ជីវិតកម្សាន្ដ

សាយ រំលឹករឿងជាង ១០ ឆ្នាំមុន ជីវិតឆ្លងកាត់គ្រោះថ្នាក់ច្រើន និងហេតុការណ៍ដ៏អាក្រក់បំផុត

បានផុស

១ year មុន

នៅ

ថ្ងៃចន្ទ ២០ មករា ២០២៥

ដោយ

ទោះបីជាមកដល់ពេលនេះពេលវេលាដ៏រន្ធត់មួយបានកន្លងផុតទៅអស់រយៈកាលប្រមាណជាង ១០ ឆ្នាំ ហើយ ក៏ពិតមែន តែតារាចម្រៀងប្រុស Original Song លោក អួន បឋម ហៅ សាយ នៅតែចងចាំថ្ងៃដ៏អាក្រក់នោះមិនភ្លេចឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះហេតុការណ៍ដ៏អាក្រក់ និងសែនឈឺចាប់ដែលធ្វើឲ្យលោក សាយ នៅតែបន្តចងចាំមិនអាចបំភ្លេចបានកាលពីអំឡុងដើមឆ្នាំ ២០១៣ នោះ ដោយសារទីកន្លែងជម្រក(ផ្ទះ)របស់ សាយ ត្រូវបានបំផ្លិចបំផ្លាញក្រោមចង្កូមព្រះអគ្គី(ភ្លើង) ដោយកាលណោះលោកក៏ស្ថិតក្នុងហេតុការណ៍ដ៏គ្រោះថ្នាក់នោះផងដែរ។

រម្លឹកដល់រឿងអតីតកាលខាងលើ តារាចម្រៀង លោក សាយ បានរៀបរាប់ថា “ជីវិតខ្ញុំដូចជាឆ្លងកាត់គ្រោះថ្នាក់ច្រើនដល់ហើយ សាយ នឹកស្រណោះកាលនោះភ្លើងឆេះផ្ទះខ្ញុំនៅរតនគិរី ខ្ញុំទើបដល់ផ្ទះប្រហែលម៉ោង ១១ យប់ ងូតទឹក ហើយរៀបចូលដេក មិនទាន់បានដេកផង ស្រាប់តែឆេះរាលពីមុខផ្ទះមករត់ចែកជើងគ្នា ជញ្ជូនអីវ៉ាន់ចេញទាំងកណ្តាលយប់ ទាំងគ្មានស្បែកជើង សំណាងហើយអត់មុតអីពេលនោះ”។

លោក សាយ បន្តទៀតថា មិនត្រឹមតែឆេះផ្ទះទេ ឆេះឡាន pick up Toyota Hilux tiger មួយទៀត។ សំណាងដែលអត់មានអ្នកណាគ្រោះថ្នាក់អ្វី តែដល់ពេលលោកឃើញគេឆេះផ្ទះ ឬ ឆេះអ្វីធ្ងន់ៗ ម្តងៗ ដូចរៀងនឹកឃើញភ័យៗ ដល់ហេតុការណ៍កាលផ្ទះខ្លួន។

ជាមួយគ្នានេះ លោកបន្ថែមថា សង្ឃឹមថាហេតុការណ៍បែបនេះ នឹងមិនកើតឡើងចំពោះអ្នកទាំងអស់ និងសូមឲ្យប្រុងប្រយ័ត្នទាំងអស់គ្នា។

យ៉ាណាមិញគេឃើញមានមហាជន និងអ្នកគាំទ្រមួយចំនួន សម្តែងការស្លុតចិត្តគ្រប់គ្នា បន្ទាប់ពីបានដឹងជុំវិញបញ្ហាដែលលោក សាយ បានបង្ហើបនូវរឿងរ៉ាវអតីតកាលរបស់ខ្លួន កាលពីអំឡុងឆ្នាំ ២០១៣ នៅឯស្រុកកំណើត នាទឹកដីខេត្តរតនគិរី៕

អត្ថបទ ៖ ចាន់រ៉ា