អភិបាលខេត្តក្រចេះ​ ប្តេជ្ញាបោសសម្អាតបទល្មើសតាមប្រព័ន្ធបច្ចេកវិទ្យា (ONLINE SCAMS)

អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត​ក្រចេះ លោក​ វ៉ា​ ថន​ ថន​ បានប្តេជ្ញាយ៉ាងម៉ឺងម៉ាត់ក្នុងការបោសសម្អាតបទល្មើសតាមប្រព័ន្ធបច្ចេកវិទ្យា (ONLINE SCAMS) នៅទូទាំងខេត្តក្រចេះ។

អភិបាលខេត្តក្រចេះបានលើកឡើងបែបនេះ នៅក្នុងកិច្ចប្រជុំផ្សព្វផ្សាយផែនការស្ដីពីការបន្តនិរន្តរភាពយុទ្ធនាការបោសសំអាតការឆបោកតាមប្រព័ន្ធបច្ចេកវិទ្យា (online scam) នៅខេត្តក្រចេះ ក្រោមវត្តមានចូលរួមពីលោក ហ៊ូ សាគុណ រដ្ឋលេខាធិការក្រសួងមហាផ្ទៃ នាពេលកន្លងទៅថ្មីៗនេះ។

កាលពីថ្ងៃទី១៦ ខែកក្កដា ឆ្នាំ២០២៥  លោក វ៉ា ថន អភិបាលខេត្ត​បានដឹកនាំកម្លាំងចម្រុះចុះបង្ក្រាបទីតាំងសង្ស័យមានប្រព្រឹត្តល្បែងតាមប្រព័ន្ធបច្ចេកវិទ្យាមួយកន្លែង ក្នុងភូមិសាស្ត្រឃុំ២ធ្នូ ស្រុកស្នួល ខេត្តក្រចេះ ដោយ​ឃាត់ខ្លួនជនបរទេសបានចំនួន ៣១១ នាក់ មាន​ជនជាតិវៀតណាម ថៃ បង់ក្លាដេស ឥណ្ឌូនេស៊ី ចិន មីយ៉ាន់ម៉ា និងរឹបអូសដកហូតបាននូវវត្តុតាងរួមមានកុំព្យូទ័រលើតុចំនួន ៤៥៦ គ្រឿង និងទូរសព្ទដៃ ៣,០៥៥គ្រឿង។

ជាមួយគ្នានោះលោក​អភិបាល​ខេត្ត​បាន​ណែនាំ​ឲ្យ​ពង្រឹងកិច្ចសហការអនុវត្តវិធានការរដ្ឋបាលជាប្រចាំ ដើម្បីស្វែង​រកក្រុមដែលបានបំបែកលួចលាក់ធ្វើសកម្មភាពនៅតាមសណ្ឋាគារ ផ្ទះសំណាក់ និងផ្ទះជួល និង​បន្តអនុវត្តវិធានការក្តៅចុះបង្ក្រាបនៅទីតាំងដែលត្រូវបានកំណត់ថា មានសកម្មភាពបទល្មើសឆបោកតាមប្រព័ន្ធបច្ចេកវិទ្យា​

ជាមួយ​គ្នា​នេះ ត្រូវ​ដាក់គោលដៅ​ត្រួតពិនិត្យនៅតាមដងផ្លូវ ដើម្បីពិនិត្យយានយន្តមានសង្ស័យជម្លៀសជនបរទេសពីទីតាំងមួយទៅទីតាំងមួយ៕

អត្ថបទ៖ ប្រុញ វិធិន