមការណែនាំប្រកបដោយប្រសិទ្ធភាពក្នុងស្មារតីទទួលខុសត្រូវ៕