កម្ពុជា-វៀតណាម ​ប្តេជ្ញាបន្តពូនជ្រំទំនាក់ទំនងឱ្យកាន់តែជិតស្និទ្ធនាំមកនូវផលប្រយោជន៍ទ្វេភាគី

កម្ពុជា-វៀតណាម តាមរយៈមន្រ្តីជា​ន់ខ្ពស់នៃក្រសួងការបរទេស បានអះអាងជាថ្មីពីការបន្តពូនជ្រំទំនាក់ទំនងឱ្យកាន់តែជិតស្និទ្ធ ដោយបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យ ដើម្បីនាំមកនូវផលប្រយោជន៍ទ្វេភាគី។
ការបញ្ជាក់ជំហរជាថ្មីធ្វើឡើងនៅក្នុងជំនួបកិច្ចពិភាក្សារវាង ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក ង្វៀន មាញ់គឿង អនុរដ្ឋមន្ត្រីការបរទេសវៀតណាម កាលពីថ្ងៃទី ៣០ ខែមីនា ឆ្នាំ ២០២៦ នៅទីស្តីការក្រសួង។

សេចក្តីប្រកាសព័ត៌មានស្តីពីលទ្ធផលជំនួបបានឱ្យដឹងថា ក្នុងឱកាសនោះលោក ប្រាក់ សុខុន បានស្វាគមន៍យ៉ាងកក់ក្តៅចំពោះលោក ង្វៀន មាញ់គឿង ក្នុងឱកាសអញ្ជើញមកបំពេញទស្សនកិច្ចនៅកម្ពុជា និងបានសម្តែងការពេញចិត្តចំពោះការបន្តរីកចម្រើននៃទំនាក់ទំនងទ្វេភាគីដ៏ល្អប្រសើរ និងកិច្ចសហប្រតិបត្តិការដ៏សកម្មរវាងប្រទេសទាំងពីរលើគ្រប់វិស័យ។

ក្រសួងការបរទេសបញ្ជាក់ថា៖«ជាមួយនឹងការកត់សម្គាល់ពីសន្ទុះវិជ្ជមាននៃកិច្ចសហប្រតិបត្តិការគ្រប់ជ្រុងជ្រោយលើវិស័យសំខាន់ៗមួយចំនួនរួមមាន ការពារជាតិ និងសន្តិសុខ ពាណិជ្ជកម្មនិងវិនិយោគ ការតភ្ជាប់ ការផ្លាស់ប្តូររវាងប្រជាជន និង ប្រជាជន និងការអភិវឌ្ឍធនធានមនុស្ស ភាគីទាំងពីរបានបញ្ជាក់សាជាថ្មីនូវការប្តេជ្ញាចិត្តបន្តពង្រឹង និងពង្រីកកិច្ចសហប្រតិបត្តិការនេះសំដៅនាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរ»។

ភាគីកម្ពុជា ក៏បានសង្កត់ធ្ងន់អំពីសារៈសំខាន់នៃការរក្សាបាននូវការផ្លាស់ប្តូរទស្សនកិច្ច និងការប្រាស្រ័យទាក់ទងគ្នាគ្រប់ជាន់ថ្នាក់ដើម្បីបន្តពង្រឹងចំណងមិត្តភាពរឹងមាំដូចដែលបានសបញ្ជាក់តាមរយៈទស្សនកិច្ចផ្លូវរដ្ឋរបស់ ឯកឧត្តម តូ ឡឺម អគ្គលេខាធិការបក្សកុម្មុយនីស្តវៀតណាម នៅកម្ពុជា កាលពីខែកុម្ភៈ ឆ្នាំ២០២៦។ លោកឧបនាយករដ្ឋមន្ត្រី បានសម្តែងនូវអំណរសាទរយ៉ាងកក់ក្តៅចំពោះរដ្ឋាភិបាលវៀតណាម អំពីជោគជ័យ នៃការរៀបចំការបោះឆ្នោតសកលកាលពីថ្ងៃទី១៥ ខែមីនា ឆ្នាំ២០២៦។

ដោយកម្ពុជា និងវៀតណាមនឹងប្រារព្ធខួបលើកទី៦០ នៃការបង្កើតទំនាក់ទំនងការទូតនៅឆ្នាំក្រោយ នេះ លោក ង្វៀន មាញ់គ្រឿង បានសម្តែងនូវការប្តេជ្ញាចិត្តយ៉ាងមុតមាំក្នុងការបន្តធ្វើការយ៉ាងជិតស្និទ្ធជាមួយភាគីកម្ពុជា ដើម្បីរួមគ្នារៀបចំសកម្មភាពប្រកបដោយអត្ថន័យឱ្យបានច្រើនសម្រាប់អបអរសាទរព្រឹត្តិការណ៍ប្រវត្តិសាស្ត្រដ៏សំខាន់នេះ។ ក្នុងឱកាសកិច្ចពិភាក្សានេះ លោក ប្រាក់ សុខុន ក៏បានធ្វើបច្ចុប្បន្នភាពអំពីការវិវត្តថ្មីៗនៃស្ថានភាពព្រំដែនកម្ពុជា-ថៃ ផងដែរ។

គួរជម្រាបថា អំឡុង ៥៩ឆ្នាំនៃការភ្ជាប់ទំនាក់ទំនងការទូតរវាងប្រទេសទាំងពីរ ជាពិសេសចាប់ពីក្រោយប្រទេសកម្ពុជា បង្កើតព្រះរាជាណាច្រកទី២ឡើងវិញ ទំនាក់ទំនងនៃកិច្ចសហប្រតិបត្តិការទ្វេភាគី កសាងបាននូវមូលដ្ឋានគ្រឹះដ៏រឹងមាំ និងបង្កើតបានជាសម្ទុះជំរុញឱ្យទំនាក់ទំនងមិត្តភាពជាប្រពៃណីដ៏យូរអង្វែងរវាងកម្ពុជា និងវៀតណាម ឱ្យឡើងឈានដល់កម្រិតកំពូលថ្មីមួយដែលធានាបានស្ថិរភាពយូរអង្វែង នៃទំនាក់ទំនងរវាងប្រទេសទាំងពីរ បើទោះបីជាស្ថានភាពនយោបាយនៅក្នុងតំបន់ និងនៅលើពិភពលោក កំពុងតែមានការវិវត្តមិនប្រក្រតី ដោយកត្តាប្រកួតប្រជែងភូមិសាស្ត្រនយោបាយក្តី។

កម្ពុជា-វៀតណាម បានបន្តបង្កើនការផ្លាស់ប្តូរដំណើរទស្សនកិច្ចការទូតរវាងថ្នាក់ដឹកនាំជាន់ខ្ពស់នៃប្រទេសទាំងពីរជាប្រចាំ ហើយក្នុងជំនួបកំពូលរវាងប្រមុខដឹកនាំប្រទេសទាំងពីរ ភាគីទាំងពីរ បានសង្កត់ធ្ងន់លើសារៈសំខាន់ និងការប្តេជ្ញាចិត្តខ្ពស់ក្នុងការពង្រឹងនិងពង្រីកទំនាក់ទំនងនៃកិច្ចសហប្រតិបត្តិការ ជាប្រពៃណីរវាងបក្ស និងរដ្ឋ នៃប្រទេសទាំងពីរ។
គួរកត់សម្គាល់ថា ក្នុងខែវិច្ឆិកា ឆ្នាំ២០០០ ភាគីទាំងពីរ បានចេញសេចក្តីថ្លែងការណ៍ កំណត់គោលការណ៍អាទិភាពក្នុងទំនាក់ទំនងរវាងប្រទេសទាំងពីរ ដោយសង្កត់ធ្ងន់លើកិច្ចសហប្រតិបត្តិការលើវិស័យការពារជាតិ-សន្តិសុខ សេដ្ឋកិច្ច-ពាណិជ្ជកម្ម និងការអប់រំ-បណ្តុះបណ្តាល វប្បធម៌ សុខាភិបាល ពង្រីកសកម្មភាពផ្លាស់ប្តូរមិត្តភាព វប្បធម៌ កីឡា និងជួយគ្នាទៅវិញទៅមក៕