ព័ត៌មានអន្ដរជាតិ

វិបត្តិថាមពល៖ ហ្វីលីពីនធ្វើការជាមួយអាមេរិកដើម្បីនាំចូលប្រេងពីប្រទេសដែលជាប់ទណ្ឌកម្ម

បានផុស

២ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

ហ្វីលីពីនកំពុងធ្វើការជាមួយសហរដ្ឋអាមេរិក ដើម្បីអាចនាំចូលប្រេងពីប្រទេសដែលជាប់ទណ្ឌកម្មរបស់អាមេរិក ចំពេលដែលហានិភ័យនៃវិបត្តិថាមពលក្នុងស្រុកកើនឡើងដោយសារតែជម្លោះនៅមជ្ឈិមបូព៌ា។ នេះបើតាមការឱ្យដឹងរបស់ឯកអគ្គរដ្ឋទូតហ្វីលីពីនប្រចាំសហរដ្ឋអាមេរិក ដែលចុះផ្សាយឡើងដោយទីភ្នាក់ងារសារព័ត៌មានរ៉យទ័រកាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីរាយការណ៍ជុំវិញបញ្ហានេះ ធ្វើឡើងក្រោយហ្វីលីពីន ដែលពឹងផ្អែកយ៉ាងខ្លាំងទៅលើប្រេងឥន្ធនៈនាំចូល ជាពិសេសពីមជ្ឈិមបូព៌ានោះ បានប្រកាសអាសន្នថាមពលជាតិកាលពីថ្ងៃអង្គារ (២៤ មីនា) ដើម្បីដោះស្រាយផលវិបាកពីសង្គ្រាមមជ្ឈិមបូព៌ា រួមទាំងការខាន និងកង្វះផ្នែកផ្គត់ផ្គង់។

លោកឯកអគ្គរដ្ឋទូត Jose Manuel Romualdez បានប្រាប់រ៉យទ័រតាមទូរស័ព្ទយ៉ាងដូច្នេះថា៖ «យើងកំពុងធ្វើការជាមួយក្រសួងការបរទេស(អាមេរិក)ដើម្បីទទួលបានការលើកលែង សម្រាប់ការទិញប្រេងពីប្រទេសរងទទួលទណ្ឌកម្មរបស់សហរដ្ឋអាមេរិក»។

នៅពេលសួរថាតើប្រេងរបស់វេណេស៊ុយអេឡា និងអ៊ីរ៉ង់ជាផ្នែកមួយនៃការពិភាក្សាដែរឬទេ លោក Romualdez បាននិយាយថា ហ្វីលីពីនកំពុងពិចារណាគ្រប់ជម្រើសទាំងអស់។ «ជម្រើសទាំងអស់កំពុងត្រូវបានពិចារណា»។ លោកនិយាយថា ឥឡូវនេះការងារកំពុងដំណើរការ។

គិតត្រឹមថ្ងៃទី ២០ ខែមីនា រដ្ឋាភិបាលបាននិយាយថា ហ្វីលីពីនមានប្រេងឥន្ធនៈអាចផ្គត់ផ្គង់ប្រហែល ៤៥ ថ្ងៃ ហើយកំពុងរកទិញប្រេងបន្ថែមចំនួន ១ លានបារ៉ែលទៀត ដើម្បីបង្កើនស្តុកប្រេងបម្រុងរបស់ខ្លួន។

ហ្វីលីពីននាំចូលប្រេងឆៅស្ទើរតែទាំងអស់របស់ខ្លួនពីមជ្ឈិមបូព៌ា ដោយមានអារ៉ាប៊ីសាអូឌីតជាអ្នកផ្គត់ផ្គង់ធំជាងគេ ដែលធ្វើឱ្យប្រទេសនេះងាយរងគ្រោះដោយសារការហក់ឡើងភ្លាមៗនៃតម្លៃប្រេង និងការរំខានផ្នែកផ្គត់ផ្គង់។

ដូចនឹងបណ្ដាប្រទេសដទៃទៀតក្នុងតំបន់ដែរ ហ្វីលីពីនព្យាយមស្វែងរកប្រភពផ្គត់ផ្គង់ជំនួស ប៉ុន្តែការផ្គត់ផ្គង់លើទីផ្សារអន្តរជាតិក៏មានកំណត់។ កន្លងមក សហរដ្ឋអាមេរិកបានប្រកាសដកទណ្ឌកម្មជាបណ្ដោះអាសន្នលើប្រេងរុស្ស៊ីដែលរងទណ្ឌកម្ម ហើយជាប់គាំងលើសមុទ្រជាង ១២០ លានបារ៉ែល ដើម្បីឱ្យប្រទេសផ្សេងៗអាចទិញ ឬនាំចូល ក្នុងបំណងធ្វើឱ្យការផ្គត់ផ្គង់សកលមានស្ថិរភាព។ អាមេរិកក៏ដកទណ្ឌកម្មបណ្ដោះអាសន្នដូចគ្នាលើប្រេងរបស់អ៊ីរ៉ង់ប្រមាណ ១៤០ លានបារ៉ែល ដែលជាប់គាំងលើសមុទ្រ៕