អគ្គកុងស៊ុលវៀតណាម ប្រចាំខេត្តព្រះសីហនុ អបអរក្រុងព្រះសីហនុ និងក្រុងកោះរ៉ុង ត្រៀមបើកទទួលទេសចរណ៍វ៉ាក់សាំង

អគ្គកុងស៊ុលស្ថានទូតវៀតណាម ប្រចាំខេត្តព្រះសីហនុលោក វ៉ូ ង៉ុកលី បានសម្ដែងការអបអរសាទរ ដែលក្រុងព្រះសីហនុ និងក្រុងកោះរ៉ុង នៃខេត្តព្រះសីហនុ ត្រូវបានជ្រើសរើសសាកល្បង ទទួលទេសចរណ៍វ៉ាក់សាំង នៅថ្ងៃទី ៣០ ខែវិច្ឆិកា ឆ្នាំ ២០២១ ខាងមុខនេះ។

លោក វ៉ូ ង៉ុកលី បានថ្លែងបែបនេះ ក្នុងឱកាសចូលជួបសំណេះសំណាល ជាមួយលោក គួច ចំរើន អភិបាល នៃ​គណៈ​អភិបាលខេត្តព្រះសីហនុ កាលពីរសៀលថ្ងៃទី ៦ ខែវិច្ឆិកា ឆ្នាំ ២០២១ និងក្នុងឱកាសរំលឹកខួបអនុស្សាវរីយ៍លើកទី ៦៨ នៃទិវាបុណ្យឯករាជ្យជាតិ ៩វិច្ឆិកា ១៩៥៣-៩វិច្ឆិកា ២០២១។

អគ្គកុងស៊ុលវៀតណាម ប្រចាំខេត្តព្រះសីហនុ បានធ្វើការកត់សំគាល់ថា ព្រះរាជាណាចក្រកម្ពុជា បានទទួលសមិទ្ធផល និងភាពជោគជ័យថ្មីៗ ជាច្រើន ព្រមទាំងការអភិវឌ្ឍលើគ្រប់វិស័យ និងលើកកម្ពស់ជីវភាពរស់នៅរបស់ប្រជាពលរដ្ឋ ក៏ដូចជាការទប់ស្កាត់ជំងឺកូវីដ-១៩ បានទាន់ពេលវេលាផងដែរ។

ជាមួយគ្នានេះ លោកអគ្គកុងស៊ុលវៀតណាម បានប្ដេជ្ញាថា នឹងបន្តកិច្ចសហប្រតិបត្តិការ រវាងប្រទេសទាំងពីរកម្ពុជា-វៀតណាម ឲ្យកាន់តែពង្រឹងពង្រីកឥតឈប់ឈរ ទោះបីមានជំងឺកូវីដ-១៩រាតត្បាត មិនទាន់បញ្ចប់យ៉ាងណាក៏ដោយ។ ​លោកក៏បានជូនពរលោកអភិបាលខេត្តមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទទួលបានជោគ ជ័យ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលខាងមុខ ឲ្យទទួលបានជោគជ័យ៕

អត្ថបទ៖ ណារី