ឆ្នាំនេះដូងក្រអូបមានតម្លៃថ្លៃជាងឆ្នាំមុនបន្ដិច ខណៈកសិករថាចំណាយដើមខ្ពស់

កសិករម្នាក់ស្ថិតនៅខេត្តត្បូងឃ្មុំបានឱ្យដឹងថាឆ្នាំនេះ តម្លៃដូងក្រអូបហាក់មានតម្លៃថ្លៃជាងឆ្នាំមុនបន្ដិច ខណៈត្រូវចំណាយដើមខ្ពស់ក្នុងការថែទាំ និងការដឹកជញ្ជូនប្រចាំថ្ងៃ។

អ្នកស្រី ស៊ា មួយហួរ ជាម្ចាស់កសិដ្ឋានដាំដូងក្រអូប SOKHA DOM ​ប្រាប់ កម្ពុជាថ្មី ថា ឆ្នាំនេះ ដូងក្រអូបនៅក្នុងចម្ការរបស់អ្នកស្រី ដាក់លក់នៅលើទីផ្សារនៅចន្លោះ ៣ ៥០០រៀល ក្នុង១ផ្លែ ដោយសារតែការថែទាំដាក់ជី​ និងការចំណាយថ្លៃដើមផ្សេងៗមានតម្លៃខ្ពស់ផងដែរ។

កសិកររូបនេះ បានបញ្ជាក់ដែរថា សម្រាប់ឆ្នាំនេះ កសិដ្ឋានរបស់អ្នកស្រីអាចលក់រាយ និងបោះដុំដូងក្រអូបទៅកាន់ទីផ្សារបានជាង ២០០ផ្លែ ក្នុង១ថ្ងៃ ក៏អាស្រ័យទៅលើអតិថិនដែលមានតម្រូវការប្រចាំថ្ងៃ​ផងដែរ។

ចំពោះទីផ្សារគោលដៅ អ្នកស្រី មួយហួរ ថា ភាគច្រើនអតិថិជនរបស់អ្នកស្រី ច្រើនតែនៅតាមបណ្ដាខេត្តក្រុងមួយចំនួនដូចជា៖ រាជធានីភ្នំពេញ កំពង់ចាម ត្បូងឃ្មុំ ជាដើម។

យ៉ាងណា​មិញ អ្នកស្រី មួយហួរ បានអះអាងថា ដោយសារតែកសិដ្ឋានរបស់អ្នកស្រីទើបតែចាប់ផ្ដើម ហេតុនេះទើបអតិថិជន ពិសេសប្រជាជនខ្មែរនៅពុំទាន់បានសូវស្គាល់ច្រើន ប៉ុន្ដែអ្នកស្រីនឹងព្យាយាមធ្វើទីផ្សារទៅតាមរយៈការតាំងពិព័រណ៍ផលិតផលខ្មែរផ្សេងៗ ដើម្បីធ្វើយ៉ាងណាអាចឱ្យដូងក្រអូបដែលដាំក្នុងស្រុកកាន់តែមានទីផ្សារខ្ពស់ផងដែរ។

គួរឱ្យដឹងថា ចម្ការដូងក្រអូបរបស់អ្នកស្រី ស៊ា មួយហួរ ជាកសិដ្ឋានថ្មីមួយដែលបើកដំណើរឡើងមកកាលពីឆ្នាំ ២០២១។ បច្ចុប្បន្នកសិដ្ឋានមានទីតាំងស្ថិតនៅស្រុកតំបែរ ខេត្តត្បួងឃ្មុំ៕

អត្ថបទ ៖ សួស សិត