សាយ អះអាងថា ថវិកាទាំងអស់ប្រមូលបានពីការ “រត់ដោយបេះដូង” ត្រូវប្រគល់ជូនសាលាកុមារអូទីហ្សឹម

ដូចដែលទស្សនិកជនបានដឹងហើយកាលពីថ្មីៗកន្លងមកតារាចម្រៀងមានប្រជាប្រិយភាពលោក អួន បឋម ហៅ សាយបានប្រកាសត្រៀមព្រឹត្តិការណ៍ “រត់ដោយបេះដូង” ជាលើកទី២ ដើម្បីរៃអង្គាសថវិកាជួយសាលារៀនទន្សាយ (កុមារអូទីហ្សឹម)។

សាយ បញ្ជាក់ ឱ្យដឹងថា រាល់ថវិកាដែលអ្នកទាំងអស់ គ្នាចុះឈ្មោះមកទាំងអស់ (១០០%) បរិច្ចាគទៅកាន់អង្គការសាលាទន្សាយ។ ចូលរួមរត់ដោយបេះដូងជាមួយពួកយើងដើម្បីអនាគតកុមារអូទីហ្សឹម នឹងដើម្បីកិច្ចការងារមនុស្សធម៌។

ជាមួយគ្នានៃការប្រកាសត្រៀមរៀបចំព្រឹត្តិការណ៍ “រត់ដោយបេះដូង” ជាលើកទី២នេះដែរ លោកសាយ បានបញ្ជាក់ និង អំពាវនាវទៅកាន់សប្បុរសជនជាថ្មីថា សម្រាប់ថវិការដែលបានមកពីការបរិច្ចាគទាំងអស់ គឺត្រូវឧបត្ថម្ភផ្តល់ជូនដល់សាលារៀនទន្សាយ (កុមារអូទីហ្សឹម) ដើម្បីអនាគតកុមារ។

លោក សាយ បានឱ្យដឹងថាព្រឹត្តិការណ៍ “រត់ដោយបេះដូងលើកទី២ ឆ្នាំ២០២៥” រៀបចំឡើងក្នុងគោលបំណងរៃអង្គាសថវិកាសប្បុរសធម៌សម្រាប់អង្គការសាលារៀនទន្សាយ ក្នុងបេសកម្មថែទាំ និងបង្ហាត់បង្រៀនទៅដល់កុមារអូទីហ្សឹម (Autism) និងលើកកម្ពស់ការថែទាំសុខភាពតាមរយ:ការរត់។

តារាចម្រៀង សាយ បាននិយាយទៀតថាកម្មវិធីរត់ពីចម្ងាយចាប់ពីថ្ងៃទី១ ខែឧសភា ឆ្នាំ២០២៥ រហូតដល់ថ្ងៃទី៣១ខែឧសភា ឆ្នាំ២០២៥ ។ កម្មវិធីពិសេសរត់ដោយបេះដូងជាមួយកុមារអូទីហ្សឹម ថ្ងៃទី ៣១ ខែឧសភា ឆ្នាំ២០២៥ នៅពហុកីឡដ្ឋានជាតិអូឡាំពិក។

បន្ថែមពីនេះលោក សាយ លើកឡើងដោយអំពាវនាវដែរថា ពួកយើងចូលរួមទាំងអស់គ្នាបរិច្ចាគទៅកាន់អង្គការសាលារៀនទន្សាយ ដើម្បីអនាគតកុមារអូទីហ្សឹម។ ការចូលរួមសហការនេះគឺជំរុញឱ្យមានការយល់ដឹងបន្ថែមពីស្ថានភាព អូទីហ្សឹម ដែលកំពុងកើតមាននៅក្នុងព្រះរាជាណាចក្រកម្ពុជាហើយនឹងបានស្វែងយល់ពីភាពលះបង់របស់អ្នកគ្រូ លោកគ្រូ ដែលបានតស៊ូព្យាយាមក្នុងការថែទាំ និងបង្ហាត់បង្រៀនកុមារអូទីហ្សឹម ជាពិសេសឪពុកម្តាយរបស់កុមារអូទីហ្សឹមផ្ទាល់ ដែលជាកត្តាជំរុញទឹកចិត្តទៅដល់មហាជនឱ្យមានការគាំទ្រ៕ អត្ថបទ៖ ចាន់រ៉ា