គុយវ៉ែត បើកប្រព័ន្ធការពារអាកាសបាញ់ស្ទាក់មីស៊ីលសត្រូវ ចំពេលអាមេរិក-អ៊ីរ៉ង់ ផ្ទុះអាវុធដាក់គ្នា

កងទ័ពនៃប្រទេសគុយវ៉ែត បានប្រកាសជាបន្ទាន់នៅថ្ងៃទី២៨ ខែឧសភានេះ ថា ប្រព័ន្ធការពារអាកាសរបស់ខ្លួន កំពុងតែធ្វើសកម្មភាពយ៉ាងសកម្ម ក្នុងការបាញ់ស្ទាក់ចាប់មីស៊ីល និងដ្រូនរបស់សត្រូវ ដែលបានបើកការវាយប្រហារសំដៅមកលើប្រទេសរបស់ខ្លួន។

តាម​ការ​ផ្សាយ​របស់ Reuters ទោះជាយ៉ាងណាក៏ដោយ ខាងកងទ័ពមិនបានបញ្ជាក់ប្រាប់ថា អាវុធហោះហើរដ៏គ្រោះថ្នាក់ទាំងនោះ ត្រូវបានបាញ់ចេញមកពីប្រភព ឬប្រទេសណាមួយនោះឡើយ។ ជាមួយគ្នានេះ អាជ្ញាធរគុយវ៉ែត បានពន្យល់ថា សំឡេងផ្ទុះខ្លាំងៗ ដែលប្រជាជនបានឮពាសពេញផ្ទៃប្រទេស គឺជារលកនៃការបាញ់កម្ទេចអាវុធសត្រូវពីសំណាក់ប្រព័ន្ធការពារអាកាស ហើយបានអំពាវនាវឱ្យប្រជាពលរដ្ឋទាំងអស់ គោរពតាមការណែនាំផ្នែកសន្តិសុខ និងសុវត្ថិភាពរបស់រដ្ឋាភិបាលឱ្យបានខ្ជាប់ខ្ជួនបំផុត។

ការវាយប្រហារដ៏គួរឱ្យភ័យខ្លាចនេះ បានកើតឡើងភ្លាមៗ បន្ទាប់ពីសហរដ្ឋអាមេរិក បានបើកការទម្លាក់គ្រាប់បែក កាលពីព្រឹកព្រលឹមថ្ងៃដដែលនេះ ទៅលើទីតាំងដែលវ៉ាស៊ីនតោន អះអាងថា ជាមជ្ឈមណ្ឌលបញ្ជាដ្រូនរបស់អ៊ីរ៉ង់ ដែលកំពុងគំរាមកំហែងដល់កងទ័ពអាមេរិក និងការដឹកជញ្ជូនទំនិញតាមកប៉ាល់ នៅក្នុងច្រកសមុទ្រហ័រមូស (Hormuz)។ ភ្លាមៗនោះ ភាគីអ៊ីរ៉ង់ ក៏បានចេញមុខទទួលស្គាល់ថា ពិតជាមានការវាយប្រហារពីអាមេរិកមែន ដោយវាបានកើតឡើងនៅក្បែរព្រលានយន្តហោះ Bandar Abbas ហើយអ៊ីរ៉ង់ក៏បានវាយបកវិញ ដោយបាញ់សំដៅទៅលើមូលដ្ឋានទ័ពអាកាសអាមេរិកមួយកន្លែង នៅវេលាម៉ោង ៤:៥០ នាទីព្រឹក ប៉ុន្តែមិនបានប្រាប់ថាជាមូលដ្ឋានទ័ពនៅទីណាឡើយ។ ដោយសារតែប្រទេសគុយវ៉ែត គឺជាទីតាំងឈរជើងនៃមូលដ្ឋានទ័ពអាកាសដ៏ធំរបស់អាមេរិក ទើបធ្វើឱ្យគេសង្ស័យថាអាចជាគោលដៅ ទោះបីជាគុយវ៉ែតមិនបាននិយាយចំៗថាជាស្នាដៃរបស់អ៊ីរ៉ង់ក៏ដោយ។

គួររំលឹកផងដែរថា បណ្តាប្រទេសនៅតំបន់ឈូងសមុទ្រ រួមទាំងប្រទេសគុយវ៉ែតផងនោះ ធ្លាប់បានរងគ្រោះ ដោយសារការវាយប្រហារដោយមីស៊ីល និងដ្រូនជាញឹកញាប់ អំឡុងពេលដែលមានសង្រ្គាមរវាងអាមេរិក-អ៊ីស្រាអែល ជាមួយនិងអ៊ីរ៉ង់។ បើទោះបីជាស្ថានការណ៍តានតឹងទាំងនោះ បានធូរស្រាលទៅវិញភាគច្រើន ចាប់តាំងពីកិច្ចព្រមព្រៀងឈប់បាញ់ បានចូលជាធរមានកាលពីខែមេសាកន្លងទៅនេះ ក៏ដោយ ប៉ុន្តែគេនៅតែសង្កេតឃើញមានការបង្ហោះដ្រូនវាយប្រហារចេញពីទឹកដីប្រទេសអ៊ីរ៉ាក់ សំដៅមកលើប្រទេសក្នុងតំបន់ឈូងសមុទ្រ រួមមាន អារ៉ាប៊ីសាអូឌីត និងគុយវ៉ែត ជាបន្តបន្ទាប់ ដែលធ្វើឱ្យតំបន់នេះនៅតែមិនទាន់មានសុវត្ថិភាពពេញលេញនៅឡើយទេ៕

ប្រែសម្រួល៖ ឈាង