តម្លៃប្រេងអន្តរជាតិធ្លាក់ចុះក្រោម ១០០ ដុល្លារ/បារ៉ែល ជុំវិញវឌ្ឍនភាពការចរចាអាមេរិក-អ៊ីរ៉ង់

តម្លៃប្រេងអន្តរជាតិ​បាន​ធ្លាក់ចុះក្រោម ១០០ ដុល្លារ/បារ៉ែល សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទនេះ ដែលបណ្ដាលមកពីវឌ្ឍនភាពនៃការចរចាស្វែងរកសន្តិភាពរវាងសហរដ្ឋអាមេរិក និងអ៊ីរ៉ង់ ទោះបីជាបញ្ហាធំៗ ដូចជាការបិទច្រកសមុទ្រហ័រមូហ្ស នៅបន្តស្រពេចស្រពិលក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ ​

តម្លៃប្រេងម៉ាក Brent បាន​ធ្លាក់ចុះ ៤,៧១ ដុល្លារ ឬ ៤,៥៥% ដល់ ៩៨,៨៣ ដុល្លារ/បារ៉ែល គិតត្រឹមម៉ោង ៧ កន្លះព្រឹកនៅទីក្រុងតូក្យូ ប្រទេសជប៉ុន ខណៈតម្លៃប្រេងអាមេរិក WTI បាន​ធ្លាក់ចុះ ៤,៥៧ ដុល្លារ ឬ ៤,៧៣% ដល់ ៩២,០៣ ដុល្លារ/បារ៉ែល។ ​

អ្នកវិភាគទីផ្សារនិយាយថា ការធ្លាក់ចុះយ៉ាងដូច្នេះ បណ្ដាលមកពីសុទិដ្ឋិនិយមនៃដំណោះស្រាយបញ្ហាអ៊ីរ៉ង់។ កាលពីថ្ងៃសៅរ៍ ប្រធានាធិបតីអាមេរិក លោក ដូណាល់ ត្រាំ បាននិយាយថា ​អាមេរិក និងអ៊ីរ៉ង់ បាន «ចរចាជាចម្បង» លើអនុស្សរណៈនៃការយោគយល់គ្នាលើកិច្ចព្រមព្រៀងសន្តិភាព ដែលនឹងបើកច្រកសមុទ្រហ័រមូហ្សឡើងវិញ។

យ៉ាងណាមិញ​ ភាគីទាំង២នៅតែមានការខ្វែងគំនិតគ្នាលើបញ្ហាលំបាកមួយចំនួន ដោយលោក ត្រាំ បាននិយាយកាលពីថ្ងៃអាទិត្យថា លោកបានប្រាប់តំណាងរបស់លោកកុំឱ្យប្រញាប់ប្រញាល់ចូលទៅក្នុងកិច្ចព្រមព្រៀងណាមួយជាមួយអ៊ីរ៉ង់។

អ្នកវិភាគបន្ថែមថា ទោះបីបន្ត​មានហានិភ័យជុំវិញកិច្ចព្រមព្រៀងសន្តិភាព និងច្រកសមុទ្រហ័រមូហ្សក៏ដោយ ស្ថានភាពកំពុងបង្ហាញសញ្ញានៃភាពប្រសើរឡើង ដែលអាចជួយកាត់បន្ថយតម្លៃប្រេងក្នុងរយៈពេលខ្លី។ ​ប៉ុន្តែពួកគេ​ជឿថា វានឹងចំណាយពេលច្រើនខែដើម្បីឱ្យ​ការដឹកជញ្ជូនប្រេង និងរោងចក្រថាមពលដែលខូចខាត ​អាច​ដំណើរការប្រក្រតីដូចមុនជម្លោះឡើងវិញ៕