ចិនព្រមានអាមេរិកថា ការបិទផ្លូវសមុទ្រអ៊ីរ៉ង់គឺជា «ច្បាប់ព្រៃ» បង្កគ្រោះថ្នាក់ដល់ពិភពលោក

ភាពតានតឹងនៅលើឆាកអន្តរជាតិបានកើនឡើងដល់កម្រិតថ្មីមួយទៀត បន្ទាប់ពីប្រទេសចិនបានចេញមុខរិះគន់យ៉ាងចាស់ដៃទៅលើសហរដ្ឋអាមេរិក ចំពោះការសម្រេចចិត្តដាក់បម្រាមបិទផ្លូវសមុទ្រនៅកំពង់ផែអ៊ីរ៉ង់។

ចេញ​ផ្សាយ​ថ្ងៃទី​១៤​មេសា​ សារព័ត៌មាន UPI បាន​ឲ្យ​ដឹង​ថា អ្នកនាំពាក្យក្រសួងការបរទេសចិន លោក Guo Jiakun បានថ្លែងក្នុងសន្និសីទសារព័ត៌មាន​ថា សកម្មភាពនេះគឺជាទង្វើដ៏ «គ្រោះថ្នាក់ និងគ្មានការទទួលខុសត្រូវ» ដែលកំពុងតែធ្វើ​ឲ្យ​ស្ថានការណ៍កាន់តែតានតឹង និងគំរាមកំហែងដល់កិច្ចព្រមព្រៀងឈប់បាញ់ដែលកំពុងមានភាពផុយស្រួយ។

មិនត្រឹមតែរិះគន់ប៉ុណ្ណោះទេ ទីក្រុងប៉េកាំងក៏បានព្រមានដោយផ្ទាល់ទៅកាន់ទីក្រុងវ៉ាស៊ីនតោនថា បើអាមេរិកហ៊ានអនុវត្តការដំឡើងពន្ធ ៥០% លើទំនិញចិន ដោយយកលេសថា ចិនលក់ប្រព័ន្ធការពារដែនអាកាស​ឲ្យ​អ៊ីរ៉ង់នោះ ចិននឹងឆ្លើយតបវិញយ៉ាងដាច់ខាត។ ចិនបានច្រានចោលព័ត៌មានដែលថាខ្លួនត្រៀមផ្គត់ផ្គង់ឧបករណ៍យោធាឲ្យ​អ៊ីរ៉ង់ ដោយចាត់ទុកថាជារឿងដែលប្រឌិត​ឡើងទាំងស្រុង។

ចំណែក​ឯ​ប្រធានាធិបតីចិន លោក ស៊ី ជីនពីង បានសង្កត់ធ្ងន់ថា ពិភពលោកមិនគួរអនុញ្ញាត​ឲ្យ​ខ្លួនឯងវិល​ទៅ​​​រក «ច្បាប់​ព្រៃ» ដែលជាកន្លែងដែលច្បាប់អន្តរជាតិមិនត្រូវបានគោរព ឬត្រូវគេអនុវត្តតាមតែចិត្តចង់នោះទេ។

ស្របពេលជាមួយគ្នានេះ ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani បានផ្ញើលិខិតទៅកាន់អគ្គលេខាធិការអង្គការសហប្រជាជាតិ លោក Antonio Guterres ដោយចោទប្រកាន់ថា ការបិទផ្លូវសមុទ្ររបស់អាមេរិកគឺជាការរំលោភយ៉ាងធ្ងន់ធ្ងរលើអធិបតេយ្យភាពរបស់អ៊ីរ៉ង់ និងជាសកម្មភាពឈ្លានពានផ្ទុយពីធម្មនុញ្ញអង្គការសហប្រជាជាតិ៕

ប្រែសម្រួល៖ ឈាង