ព័ត៌មានអន្ដរជាតិ

ស្រោមអនាម័យលក់ដាច់ទ្វេដងក្នុងប្រទេសធូរស្រាលកូវីដ-១៩ក្នុងត្រីមាសទី១

បានផុស

៥ years មុន

នៅ

ថ្ងៃសៅរ៍ ១ ឧសភា ២០២១

ដោយ

ការលក់ស្រោមអនាម័យបានកើនឡើងនៅក្នុងបណ្តាប្រទេសជាច្រើនមានទាំងប្រទេសចិនផងដែលប្រទេសទាំងនោះបានធូរស្រាលពីបំរាមរឹតត្បិតកូវីដ-១៩។ នេះបើតាមការឲ្យដឹងពីក្រុមហ៊ុនលក់ទំនិញយក្ស Reckitt ។

ក្រុមហ៊ុនបានរាយការណ៍ថា ការកើនឡើងពីរដងនៃការលក់ស្រោមអនាម័យម៉ាក Durex នៅក្នុងរយៈពេលត្រីមាសទី១ ឆ្នាំ២០២១ បើប្រៀបធៀបនឹងកាលពីមួយឆ្នាំកន្លងទៅ។ ប៉ុន្តែផ្ទុយទៅវិញ តម្រូវការផលិតផលសុខភាពទូទៅបានធ្លាក់ចុះ ដោយសារអតិថិជនបានរក្សាទុកនៅក្នុងទូទឹកកក។

ប្រធានក្រុមហ៊ុន Reckitt បានបង្ហាញថា ការលក់សាប៊ូលាងចាន Lysol និងថ្នាំកម្ចាត់មេរោគ Dettol នៅតែមានតម្រូវការខ្ពស់ ដោយសារត្រូវការអនាម័យកាន់តែខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាប់ផ្តើមរាតត្បាតជំងឺឆ្លងកូវីដ-១៩កាលពីឆ្នាំមុន ក្រុមហ៊ុនបាននិយាយថា មនុស្សមានការរួមភេទទាប ដោយសារវិបត្តិកូវីដ-១៩។ ផ្ទុយទៅការលក់ស្រោមអនាម័យ Durex បានហក់ឡើងខ្ពស់នៅពេលដែលបំរាមគម្លាតសង្គមត្រូវបានបន្ធូរបន្ថយនៅរដូវក្តៅនេះ។

នៅផ្នែកអាហារូបត្ថម្ភ ដែលរាប់ទាំងផលិតផលម្សៅទឹកដោះគោកូនក្មេង ការលក់ក្នុងត្រីមាសទី១បានធ្លាក់ចុះ១២.៣% ប៉ុន្តែការលក់ផលិតផលអនាម័យបានកើនឡើង២១.១%។ ចំនួនសរុបការលក់ក្នុងរយៈពេល៣ខែនៃដើមឆ្នាំ២០២១នេះមានចំនួនទឹកប្រាក់ ៣.៥ប៊ីលានដុល្លារអាមេរិក ពោលគឺធ្លាក់ចុះ១.១%។

នាយកប្រតិបត្តិលោក Laxman Narasimhan បាននិយាយថា ៖«តម្រូវការសាប៊ូលាងចាន និងថ្នាំកម្ចាត់មេរោគនៅតែបន្តលក់ដាច់ច្រើន ដោយសារអ្នកប្រើប្រាស់ត្រូវការដើម្បីកម្ចាត់វីរុសចម្លង និងត្រូវការរក្សាអនាម័យដើម្បីសុខភាព»។

ក្រុមហ៊ុនបានរាយការណ៍ថា ធ្លាក់ចុះ១៦.៤%សម្រាប់ការលក់ផលិតផលថែរក្សាសុខភាពដូចជាថ្នាំផ្តាសាយ Nurofen ឬ Strepsils ជាដើម។

លោក Narasimhan បន្ថែមថា នៅក្នុងបណ្តាប្រទេសដែលមានអត្រាឆ្លងកូវីដ-១៩ ទាប និងខ្ពស់ ប្រជាជនបានថយចុះពីការលាងដៃ ឬប្រើប្រាស់ទឹកអនាម័យ បើទោះជាការប្រើនៅកម្រិតខ្ពស់ជាងមុនពេលកូវីដ-១៩ក៏ដោយ។ ដូចជាថ្នាំកម្ចាត់មេរោគ Dettol លក់ដាច់ខ្ពស់នៅប្រទេសឥណ្ឌា ប៉ុន្តែនៅប្រទេសចិនធ្លាក់ចុះវិញ។

ផលិតផលសុខភាពផ្លូវភេទមានការកើនឡើងយ៉ាងខ្លាំងក្នុងការលក់នៅបណ្តាប្រទេសដែលធូរស្បើយពីកូវីដ-១៩ដូចជាប្រទេសចិន ក៏ដូចជាផ្នែកខ្លះនៃសហរដ្ឋអាមេរិក និងប្រទេសនៅអឺរ៉ុបមួយចំនួន៕

ប្រែសម្រួល៖ វីរបុត្រ
ប្រភព៖ BBC

Related Topics:កូវីដ-១៩