សាយ បង្ហាញការយល់ឃើញ រវាងសេរីភាពនៃផ្សាយមាតិកាផ្ទាល់ខ្លួន និងការបញ្ចេញមតិដែលមិនផ្ទុយពីច្បាប់

លោក អួន បឋម ហៅ SAI បានអំពាវនាវឱ្យសាធារណជនគោរពសិទ្ធិបញ្ចេញមតិ និងសេរីភាពក្នុងការជ្រើសរើសមាតិកាលើបណ្តាញសង្គម ដោយលើកឡើងថា បណ្តាញសង្គមគួរតែជាកន្លែងសម្បូរបែប ដែលអនុញ្ញាតឱ្យមនុស្សគ្រប់រូបបង្ហាញអត្តសញ្ញាណ និងស្ទីលផ្ទាល់ខ្លួន ក៏ដូចជាសេរីភាពក្នុងការបញ្ចេញមតិដែលមិនផ្ទុយពីច្បាប់។

លោក អួន បឋម ដែលមហាជនស្គាល់ថា SAI នៅថ្ងៃអង្គារ៍ ទី០៧ ខែមេសា ឆ្នាំ២០២៦ បានចេញសារណែនាំទៅកាន់សាធារណជន ដោយលើកឡើងអំពីសារៈសំខាន់នៃសិទ្ធិបញ្ចេញមតិ និងសេរីភាពក្នុងការជ្រើសរើសទស្សនាមាតិកានៅលើបណ្តាញសង្គម។

ក្នុងសារដែលបានចែករំលែកនេះ លោកបានបញ្ជាក់ថា បណ្តាញសង្គមគួរត្រូវបានមើលឃើញជាកន្លែងសម្បូរបែបនៃការផ្សព្វផ្សាយមាតិកា ដែលអនុញ្ញាតឱ្យមនុស្សគ្រប់រូបបង្ហាញអត្តសញ្ញាណ និងស្ទីលផ្ទាល់ខ្លួនដោយសេរី ដែលគ្រាន់តែប្រាកដថាស្ថិតនៅក្រោមច្បាប់ និងក្រមសីលធម៌។

ហេតុនេះ លោកបានណែនាំដល់អ្នកប្រើប្រាស់ថា ប្រសិនបើជួបប្រទះមាតិកាណាដែលមិនសមស្រប ឬមិនយល់ច្បាស់ គួរជ្រើសរើស “អូសរំលង” ជាជម្រើសល្អប្រសើរជាងការរិះគន់ដោយអវិជ្ជមាន។

លោកថា “មាតិកាណាដែលយើងមើលមិនយល់ យើងអូសរំលងទៅបងប្អូនអើយ social media វាគួតែជាកន្លែងសំបូរបែប យើងគ្រប់គ្នាគួមានសិទ្ធិក្នុងការបង្ហាញ style យើង និងមានសេរីភាពក្នុងការនិយាយដែលមិនផ្ទុយពីច្បាប់”។

សាររបស់ SAI ត្រូវបានមើលឃើញថា ជាការរំលឹកដល់សាធារណជនឱ្យប្រើប្រាស់បណ្តាញសង្គមដោយមានការយល់ដឹង ការគោរពគ្នាទៅវិញទៅមក និងការទទួលខុសត្រូវក្នុងការបញ្ចេញមតិ៕