ចិនកើន​ឡើង​​​​​ធនធាន​បម្រុងជាង​៣០០​% ​ក្រោយ​​​​រកឃើញ​ប្រភព​​រ៉ែ​កម្រ​​ដ៏ធំសម្បើម​នៅខេត្តស៊ីឈួន

ក្រសួងធនធានធម្មជាតិចិន (MNR) បានប្រកាសពីការរកឃើញរ៉ែថ្មីពីធនធានរ៉ែបម្រុងដ៏ធំសម្បើម នៅក្នុងស្រុកមៀននីង (Mianning ) ខេត្តស៊ីឈួន (Sichuan) ភាគនិរតីប្រទេសចិន ដែលត្រូវបានចាត់ទុកថាជាកំណប់រ៉ែ​កម្រ​​ធំជាងគេទីពីរ នៅលើពិភពលោក។ នេះបើយោងតាមការចុះផ្សាយរបស់ប៉ុស្ត្តិ៍​ទូរទស្សន៍​​​​​ចិន (CCTV) កាលពីថ្ងៃអង្គារទី២៤មីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍នេះបានលើកឡើងពីលទ្ធផលនៃការរុករករ៉ែដែលចេញផ្សាយដោយ MNR ដែល​បាន​​​បញ្ជាក់ថា រ៉ែ​អុកស៊ីដ​ (oxides) ដ៏កម្រសរុប​ប្រមាណ​ ៩៦៦៥៦ លានតោន រួមជាមួយហ្វ្លុយអូរីត (fluorite) ប្រមាណ​​​២៧១៣៥៤​លាន​តោន និងបារីត (barite) ប្រមាណ​ ៣៧២២៧៧ លានតោន បានរកឃើញនៅក្នុងស្រុកមៀននីង ក្លាយជាធនធានដ៏សំខាន់មួយ ដែលដើរតួនាទីនៅក្នុងវិស័យឧស្សាហកម្មទំនើបជាច្រើន​​របស់​ប្រទេស​ចិន​​ក្នុង​ពេល​​អនាគត​។

យោងតាមរបាយការណ៍ ការរកឃើញរ៉ែ​អុកស៊ីដ​ដ៏កម្រថ្មីនៅក្នុងតំបន់នេះ តំណាងឲ្យការកើនឡើងនៃ​​ធនធាន​បម្រុងជាង ៣០០ភាគរយ ដែលធ្វើឲ្យវាក្លាយជារ៉ែដ៏កម្រ​ធំជាងគេទីពីររបស់ពិភពលោក បន្ទាប់ពីរ៉ែ Bayan Obo នៅក្នុងតំបន់ស្វយ័តម៉ុងហ្គោលីខាងក្នុង ភាគខាងជើងប្រទេសចិន។

លោក Wu Chenhui អ្នកវិភាគឯករាជ្យដែលមានជំនាញខាងវិស័យរ៉ែសំខាន់ៗ បានប្រាប់ Global Times កាលពីថ្ងៃ​អង្គារថា រ៉ែដ៏កម្រគឺជាធនធានយុទ្ធសាស្ត្រដ៏សំខាន់មួយ ហើយការគ្រប់គ្រងដំណើរការជីកយករ៉ែ និងបំបែករ៉ែរបស់ពួកគេគឺមានសារៈសំខាន់សម្រាប់សន្តិសុខធនធានជាតិ និងការអភិវឌ្ឍប្រកបដោយចីរភាពនៃឧស្សាហកម្មពាក់ព័ន្ធ។

លោកបាននិយាយថា ការរកឃើញចុងក្រោយនេះមានសារៈសំខាន់យ៉ាងខ្លាំង ជាពិសេសនៅពេលដែលតម្រូវការរ៉ែសំខាន់ៗទូទាំងពិភពលោកកាន់តែខ្លាំងឡើង និងសន្តិសុខខ្សែសង្វាក់ផ្គត់ផ្គង់ក្លាយជាអាទិភាពកំពូលសម្រាប់សេដ្ឋកិច្ចធំៗ៕

អត្ថបទ៖ សាង ស្រីល័ក្ខ