ព័ត៌មានអន្ដរជាតិ

អង្គការហិរញ្ញវត្ថុអឺរ៉ុប ព្រមានថា សង្រ្គាមផ្តើមដោយ លោក ត្រាំ លើអ៊ីរ៉ង់ កំពុងធ្វើឱ្យសេដ្ឋកិច្ចសកលចួបវិបត្តិ

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

មកទល់ពេលនេះ សង្រ្គាមដែលផ្តើមដោយសហរដ្ឋអាមេរិក-អ៊ីស្រាអែល លើអ៊ីរ៉ង់ ទ្រង់ទ្រាយធំកាលពីចុងខែកុម្ភៈ មានរយៈពេលជិត៣ខែទៅហើយ។ សង្រ្គាមនោះ បានបំផ្លាញហេដ្ឋារចនាសម្ព័នភាគីទាំងបីយ៉ាងធ្ងន់ធ្ងរ សម្លាប់មនុស្សរាប់សិបរយនាក់និងធ្វើឱ្យសេដ្ឋកិច្ចពិភពលោកស្ថិតក្នុងភាពមិនច្បាស់លាស់ ដោយសារតែអ៊ីរ៉ង់បិទច្រកហ័រមូស ដែលជាផ្លូវទឹកនាំចេញប្រេងទៅសកល។

អង្គការឃ្លាំមើលហិរញ្ញវត្ថុកំពូលរបស់អឺរ៉ុប ព្រមានកាលពីថ្ងៃពុធថា សង្គ្រាមរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ជាមួយអ៊ីរ៉ង់និងគោលនយោបាយពន្ធគយរបស់លោក កំពុងជំរុញឱ្យសេដ្ឋកិច្ចពិភពលោកឆ្ពោះទៅរកវិបត្តិហិរញ្ញវត្ថុដ៏ធំមួយ។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ រូបភាព៖ The Washington Post

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់សារព័ត៌មាន AFP ចុះផ្សាយថ្ងៃទី២៧ ខែឧសភា ឆ្នាំ២០២៦ ធនាគារកណ្តាលអឺរ៉ុប(ECB) ធ្វើការវាយតម្លៃយ៉ាងទូលំទូលាយពីស្ថិរភាពហិរញ្ញវត្ថុពិភពលោកលើកឡើងថា ជម្លោះដែលកំពុងកើនឡើងរបស់ លោក ត្រាំ ជាមួយអ៊ីរ៉ង់និងគោលនយោបាយពាណិជ្ជកម្មដែលមិនស្ថិតស្ថេររបស់លោកកំពុងសាកល្បង លើភាពតានតឹងនៃភាពធន់ប្រព័ន្ធហិរញ្ញវត្ថុពិភពលោក ពេលបំណុលរដ្ឋបាលកំពុងកើនឡើង ហើយតម្លៃទ្រព្យសកម្មត្រូវបានលាតសន្ធឹងយ៉ាងហួសហេតុរួចទៅហើយ។

លោក Luis de Guindos អនុប្រធានធនាគារកណ្តាលអឺរ៉ុប ថ្លែងសារដ៏កម្រមួយមុនពេលចាកចេញពីតំណែងនៅចុងខែឧសភា ថា៖ « សង្គ្រាមនៅអ៊ីរ៉ង់ ដែលមានប្រតិបត្តិការ Operation Epic Fury កំពុងសាកល្បងប្រព័ន្ធហិរញ្ញវត្ថុពិភពលោក។ ខណៈផលប៉ះពាល់ពេញលេញនៃសង្គ្រាមនៅមិនទាន់ច្បាស់លាស់ ក្នុងដំណាក់កាលណាមួយទេ ហើយផលវិបាកសម្រាប់សេដ្ឋកិច្ចពិភពលោក និងស្ថិរភាពហិរញ្ញវត្ថុកាន់តែធ្ងន់ធ្ងរទៅៗ ពេលដែលវា[សង្រ្គាម] មានរយៈពេលយូរ»។

ធនាគារនេះក៏បានព្រមានដែរថា ការដកថយរបស់ លោក ត្រាំ ពីកិច្ចសហប្រតិបត្តិការពហុភាគី កំពុងធ្វើឱ្យការខូចខាតកាន់តែធ្ងន់ធ្ងរឡើង។ ភាពមិនប្រាកដប្រជាជុំវិញការប្តេជ្ញាចិត្តរបស់រដ្ឋបាលសហរដ្ឋអាមេរិក ចំពោះកិច្ចសហប្រតិបត្តិការពហុភាគីក៏កំពុងបង្កើនហានិភ័យផ្នែកគោលនយោបាយ ដែលវានឹងរំខានដល់សណ្តាប់ធ្នាប់អន្តរជាតិ។ ការប្រកាសពន្ធ ការផ្អាក និងភាពមិនច្បាស់លាស់នៃពន្ធបានក្លាយជាលក្ខណៈពិសេសនៃបរិយាកាសសកល។

កាលពីខែមេសា ឆ្នាំមុន លោក ត្រាំ បានបំបែកសម្ព័ន្ធភាពដែលធ្លាប់មាន ដោយដាក់ពន្ធគយយ៉ាងច្រើនលើប្រទេសរាប់សិប ប៉ុន្តែក្រោយមកតុលាការកំពូលបានលុបចោលចលនានេះវិញ ដោយអះអាងថា លោក ត្រាំ បានបំពានសិទ្ធិអំណាចជាប្រធានាធិបតី៕

សម្រួល៖ ណឺ មិនា