ព័ត៌មានអន្ដរជាតិ

ការព្រមានដកខ្លួនពី NATO របស់ត្រាំ វាយប្រហារស្មារតីប្រទេសតូចៗនៅអ៊ឺរ៉ុប ប៉ុន្តែការចាកចេញមិនស្រួល ដូច ត្រាំ គិតទេ

បានផុស

២ ខែ មុន

នៅ

ថ្ងៃចន្ទ ៦ មេសា ២០២៦

ដោយ

ការខកចិត្តកាន់តែខ្លាំងឡើងរបស់រដ្ឋបាល លោក ដូណាល់ ត្រាំ ជាមួយសម្ព័ន្ធមិត្តណាតូ (NATO) ចំពោះការបដិសេធរបស់ពួកគេមិនចូលរួមក្នុងសង្គ្រាមនៅអ៊ីរ៉ង់ ធ្វើឱ្យអ្នកធ្វើគោលនយោបាយសងខាងនៃមហាសមុទ្រអាត្លង់ទិកត្រៀមខ្លួនសម្រាប់ការផ្លាស់ប្តូរថ្មី។

យោងតាមកាសែត The Hill ផ្សាយថ្ងៃទី៥ ខែមេសា ឆ្នាំ២០២៦ ទោះបីប្រធានាធិបតីសហរដ្ឋអាមេរិក លោក ដូណាល់ ត្រាំ ចង់ដកខ្លួនចេញពីសម្ព័ន្ធភាពជាមួយណាតូក៏ដោយ ក៏នឹងត្រូវការការយល់ព្រមពីសភាក្នុងការដកខ្លួនចេញពីស្ថាប័នយោធាអន្តរជាតិមួយនេះជាផ្លូវការដែរ ប៉ុន្តែមានជំហានផ្សេងទៀតដែលលោក ត្រាំ អាចធ្វើ ដើម្បីទប់ស្កាត់កិច្ចសហប្រតិបត្តិការរវាងពួកគេ។

សមាជិកនៃសម្ព័ន្ធមិត្តណាតូ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាជាសញ្ញានៃការព្រួយបារម្ភកាន់តែខ្លាំងឡើងពីការគំរាមកំហែងរបស់ លោក ត្រាំ នាំឱ្យអគ្គលេខាធិការអង្គការណាតូ លោក ម៉ាក រូតតេ (Mark Rutte) នឹងធ្វើដំណើរទៅកាន់ទីក្រុងវ៉ាស៊ីនតោននៅសប្តាហ៍ក្រោយ។

ខណៈអ្នកជំនាញនិងអតីតមន្ត្រីអឺរ៉ុបមិនទាន់ឃើញសហរដ្ឋអាមេរិកចាកចេញពីអង្គការណាតូនៅថ្ងៃស្អែកនៅឡើយទេ តែការគំរាមកំហែងរបស់ លោក ត្រាំ ក្នុងការបោះបង់ចោលអង្គការនេះ កំពុងវាយប្រហារស្មារតីនៃប្រទេសនានានៅទូទាំងមហាសមុទ្រអាត្លង់ទិកយ៉ាងខ្លាំង។

លោក David Cattler អ្នកស្រាវជ្រាវជាន់ខ្ពស់នៃមជ្ឈមណ្ឌលវិភាគគោលនយោបាយអឺរ៉ុប និយាយថា៖ « សំណួរពិតប្រាកដមិនមែនថាតើសហរដ្ឋអាមេរិកចាកចេញពីអង្គការណាតូឬអត់នោះទេ! ប៉ុន្តែ ថាតើសម្ព័ន្ធមិត្តនៅតែបន្តជឿទុកចិត្តលើសហរដ្ឋអាមេរិកឱ្យដឹកនាំឬអត់។ សម្ព័ន្ធភាពមិនបែកបាក់ពេលដែលប្រទេសនានាចាកចេញទេ វាបែកបាក់ពេលទំនុកចិត្តនោះរសាត់បាត់»។

លោក ត្រាំ បានរិះគន់អង្គការណាតូជាយូរមកហើយ ប៉ុន្តែនៅសប្តាហ៍នេះ លោកហាក់ស្តីបន្ទោសខ្លាំងបំផុត ពេលខ្លួនផ្តល់បទសម្ភាសន៍ឱ្យកាសែត The Telegraph នៅថ្ងៃពុធកន្លងទៅថា៖ « សមាជិករបស់ទីក្រុងវ៉ាស៊ីនតោនគឺហួសពីការពិចារណាឡើងវិញ»។

ចំណែក ក្រសួងការបរទេសប៉ូឡូញលើកឡើងលើបណ្តាញសង្គម X ថា៖ «ជាការពិតណាស់ អង្គការ NATO គឺជាមូលដ្ឋានគ្រឹះនៃសន្តិសុខរបស់យើង។ ពិតប្រាកដណាស់! យើងចង់ក្លាយជាសម្ព័ន្ធមិត្តល្អនិងស្មោះត្រង់របស់អាមេរិក ប៉ុន្តែយើងមិនអាចធ្វើពុតថាប្រធានាធិបតីសហរដ្ឋអាមេរិកកំពុងនិយាយអ្វីនោះទេ»។

អ្នកការទូតអឺរ៉ុបម្នាក់ទៀតនិយាយថា៖ « សម្ព័ន្ធភាពត្រូវគិតគូរពីការគំរាមកំហែងរបស់ លោក ត្រាំ ទោះបីជាយើងពិបាកក្នុងការយល់ពីជំហានប្រធានាធិបតីដកសហរដ្ឋអាមេរិកចេញពីអង្គការនេះទាំងស្រុងក៏ដោយ»។

អ្នកកាទូតទាំងនោះប្រាប់ The Hill ថា៖ « យើងមិនត្រូវត្រឡប់ទៅរឿងរ៉ាវចាស់វិញទេ។ ការឆ្លើយតបដ៏ល្អបំផុតគឺការកសាងសមត្ថភាពរបស់អឺរ៉ុបក្នុងការអនុវត្តប្រតិបត្តិការលើណាតូដោយគ្មានទីក្រុងវ៉ាស៊ីនតោន»។

ចំណែក លោក Cattler បន្តថា៖ « យើងជឿថាពេលនេះ សម្ព័ន្ធមិត្តមានការព្រួយបារម្ភតិចទេ ពីការដកខ្លួនចេញជាផ្លូវការរបស់សហរដ្ឋអាមេរិក តែអ្វីដែលបារម្ភខ្លាំងគឺភាពមិនអាចទាយទុកមុនបានរបស់សមាជិកដ៏សំខាន់បំផុតរបស់ណាតូ»៕

ប្រែសម្រួល៖ ណឺ មិនា