ព័ត៌មានជាតិ

បច្ចុប្បន្នភាពគ្រោះថ្នាក់ចរាចរណ៍នៅកំពង់ឆ្នាំង និង ស្វាយរៀង ៖ ក្រសួងការងារ ថា អ្នកជាសះស្បើយត្រឡប់ទៅផ្ទះវិញ ៨៥ នាក់ ហើយ

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

គិតត្រឹមម៉ោង ៩ ព្រឹក ថ្ងៃទី ២៨ ខែឧសភា ឆ្នាំ ២០២៦ នេះ កម្មករចំនួន ៨៥ នាក់ បានជាសះស្បើយ និង វិលត្រឡប់ទៅផ្ទះវិញ ខណៈដែលអ្នករងរបួសទាំងធ្ងន់ និង ស្រាល នៅសល់ ២៥ នាក់ កំពុងសម្រាកព្យាបាល ហើយមានសភាពល្អប្រសើរឡើងជារួម។ នេះបើតាមការបញ្ជាក់របស់ លោក ស៊ុន មេសា អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន មេសា បានថ្លែងថា សម្រាប់ករណីនៅខេត្តកំពង់ឆ្នាំង កម្មករដែលបានត្រឡប់ទៅគេហដ្ឋានវិញ ចំនួន ៥៧ នាក់ ខណៈអ្នករបួសធ្ងន់មានចំនួន ៩ នាក់ និង អ្នករបួសស្រាលចំនួន ៧ នាក់ ដោយបន្តសម្រាកព្យាបាលនៅមន្ទីរពេទ្យ។ ដោយឡែក ករណីខេត្តស្វាយរៀង កម្មករដែលត្រឡប់ទៅគេហដ្ឋានវិញមានចំនួន ២៨ នាក់ ខណៈអ្នករងរបួសធ្ងន់ ១ នាក់ ត្រូវបានគ្រួសារបញ្ជូនទៅព្យាបាលនៅវៀតណាម ហើយអ្នករងរបួសស្រាលចំនួន ៨ នាក់ បន្តសម្រាកព្យាបាលនៅមន្ទីរពេទ្យ។

លោកថា “ក្រសួងមានការសប្បាយចិត្តដោយការធូស្រាល និង សះស្បើយរបស់បងប្អូនកម្មករដែលធ្វើឱ្យបងប្អូនកម្មករអាចត្រឡប់ទៅគេហដ្ឋានជាបន្តបន្ទាប់ ខណៈដែលបងប្អូនកម្មករទទួលបានការយកចិត្តទុកដាក់ពីក្រុមគ្រូពេទ្យ និង មន្ត្រីជំនាញក្រសួង ក៏ដូចជា ប.ស.ស”។

សូមរំលឹកថា គ្រោះថ្នាក់ចរាចរណ៍ចំនួន ២ ករណី ដែលបានកើតឡើងព្រមគ្នា កាលពីព្រឹកថ្ងៃទី ២៣ ខែឧសភា ឆ្នាំ ២០២៦ នៅខេត្តកំពង់ឆ្នាំង និង ខេត្តស្វាយរៀង នេះ បណ្តាលឱ្យកម្មករ-និយោជិត ចំនួន ១៤ នាក់ បាត់បង់ជីវិត និង ប្រមាណ ១០០ នាក់ ផ្សេងទៀត រងរបួសធ្ងន់ និង ស្រាល។

សូមបញ្ជាក់ថា តាំងពីមានគ្រោះថ្នាក់ចរាចរណ៍ភ្លាម លោករដ្ឋមន្ត្រី ហេង សួរ ថ្នាក់ដឹកនាំក្រសួង និង មន្ត្រីជំនាញក្រោមឱវាទក្នុងនាមជាសេនាធិការជូនរាជរដ្ឋាភិបាល បានចុះចាត់ចែងសម្របសម្រួលពិធីបុណ្យសព និង ផ្តល់អត្ថប្រយោជន៍ជូនកម្មករ-និយោជិតភ្លាមៗ ប្រកបដោយការយកចិត្តទុកដាក់៕