ទឹកជន់លិច​ បិទ​កំណាត់​ផ្លូវជាតិ​ទៅ​ខេត្តកំពង់ចាម ហាម​រថយន្ត​ធុន​ធ្ងន់បើក​ឆ្លង​កាត់​

រដ្ឋបាលខេត្តកំពង់ចាម បាន​ជូនដំណឹងពី​ការ​បិទកំណាត់ផ្លូវលេខ៧ នៅត្រង់ចំណុចបង្គោលលេខ៨៩ ដល់បង្គោល​លេខ​៩១ ស្ថិតក្នុងភូមិខិតធំ ឃុំខ្វិតធំ ស្រុកព្រៃឈរជាបណ្តោះអាសន្ន ដោយ​មិនអនុញ្ញាតឱ្យរថយន្តធុនធ្ងន់ និងរថយន្តក្រុមហ៊ុនដឹកជញ្ជូនធុនធ្ងន់គ្រប់ប្រភេទឆ្លងកាត់​ឡើយ។

ខណៈ​ដែល​ខេត្តកំពង់ចាម កំពុងទទួលរងនូវឥទ្ធិពលនៃជ្រលងសម្ពាធទាបឥណ្ឌា ដែលបណ្តាលឱ្យភូមិសាស្ត្រក្នុងខេត្តកំពង់ចាមមួយចំនួន រងផលប៉ះពាល់ជំនន់ទឹកភ្លៀង ធ្វើឱ្យជន់លិចផ្លូវខេត្តនិងផ្លូវជាតិមួយចំនួន អាជ្ញាធរ​ខេត្ត​បាន​សម្រេច​ចាត់វិធានការ ដើម្បី​ទប់ស្កាត់ការរងខូចខាតផ្លូវជាតិ និងអាចបង្កឱ្យមានគ្រោះថ្នាក់ ក្នុងការធ្វើចរាចរណ៍លើកំណាត់ផ្លូវជាតិលេខ៧ នេះ។

ជាមួយ​គ្នា​នេះ អាជ្ញាធរ​ក៏​បាន​ណែនាំ​ដល់ម្ចាស់រថយន្តធុនធ្ងន់ និងរថយន្តក្រុមហ៊ុនដឹកជញ្ជូនធុនធ្ងន់គ្រប់ប្រភេទ ដែលធ្វើ ដំណើរចេញពីក្រុងកំពង់ចាម និងស្រុកកំពង់សៀម ឆ្លងកាត់ក្នុងភូមិសាស្ត្រដូចត្រូវ​បិទ ឆ្ពោះទៅស្រុកជើងព្រៃ និងរាជធានីភ្នំពេញ ត្រូវវៀងតាមផ្លូវជាតិលេខ ៦០ (ផ្លូវទឹកឆា) ឬធ្វើដំណើរតាមផ្លូវជាតិលេខ៧០ ត្រង់កែងផ្សារព្រៃទទឹង និងផ្លូវខេត្ត​លេខ​២៧០ ឆ្លងកាត់តាមស្រុកកងមាស ឆ្ពោះទៅរកាកោងខេត្តកណ្តាល។

យោងសេចក្តីជូនដំណឹងរបស់ក្រសួងធនធានទឹក និងឧតុនិយម ស្តីពីស្ថានភាពធាតុអាកាស កាលពីថ្ងៃទី១៨ ខែកញ្ញា ឆ្នាំ២០២១ កន្លងទៅ ដែលធ្វើឱ្យព្រះរាជាណាចក្រកម្ពុជា បានកំពុងបន្តទទួលរងឥទ្ធិពល នៃជ្រលងសម្ពាធទាបឥណ្ឌា និងខ្យល់មូសុងនិរតីខ្សោយ ធ្វើឱ្យមានភ្លៀងជាបន្តបន្ទាប់ក្នុងកម្រិតពីតិចទៅមធ្យម៕