ព័ត៌មានអន្ដរជាតិ

ត្រាំ អំពាវនាវឲ្យចិន និងប្រទេសផ្សេងទៀត បញ្ជូននាវាចម្បាំងទៅជួយបើកច្រក Hormuz

បានផុស

៣ ខែ មុន

នៅ

ថ្ងៃអាទិត្យ ១៥ មីនា ២០២៦

ដោយ

ស្របពេលតម្លៃប្រេងនៅតែខ្ពស់ ព្រោះតែសង្គ្រាមមជ្ឈិមបូព៌ា ពេលនេះ ប្រធានាធិបតីអាមេរិក ដូណាល់ ត្រាំ បានអំពាវនាវឲ្យប្រទេសនានារួមទាំងចិន ផងនោះ សូមបញ្ជូននាវាចម្បាំងទៅកាន់ច្រកសមុទ្រ Hormuz ដើម្បីជួយបើកច្រកនេះឡើងវិញ។

ប្រធានាធិបតីអាមេរិក ដូណាល់ ត្រាំ (រូប៖ Reuters)

ក្នុងសារបង្ហោះលើបណ្តាញសង្គម Truth Social កាលពីថ្ងៃសៅរ៍ទី១៤ខែមីនាឆ្នាំ២០២៦ លោកត្រាំសរសេរថា៖ «មិនថាដោយវិធីណាក៏ដោយ យើងនឹងធ្វើឲ្យច្រកសមុទ្រ Hormuz បើកចំហ មានសុវត្ថិភាព និងមានសេរីភាព ក្នុងពេលឆាប់ៗនេះឲ្យបាន»។

តាមសំណេររបស់ប្រធានាធិបតីអាមេរិក លោកសង្ឃឹមថា ចិន បារាំង ជប៉ុន កូរ៉េខាងត្បូង និងចក្រភពអង់គ្លេស នឹងបញ្ជូននាវាចម្បាំងទៅកាន់ច្រកសមុទ្រដឹកជញ្ជូនដ៏សំខាន់នេះ ដើម្បីកុំឲ្យវា ក្លាយជាការគំរាមកំហែងទៀតដោយអ៊ីរ៉ង់។ ប្រទេសជាច្រើននឹងបញ្ជូននាវាចម្បាំងមក ដើម្បីរក្សាច្រកផ្លូវទឹកដ៏សំខាន់នេះឱឲ្យបើកចំហនិងមានសុវត្ថិភាព។

ក្នុងពេលជាមួយគ្នានេះ លោកបន្តថា សហរដ្ឋអាមេរិកនឹង ទម្លាក់គ្រាប់បែកកម្ទេចតំបន់ឆ្នេរឲ្យខ្ទេចខ្ទី ហើយបន្តបាញ់កម្ទេចទូកនិងនាវារបស់អ៊ីរ៉ង់ឲ្យលិចចូលទៅក្នុងទឹក។

រឿងនេះកើតឡើងបន្ទាប់ពីរដ្ឋមន្ត្រីក្រសួងថាមពលអាមេរិក Chris Wright និយាយថា យោធាអាមេរិកមិនទាន់ត្រៀមខ្លួនរួចរាល់សម្រាប់ការអមដំណើរកប៉ាល់ដឹកប្រេងឆ្លងកាត់ច្រកសមុទ្រ Hormuz ទេ។

យោងតាមការផ្សាយរបស់ Al Jazeera លោក Wright ប្រាប់សារព័ត៌មាន CNBC ថា៖«ទីផ្សារកំពុងជួបប្រទះនឹងការរំខានរយៈពេលខ្លីដ៏ខ្លាំងក្លា យើងព្យាករណ៍ថា សង្គ្រាមនឹងបន្តរយៈពេលច្រើនសប្តាហ៍ទៀត មិនមែនច្រើនខែទេ។ វាជាការឈឺចាប់រយៈពេលខ្លី តែសម្រាប់ផលប្រយោជន៍រយៈពេលវែង។ សហរដ្ឋអាមេរិកកំពុងបំផ្លាញសមត្ថភាពរបស់អ៊ីរ៉ង់គំរាមកំហែងទីផ្សារថាមពល»។

ការអត្ថាធិប្បាយនេះទៀតសោត កើតឡើងក្រោយពេលមេដឹកនាំកំពូលថ្មីរបស់អ៊ីរ៉ង់ Mojtaba Khamenei ប្រកាសជាសាធារណៈលើកដំបូងថា ច្រក Hormuz គួរតែបន្តបិទ អំឡុងពេលផ្ទុះសង្គ្រាមជាបន្តនេះ៕

អត្ថបទ៖ សុខ សុវណ្ណ