ប៉ូគីមថេង សុធីតា សម្រេចជ្រើសយកជីវិតគូ លែងចូលរួមការប្រកួតបវរកញ្ញាទៀតហើយ

អតីតម្ចាស់មកុដ Miss Grand Cambodia 2021 ប៉ូគីមថេង សុធីតា នៅថ្ងៃពុធ ដើមខែមេសា ឆ្នាំ២០២៦នេះ បានប្រកាសសម្រេចចិត្តជ្រើសយកជីវិតគូ និងលែងចូលរួមរាល់ប្រកួតបវរកញ្ញាទាំងអស់ ដោយអះអាងថា មិនមានគម្រោងវិលត្រឡប់ (Comeback) ទៅឆាកប្រកួតសម្រស់ណាមួយទៀតឡើយ។

ការសម្រេចចិត្តនេះ ធ្វើឡើងក្រោយពីមានការលើកទឹកចិត្តជាច្រើនពីសំណាក់ទស្សនិកជន និងអ្នកគាំទ្រ ដែលចង់ឃើញនាងវិលត្រឡប់មកប្រកួតម្ដងទៀត ប៉ុន្តែ ប៉ូគីមថេង សុធីតា បានបញ្ជាក់យ៉ាងច្បាស់ថា ខ្លួនចង់ផ្តោតលើជីវិតផ្ទាល់ខ្លួន និងសុភមង្គលគ្រួសារជាង។

ឆ្លៀតក្នុងឱកាសនេះ សុធីតា ក៏បានថ្លែងអំណរគុណដល់អ្នកគាំទ្រទាំងអស់ ដែលតែងតែគាំទ្រ និងផ្តល់កម្លាំងចិត្តឱ្យខ្លួនកន្លងមក។

គួររំលឹកថា ប៉ូគីមថេង សុធីតា បានក្លាយជាម្ចាស់មកុដក្នុងកម្មវិធី Miss Grand Cambodia 2021 និងធ្លាប់តំណាងឱ្យកម្ពុជា លើឆាកអន្តរជាតិ ដោយទទួលបានការគាំទ្រយ៉ាងខ្លាំងពីមហាជន។ ការដកខ្លួនរបស់នាងនៅពេលនេះ ទោះបីធ្វើឱ្យអ្នកគាំទ្រមួយចំនួនបង្ហាញការខកចិត្ត តែអ្នកមួយចំនួនទៀត ក៏បានបង្ហាញការគាំទ្រដល់ជម្រើសថ្មីរបស់នាង ក្នុងការចាប់ផ្តើមជីវិតផ្ទាល់ខ្លួន និងអនាគតថ្មីក្រៅឆាកបវរកញ្ញាផងដែរ៕ ដោយ៖ ចាន់រ៉ា