ត្រាំ ថា អាមេរិក អត់ពឹងលើប្រេងនាំចូលទេ តែបើប្រទេសណាអត់ប្រេង ចូលទៅ Hormuz យកខ្លួនឯងទៅ

ក្នុងសុន្ទរកថានៅសេតវិមានស្តីពីស្ថានការណ៍វិវឌ្ឍន៍នៃសង្គ្រាមអ៊ីរ៉ង់ ប្រមុខរដ្ឋាភិបាលទីក្រុងវ៉ាស៊ីនតោន ដូណាល់ ត្រាំ អះអាងថា អាមេរិកមិនត្រូវការប្រេងពីបរទេសទេ តែបើប្រទេសណាអត់មានប្រេង ចូលទៅមជ្ឈិមបូព៌ា យកខ្លួនឯងទៅ។

តាមការផ្សាយរបស់ BBC នៅថ្ងៃព្រហស្បតិ៍ទី២ខែមេសា លោកត្រាំនិយាយថា ប្រទេសទាំងឡាយណាដែលត្រូវការប្រេងពីមជ្ឈិមបូព៌ា គួរតែចេញមុខ ជួយធ្វើឲ្យច្រកសមុទ្រ Hormuz ឲ្យបើកចំហ។ ចំពោះប្រទេសទាំងឡាយណាដែលមិនអាចរកប្រេងឥន្ធនៈបាន ហើយប្រទេសជាច្រើនក្នុងចំណោមនោះបានបដិសេធចូលរួមក្នុងការកម្ចាត់ថ្នាក់ដឹកនាំរបស់អ៊ីរ៉ង់ សូមក្លាហានបន្តិចទៅ ហើយចូលទៅកាន់ច្រកសមុទ្រនោះ ដើម្បីកាន់កាប់និងការពារវាដោយខ្លួនឯងទៅ។

ស្របពេលជាមួយគ្នានោះ លោក ត្រាំ ក៏អំពាវនាវឲ្យបណ្តាប្រទេសនានា ងាកមកទិញប្រេងរបស់សហរដ្ឋអាមេរិកជំនួសវិញផងដែរ។

កាលមុន ប្រធានាធិបតីអាមេរិកលើកឡើងថា ខ្លួនមានប្រភពប្រេងគ្រប់គ្រាន់ រួមទាំងការនាំចូលពីវេណេស៊ុយអេឡាផងដែរ ដែលធ្វើឲ្យអាមេរិកលែងពឹងផ្អែកលើប្រេងពីតំបន់ឈូងសមុទ្រទៀតហើយ។

យ៉ាងណា សម្តីលោកត្រាំនាពេលនេះ ហាក់ដូចជាមិនបានជួយសម្រាលក្ដីបារម្ភដល់ទីផ្សារប្រេងពិភពលោកឡើយ ប៉ុន្តែបែរជារុញតម្លៃប្រេងសកលឲ្យបន្តហក់ឡើងខ្ពស់ទៅវិញ។

តម្លៃប្រេងឆៅ Brent ជាមធ្យមត្រូវបានជួញដូរក្នុងតម្លៃប្រហែល ១០០ ដុល្លារក្នុងមួយបារ៉ែល មុនពេលប្រធានាធិបតីចាប់ផ្តើមថ្លែងសន្ទរកថា ហើយតម្លៃបានឡើងចុះក្នុងអំឡុងពេលនៃការថ្លែង ប៉ុន្តែបច្ចុប្បន្នកំពុងបន្តឡើងថ្លៃបន្ថែមទៀត ដោយកើន ៤% គឺដល់ ១០៥,៣៨ ដុល្លារក្នុងមួយបារ៉ែល។

សូមជម្រាបជាថ្មី ច្រកសមុទ្រ Hormuz ត្រូវបិទជាស្ថាពរ ចាប់តាំងពីជម្លោះចាប់ផ្តើមកាលពីថ្ងៃទី ២៨ ខែកុម្ភៈ នៅពេលអ៊ីរ៉ង់ តបតទៅការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល ដោយការគំរាមកំហែងវាយប្រហារលើកប៉ាល់ទាំងឡាយណាដែលប្រើប្រាស់ផ្លូវទឹកនេះ៕

អត្ថបទ៖ សុខ សុវណ្ណ