កម្មករ ៦៨៣ នាក់ នៅរោងចក្រ ML ទទួលប្រាក់ឈ្នួល និង ប្រាក់បំណាច់ ក្រោមការសម្របសម្រួលរបស់ក្រសួងការងារ

ក្រសួងការងារ និង បណ្តុះបណ្តាលវិជ្ជាជីវៈ សូមអបអរសាទរដល់កម្មករ-និយោជិត នៃរោងចក្រអិមអិល (ML) ក្នុងខេត្តបន្ទាយមានជ័យ ទាំង ៦៨៣ នាក់ ដែលបានបើកប្រាក់ឈ្នួល និង ប្រាក់បំណាច់ផ្សេងៗ កាលពីព្រឹកថ្ងៃទី ២៨ ខែឧសភា ឆ្នាំ ២០២៦ ក្នុងទីតាំងរោងចក្រអិមអិល (ML) ផ្ទាល់។ នេះគឺជាការបញ្ជាក់របស់លោក ស៊ុន មេសា អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈ។

ការបើកប្រាក់ឈ្នួល និង អត្ថប្រយោជន៍ នៅថ្ងៃនេះ គឺជាលើកទី ២ ខណៈដែលកម្មករ-និយោជិត បានបើកលើកទី ១ ម្តងហើយ កាលពីថ្ងៃទី ២៨ ខែមេសា ឆ្នាំ ២០២៦។ នេះបើតាម លោក ស៊ុន មេសា ដដែល។

ទន្ទឹមនេះ អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈ សូមអំពាវនាវដល់កម្មករ-និយោជិត មានបំណងចង់ស្វែងរកការងារធ្វើ ឱ្យមកទទួលយកឱកាសការងារថ្មីពីមជ្ឈមណ្ឌលការងារខេត្តបន្ទាយមានជ័យ ឬ ទំនាក់ទំនងតាមរយៈប្រព័ន្ធ Hotline ១២៩៧ ដែលកំពុងរង់ចាំទទួល។

ក្រៅពីទទួលប្រាក់ឈ្នួល កម្មករ-និយោជិត នៃរោងចក្រអិមអិល (ML) ក៏អាចដាក់ពាក្យធ្វើការងារភ្លាមៗ ដោយផ្ទាល់ជាមួយរោងចក្រស៊ិនគី អឹភែរឹល ដែលបានចុះទៅផ្តល់ឱកាសការងារផ្ទាល់នៅរោងចក្រអិមអិល (ML) ផ្ទាល់នៅថ្ងៃនេះផងដែរ។ នេះបើតាមការបញ្ជាក់ពីលោក ស៊ុន មេសា ដដែល៕