សេដ្ឋកិច្ច

ហាងឆេងមាសដាំក្បាលចុះ ២០០ ដុល្លារ ក្នុងមួយតម្លឹង

បានផុស

២ ខែ មុន

នៅ

ថ្ងៃសុក្រ ២០ មីនា ២០២៦

ដោយ

តម្លៃហាងឆេងមាសបានដាំក្បាលចុះយ៉ាងគំហុកនៅព្រឹកថ្ងៃសុក្រនេះប្រមាណ ២០០ ដុល្លារ ដោយស្ថិតក្នុងតម្លៃ ៥៦០២ ដុល្លារ ក្នុងមួយតម្លឹង ដោយសារវិនិយោគិនធំៗ មួយចំនួនបានដកប្រាក់ទៅវិនិយោគលើតម្លៃប្រេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities បានឱ្យដឹងថា តម្លៃមាសធ្លាក់ចុះ ពាក់ព័ន្ធនឹងសង្គ្រាមនៅតំបន់មជ្ឈិមបូព៌ា ជុំវិញការរឹតត្បិតច្រកសមុទ្រហូមូស្ស ហើយមានការលក់ភាគហ៊ុនជាច្រើន ដើម្បីយកប្រាក់ដុល្លារ ហើយយកទៅវិនិយោគលើប្រេង។

លោក ឡុង សំណាង បញ្ជាក់ថា៖ «ប្រសិនបើប្រេងនៅតែជាកត្តាចម្បង តម្លៃហាងឆេងមាស នឹងបន្តធ្លាក់ចុះទៀត ដោយសារអ្នកវិនិយោគចាប់យកឱកាសលើហាងឆេងប្រេង ប៉ុន្តែក្នុងដំណាក់កាលមួយទៀត មាសនឹងត្រឡប់ហក់ឡើងទៅវិញដោយសារតែវិបត្តិសេដ្ឋកិច្ចអត់ល្អ»។

អ្នកជំនាញទីផ្សារអន្តរជាតិបានលើកឡើងថា កត្តាសំខាន់ដែលធ្វើឱ្យតម្លៃមាសដាំក្បាលចុះប៉ុន្មានថ្ងៃចុងក្រោយនេះ គឺពាក់ព័ន្ធនឹងការសម្រេចចិត្តលើគោលនយោបាយអត្រាការប្រាក់របស់ធនាគារកណ្ដាលសហព័ន្ធអាមេរិក (Fed)។

រាប់តាំងពីសង្រ្គាមរបស់អ៊ីស្រាអែល និងអាមេរិក ប្រឆាំងអ៊ីរ៉ង់ផ្ទុះឡើង អ្នកវិនិយោគិនចាប់ផ្ដើមថយចុះក្ដីសង្ឃឹមថា Fed នឹងកាត់បន្ថយអត្រាការប្រាក់បន្ថែមទៀត ដោយសារតែសម្ពាធអតិផរណា ដែលបណ្ដាលមកពីវិបត្តិប្រេងនៅមជ្ឈិមបូព៌ា ដែលធ្វើឱ្យតម្លៃប្រេងសកលហក់ឡើង។

ដូចការព្យាករទុក Fed កាលពីថ្ងៃពុធ បានសម្រេចរក្សាទុកនូវអត្រាការប្រាក់គោលរបស់ខ្លួនដដែល (៣,៥-៣,៧៥%) ដោយលើកឡើងពីកំណើនភាពស្រពេចស្រពិលនៃសង្រ្គាមនៅមជ្ឈិមបូព៌ា។ ការសម្រេចនេះហើយ រួមចំណែកដល់ការធ្លាក់ចុះយ៉ាងគំហុកនៃតម្លៃមាសនៅថ្ងៃព្រហស្បតិ៍។

គិតត្រឹមម៉ោង ៨៖៣០ ព្រឹកថ្ងៃទី ២០ ខែមីនា ឆ្នាំ ២០២៦ តម្លៃហាងឆេងមាសអន្តរជាតិបានធ្លាក់ចុះដល់ ៤៦៥០ ក្នុងមួយអោន ស្មើនឹង ៥៦០២ ដុល្លារ ក្នុងមួយតម្លឹងនៅកម្ពុជា៕

អត្ថបទ៖ ឡេង ដេត