អគ្គិភ័យឆេះបន្ទប់ខុនដូជាន់ទី៣៥ នៅផ្លូវ ៦០ម៉ែត្រ​ខូចខាតស្ទើរទាំងស្រុង និងបណ្ដាលឲ្យជនបរទេសម្នាក់រងរបួស

បន្ទប់ជាន់ទី៣៥ នៃអគារខុនដូ Urban Village ត្រូវបានអគ្គិភ័យឆាបឆេះ បង្កខូចខាតអស់ស្ទើរទាំងស្រុង និងបណ្តាលអោយជនជាតិបរទេសម្នាក់រងរបួស។ ហេតុការណ៍នេះបានកេីតឡេីងកាលពីវេលាម៉ោង១០និង៥០នាទី យប់ ថ្ងៃទី០៩ ខែមេសា ឆ្នាំ២០២៦ ស្ថិតតាមបណ្ដោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានី ភ្នំពេញ។

តាមប្រភពពីប្រជាពលរដ្ឋបានអោយដឹងថា មុនកើតហេតុគេឃើញពីចម្ងាយមានភ្លើងនៅបន្ទប់ខុនដូជាន់ទី៣៥ ប៉ុន្តែដោយសារមើលពីចម្ងាយឆ្ងាយ ទើបមិនចាប់អារម្មណ៍ស្មានគ្រាន់តែជាភ្លើងបន្ទប់ធម្មតា។ លុះមួយសន្ទុះក្រោយមក អណ្តាតភ្លើងដែលគាត់ឃើញនោះ បែរជាឡើងកាន់តែខ្លាំងទៅៗ ហើយថែមទាំងមានផ្សែងខ្មៅហ៊ុយខ្មួលខ្មាញ់ ពាសពេញផ្ទៃមេឃ បង្កអោយភ្ញាក់ផ្អើលដល់សមត្ថកិច្ចមូលដ្ឋានចុះកាន់ទីតាំង ដើម្បីបន្តរាយការណ៍ទៅកាន់មន្រ្តីជំនាញពន្លត់អគ្គិភ័យ ជួយអន្តរាគមន៍អោយទាន់ពេលវេលា។

ករណីអគ្គិភ័យនេះបង្កការខូចខាតបន្ទប់ចំនួន ០១ រួមនឹងសម្ភារៈប្រើប្រាស់អស់ស្ទើរទាំងស្រុង និងបង្កអោយជនជាតិបរទេសម្នាក់រងរបួសបញ្ជូនទៅកាន់មន្ទីរពេទ្យ។ ក្នុងប្រតិបត្តិការអន្តរាគមន៍ កម្លាំងជំនាញបានប្រើរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ រថយន្តជំនួយក្រសួងមហាផ្ទៃមកដល់ទីតាំងខាងលើជាច្រើនគ្រឿង បាញ់រហូតពន្លត់រលត់ជាស្ថាពរ។ ចំពោះមូលហេតុ សមត្ថកិច្ចជំនាញកំពុងបន្តស្រាវជ្រាវរកមូលហេតុនៅចំណុចខុនដូខាងលើ៕

អត្ថបទ៖ រដ្ឋា