រុស្ស៊ី៖ ជាក់ស្ដែង ច្បាប់អន្តរជាតិលែងមានតម្លៃ​ទៀតហើយ

អ្នកនាំពាក្យវិមានក្រឹមឡាំង លោក Dmitry Peskov បានប្រកាសថា ប្រព័ន្ធច្បាប់អន្តរជាតិដែលធ្លាប់ជាយន្តការដឹកនាំពិភពលោកនោះ បានឈានដល់ទីបញ្ចប់ និងលែងមានប្រសិទ្ធភាពទៀតហើយ។

យោង​តាម​ការ​ផ្សាយ​របស់ UNN នៅក្នុងកិច្ចសម្ភាសន៍កាលពីថ្ងៃទី៨​ខែមីនា លោក Peskov បានសង្កត់ធ្ងន់ថា ទោះបីជាគោលការណ៍ច្បាប់ទាំងនោះនៅមានចែងលើក្រដាសក៏ដោយ ក៏​ក្នុងការពិតជាក់ស្ដែង វាមិនមានឥទ្ធិពលអ្វីទាល់តែសោះ ដែលធ្វើ​ឲ្យ​ពិភពលោកធ្លាក់ចូលក្នុងស្ថានភាពដែលគ្មានបទប្បញ្ញត្តិច្បាប់ច្បាស់លាស់។

ការលើកឡើងនេះ កើតឡើងបន្ទាប់ពីមានការកើនឡើងនូវជម្លោះសកលជាបន្តបន្ទាប់ ជាពិសេសសង្គ្រាម​នៅ​អ៊ីរ៉ង់ និង​ប្រតិបត្តិការរបស់សហរដ្ឋអាមេរិកនៅទីក្រុង Caracas កាលពីខែដើម​មករា ដែលបានឈានដល់ការចាប់ខ្លួនមេដឹកនាំវ៉េណេស៊ុយអេឡា លោក Nicolas Maduro។

លោក Peskov បានសន្និដ្ឋានថា ប្រព័ន្ធច្បាប់ពិភពលោកកំពុងស្ថិតក្នុងវិបត្តិយ៉ាងជ្រៅ ហើយ​តាម​ពិត​ទៅ ​មនុស្សជាតិធ្លាប់បានឆ្លងកាត់ដំណាក់កាលប្រវត្តិសាស្ត្របែបនេះជាច្រើនដងរួចមកហើយ។ លោកបាននិយាយ​ថា «យើងមិនបានរស់នៅក្នុងសម័យនោះ ទើបយើងមានអារម្មណ៍ថាវាដូចជាថ្ងៃអវសាននៃពិភពលោក ប៉ុន្តែតាមពិតទៅ គឺមានតែសណ្ដាប់ធ្នាប់ចាស់ប៉ុណ្ណោះដែលបានរលាយបាត់ទៅ»។ លោកបានបន្ថែមថា អ្វីដែលគួរ​ឲ្យ​បារម្ភនោះគឺ រហូតមកដល់ពេលនេះ នៅមិនទាន់មាននរណាម្នាក់អាចកំណត់បានច្បាស់លាស់នូវប្រព័ន្ធថ្មី ដែលនឹងមកជំនួសច្បាប់អន្តរជាតិដែលបានស្លាប់ទៅនោះនៅឡើយទេ៕

ប្រែសម្រួល៖ ឈាង